ସୁନା କିଣୁଥିବା ଗ୍ରାହକଙ୍କ ପାଇଁ ବଡ ଖବର । ଅସଲି ସୁନା ଗହଣା ନାଁରେ ଆଉ ଠକିପାରିବେନି ଦୋକାନୀ, ବଜାରରେ ମିଳିବ କେବଳ ହଲମାର୍କ ସୁନା ।
କନକ ବ୍ୟୁରୋ : ସୁନା କିଣୁଥିବା ଗ୍ରାହକଙ୍କ ପାଇଁ ବଡ ଖବର । ସାଧାରଣତଃ ସୁନା ଗହଣା କିଣୁଥିବା ବେଳେ ଅନେକ ସମୟରେ ଲୋକେ ଠକାମୀ ଶିକାର ହୋଇଥାନ୍ତି । ଏପରିକି ସୁନା ନ ଚିହ୍ନି ପାରି ଲୋକେ ଅସଲି ସୁନା ବଦଳରେ ନକଲି ସୁନା ଗହଣା କିଣିଥାନ୍ତି । କିନ୍ତୁ ଏବେ ଏହି ଠକାମୀରେ ପଡିବ ପୂର୍ଣ୍ଣଚ୍ଛେଦ । କେନ୍ଦ୍ର ସରକାର ଏମିତି ଏକ ପଦକ୍ଷେପ ନେବାକୁ ଯାଉଛନ୍ତି ଯାହାଦ୍ୱାରା ସୁନା କିଣିବା ବେଳେ ଆଉ ଲୋକେ ଠକାମୀର ଶିକାର ହେବେନି ।
Kanak News is now on WhatsApp
Join and get latest news updates delivered to you via WhatsApp
କେନ୍ଦ୍ରମନ୍ତ୍ରୀ ରାମବିଳାସ ପାଶୱାନଙ୍କ କହିବା ଅନୁଯାୟୀ, ୧୫ ଜାନୁଆରୀ ୨୦୨୧ ପରଠାରୁ ସୁନା ଗହଣା ଉପରେ ହଲମାର୍କ ରହିବ । ତେଣୁ ହଲମାର୍କ ଦେଖି ଗ୍ରାହକ ସୁନା ଗହଣା କିଣିପାରିବେ । ଏନେଇ ଆସନ୍ତା ୧୫ ଜାନୁଆରୀ ୨୦୨୦ରେ ବିଜ୍ଞପ୍ତି ପ୍ରକାଶ ପାଇବ । କିନ୍ତୁ ଏହି ନୂଆ ନିୟମ ଲାଗୁ କରିବାକୁ ଗୋଟିଏ ବର୍ଷ ସମୟ ଦିଆଯିବ । ଯାହାଦ୍ୱାରା ଏହି ସମୟସୀମା ମଧ୍ୟରେ ପୁରୁଣା ସୁନା ଗହଣା ଷ୍ଟକ ଶେଷ କରିପାରିବେ ଦୋକାନୀ । ଏବେ ଦେଶରେ ୮୦୦ଟି ହଲମାର୍କିଂ କେନ୍ଦ୍ର ରହିଥିଲେ ମଧ୍ୟ ମାତ୍ର ୪୦ ପ୍ରତିଶତ ଗହଣା ଉପରେ ହଲମାର୍କିଂ କରାଯାଉଛି ।
ହଲମାର୍କ କଣ :
ସୁନାର ଶୁଦ୍ଧତା ଜାଣିବା ପାଇଁ ହଲମାର୍କର ବ୍ୟବହାର କରାଯାଇଥାଏ । ସୁନା ଗହଣାର ଶୁଦ୍ଧତା ଜାଣିବା ପାଇଁ ହଲମାର୍କ ମାନକକୁ ଭାରତୀୟ ମାନକ ବ୍ୟୁରୋ(ବିଆଇଏସ) ନିର୍ଦ୍ଧାରିତ କରିଛି । ସୁନା ଗହଣା ଉପରେ ବିଆଇଏସ ଦ୍ୱାରା ଚିହ୍ନିତ ହୋଇଥିବା ହଲମାର୍କ ଦ୍ୱାରା ଏହା ସ୍ୱଷ୍ଟ ହୋଇଯାଇଥାଏ ଯେ, ଏହି ସୁନାର ଲ୍ୟାବରେ ପରୀକ୍ଷଣ ସହ ଯାଞ୍ଚ କରାଯାଇଛି । ବିଆଇଏସ ୩ଟି ଗ୍ରେଡର ସୁନା ବଜାରକୁ ଛାଡିଥାଏ । ୧୪, ୧୮ ଓ ୨୨ କ୍ୟାରେଟ ଯୁକ୍ତ ସୁନା ପାଇଁ ବିଆଇଏସ ହଲମାର୍କ ମାନକ ନିର୍ଦ୍ଧାରଣ କରିଛି ।