୯ ବର୍ଷ ହେବ କାମ ଚାଲିଛି, କିନ୍ତୁ କେବେ ସରିବ ସୂଚନା ନାହିଁ । ଅଧାରେ ଝୁଲୁଛି କୋଟି କୋଟି ଟଙ୍କା ବ୍ୟୟରେ ନିର୍ମିତ ଆଖଡାଶାଳି କ୍ରିକର ଭାଗ୍ୟ ।
କନକ ବ୍ୟୁରୋ : ଅଧାରେ ଝୁଲୁଛି କୋଟି କୋଟି ଟଙ୍କା ବ୍ୟୟରେ ନିର୍ମିତ ଆଖଡାଶାଳି କ୍ରିକର ଭାଗ୍ୟ । ୯ ବର୍ଷ ହେବ ନିର୍ମାଣ କାର୍ଯ୍ୟ ଜାରି ରହିଥିବା ବେଳେ ବାଧକ ସାଜିଛି ଜମି ଅଧିଗ୍ରହଣ । ସମୁଦ୍ରରୁ ଉଠୁଥିବା ଲୁଣା ଜୁଆରକୁ ଅଟକାଇବା ସହ ନଦୀର ମିଠାପାଣି ସଂରକ୍ଷଣ କରି ଚାଷ କାମରେ ଲଗାଇବା ଉଦେଶ୍ୟରେ କ୍ରିକ୍ ନିର୍ମାଣ କରାଯାଉଛି । ହେଲେ ଦୀର୍ଘ ଦିନ ବର୍ଷ ଧରି କାମ ସରୁନଥିବାରୁ ଚାଷ ଜମିରେ ଲୁଣା ଜୁଆର ମାଡୁଛି, ଚାଷୀ ପ୍ରଭାବିତ ହେଉଛନ୍ତି ।
Kanak News is now on WhatsApp
Join and get latest news updates delivered to you via WhatsApp
ସମୁଦ୍ରର ଲୁଣା ଜୁଆରକୁ ରୋକିବା ସହ ନଦୀର ମିଠା ପାଣିକୁ ସଂରକ୍ଷଣ କରି ଚାଷ ଜମିକୁ ଯୋଗାଇବା ଉଦ୍ଦେଶ୍ୟରେ କେନ୍ଦ୍ରାପଡା ଜିଲ୍ଲା ମହାକାଳପଡା ବ୍ଲକର ଗଳିଆ ନଦୀ ଉପରେ ତିଆରି ହୋଇଥିଲା ଆଖଡାଶାଳୀ କ୍ରିକ୍ । କାର୍ଯ୍ୟକ୍ଷମ ହେବାର ଦିନ କେଇଟା ପରେ ୧୯୯୩ରେ କ୍ରିକଟି ହଠାତ୍ ଭୁଷୁଡି ପଡିଥିଲା । ଫଳରେ ପେଟଛେଲା, ବରକନ୍ଧା, ବଉଳକଣି, ରାମନଗର ଏବଂ ମଙ୍ଗଳପୁର ଇତ୍ୟାଦି ୮ଟି ପଂଚାୟତର ଶହଶହ ଏକର ଜମିରେ ଲୁଣା ପାଣି ମାଡିଗଲା, ଚାଷ ଉଜୁଡି ଗଲା । ଚାଷୀଙ୍କ ସମସ୍ୟାକୁ ଦୃଷ୍ଟିରେ ରଖି ପୁଣି ଆଖଡାଶାଳୀ କ୍ରିକ୍ ନିର୍ମାଣ କରିବା ପାଇଁ ୨୦୧୩ ମସିହାରେ ନିଷ୍ପତ୍ତିି ହେଲା । ତଟବନ୍ଧ ବିଭାଗ ପକ୍ଷରୁ ୬ କୋଟି ୫୦ ଲକ୍ଷ ଟଙ୍କା ବ୍ୟୟରେ କାମ ଆରମ୍ଭ ହେଲା । ଏହାରି ଭିତରେ ୯ ବର୍ଷ ବିତାଲାଣି, ଜମି ଅଧିଗ୍ରହଣ ସମସ୍ୟା ଯୋଗୁଁ ଏଯାଏଁ ପ୍ରକଳ୍ପ କାମ ଶେଷ ହୋଇପାରିନାହିଁ ।
କ୍ରିକର ନିର୍ମାଣ କାର୍ଯ୍ୟ ସରିଛି, ହେଲେ ମହାନଦୀରୁ ଗଳିଆ ନଦୀକୁ ଖୋଳା ଯିବାକୁ ଥିବା ଚ୍ୟାନେଲ୍ ଏପର୍ଯ୍ୟନ୍ତ ଖୋଳା ହୋଇନାହିଁ । ଚ୍ୟାନେଲ୍ କାମରେ ଜମି ଅଧିଗ୍ରହଣ ସମସ୍ୟା ସାଜିଛି । ଫଳରେ ଦୁଇ ବର୍ଷ ତଳୁ କ୍ରିକର କଂଷ୍ଟ୍ରକସନ୍ ସରିଥିଲେ ବି କାର୍ଯ୍ୟକ୍ଷମ ହୋଇପାରୁନାହିଁ । ପ୍ରକଳ୍ପ ଶେଷ ତାରିଖ ଘୁଞ୍ଚିଘୁଞ୍ଚି ଯାଉଛି । ଏପଟେ ଚାଷ ଜମିରେ ସମୁଦ୍ରରୁ ଜୁଆର ମାଡି ଫସଲ ନଷ୍ଟ ହେବା ସହ ଜମିବାଡି ସବୁ ଲୁଣା ହୋଇଯାଉଛି । କୋଟି କୋଟି ଟଙ୍କା ବ୍ୟୟରେ ନିର୍ମାଣ ହେଉଥିବା ପ୍ରକଳ୍ପ ଶେଷ ପର୍ଯ୍ୟାୟରେ ଅଟକି ଯିବାରୁ ଚାଷୀଙ୍କ ଚାଷ ଉଜୁଡି ଯିବାକୁ ବସିଛି ।