ବଳିଆ ଖାଇଲେ ପୁରୁଥିଲା ଜଗାର ପେଟ ! ଗୋଟିଏ ଶରୀରରୁ ଆଉ ଗୋଟିଏ ଶରୀରକୁ ହେଉଥିଲା ରକ୍ତ ସଂଚାଳନ
କନକ ବ୍ୟୁରୋ : କନ୍ଧମାଳର ଯୋଡାମୁଣ୍ଡ ଶିଶୁ ଜଗାବଳିଆଙ୍କୁ ନେଇ ନୂଆ ତଥ୍ୟ ସାମ୍ନାକୁ ଆସିଛି । ତାଙ୍କୁ ଅପରେସନ୍ କରୁଥିବା ଦିଲ୍ଲୀ ଏମ୍ସର ୪୦ ଜଣିଆ ଡାକ୍ତରୀ ଟିମର ମୁଖ୍ୟ ଡାକ୍ତର ଅଶୋକ ମହାପାତ୍ର କହିଛନ୍ତି, ଏହି ଅପରେସନ୍ ବିଶ୍ୱରେ ବିରଳ । କାରଣ, ଜଗାବଳିଆଙ୍କ କ୍ଷେତ୍ରରେ ଏକ ବଡ ଅସ୍ୱାଭାବିକତା ଲକ୍ଷ୍ୟ କରାଯାଇଥିଲା । ଜଣେ ଖାଇଲେ ଅନ୍ୟର ପେଟ ପୁରୁଥିଲା । ଏପରିକି ବଳିଆର ରକ୍ତ, ଜଗା ଦେହରେ ସଂଚାଳନ ହେଉଥିଲା । ତେଣୁ ବଳିଆର ସ୍ୱାଧୀନ ଭାବରେ ଶିରା ପଶିରାର ଢାଂଚା ତିଆରି କରାଯାଇ ପ୍ରତିରୋପଣ କରାଯାଇଛି । ପ୍ରଥମ ପର୍ଯ୍ୟାୟ ଅପରେସନରେ ଡାକ୍ତରମାନେ ଏହି ବଡ କାମ କରିବାରେ ସଫଳ ହୋଇଛନ୍ତି ।
Kanak News is now on WhatsApp
Join and get latest news updates delivered to you via WhatsApp
ଗତ ସୋମବାର ହୋଇଥିବା ଏହି ଅପରେସନ୍ ଯେତିକି ଜଟିଳ ଥିଲା, ସାରା ଓଡ଼ିଶାର ଲୋକଙ୍କ ମଧ୍ୟରେ ସେତିକି ଉକ୍ରଣ୍ଠା ବି ଭରି ରହିଥିଲା । ଆପଣ ଜାଣି ଆଶ୍ଚର୍ଯ୍ୟ ହେବେ ଯେ ଦୀର୍ଘ ୨୦ ଘଂଟା ଧରି ଚାଲିଥିବା ଏହି ଅପରେସନ୍ ସାରା ବିଶ୍ୱରେ ବିରଳ ତଥା ପ୍ରଥମ ଧରଣର ଅପରେସନ୍ । ୪୦ ଜଣିଆ ଡାକ୍ତରୀ ଦଳର ନେତୃତ୍ୱ ନେଉଥିବା ଡାକ୍ତର ଅଶୋକ ମହାପାତ୍ର ଏ ନେଇ ଗୁରୁତ୍ୱପୂର୍ଣ୍ଣ ତଥ୍ୟ ଦେଇଛନ୍ତି । ଜଗାବଳିଆ ଅପରେସନ୍ ଏଥିପାଇଁ ସବୁଠାରୁ ଜଟିଳ ଥିଲା ଯେହେତୁ
-ବଳିଆର ରକ୍ତ ସଂଚାଳନ ଜଗାକୁ ହେଉଥିଲା
-ବଳିଆର ମସ୍ତିଷ୍କ ଯୋଡ଼ି ହୋଇଥିଲା ଜଗାର ମସ୍ତିଷ୍କ ସହ
-ବଳିଆକୁ ଦିଆଯାଉଥିବା ତରଳ ଖାଦ୍ୟ ଜଗା ଦେହକୁ ଯାଉଥିଲା
-ଫଳରେ ଜଗାର ଅଧିକ ପରିସ୍ରା ହେଉଥିଲା
ତେଣୁ ଡାକ୍ତରଙ୍କ ଆଗରେ ପ୍ରଥମ ଚ୍ୟାଲେଂଜ୍ ଥିଲା- ବଳିଆର ରକ୍ତ ସଂଚାଳନକୁ ଜଗାଠାରୁ ଅଲଗା କରିବା । ଏଥିପାଇଁ କୃତ୍ରିମ ଶିରାପ୍ରଶିରା ରୋପଣ କରିବାର ଆବଶ୍ୟକତା ପଡ଼ିଲା ।
କୃତ୍ରିମ ଶିରାପ୍ରଶିରାର ଢ଼ାଂଚା ତିଆରି କରିବା ଏବଂ ଏହାକୁ ବଳିଆ ଦେହରେ ରୋପଣ କରିବା ପାଇଁ ସ୍ୱତନ୍ତ୍ର ଭାବେ ଜାପାନରୁ ଜଣେ ଡାକ୍ତରଙ୍କୁ ଡକାଯାଇଥିଲା । ଏବଂ ଜାପାନର ସେହି ଡାକ୍ତର ପ୍ରଥମ ପର୍ଯ୍ୟାୟର ୨୦ ଘଂଟାର ଅପରେସନରେ ନିଜେ ନେଇଥିଲେ ୧୫ ଘଂଟା ।
ଅପରେସନରେ ଏଭଳି ଜଟିଳତା ପାଇଁ ୧୦ଟି ଦେଶର ବିଶେଷଜ୍ଞ ଡାକ୍ତରଙ୍କ ସହ ଇମେଲ୍ ଓ ଭିଡିଓ କନ୍ଫରେନସିଂ ଯୋଗେ କଥା ହୋଇଥିଲେ ଦିଲ୍ଲୀ ଏମ୍ସର ଡାକ୍ତର । ଏବଂ ଦୀର୍ଘ ଦିନ ଧରି ଏହି ଆଲୋଚନା ପରେ କନ୍ଧମାଳର ଜଗାବଳିଆଙ୍କ ଅପରେସନ୍ ଆରମ୍ଭ ହୋଇଥିଲା ।