କନକ ବ୍ୟୁରୋ : କଂଗ୍ରେସ ବିଧାୟକ କୃଷ୍ଣ ଶଗରିଆ ବିଧାୟକ ପଦରୁ ଇସ୍ତଫା ଦେବା କଥା ଘୋଷଣା କରିବା ପରେ ଦଳୀୟ ରାଜନୀତି ସରଗରମ ହୋଇଛି । କୃଷ୍ଣଙ୍କ ଘୋଷଣାକୁ ନେଇ ପିସିସିର ନେତାମାନେ ଭିନ୍ନ ଭିନ୍ନ ମତ ପୋଷଣ କରିଛନ୍ତି । ପିସିସି ସଭାପତି ନିରଞ୍ଜନ ପଟ୍ଟନାୟକ କହିଛନ୍ତି ବିଧାନସଭାର କାର୍ଯ୍ୟକାଳ ଆଉ ଚାରି ମାସ ବାକି ଥିବାବେଳେ କୃଷ୍ଣଙ୍କ ଇସ୍ତଫାର କିଛି ମୂଲ୍ୟ ନାହିଁ । ସେ ଇସ୍ତଫା ଦେବାର ଯଥାର୍ଥତା ଅଛି । ସେ ବିବେକକୁ ପଚାରି କାର୍ଯ୍ୟ କରିଛନ୍ତି । କଂଗ୍ରେସ କିଛି କରିନି କହିବା ଠିକ୍ ନୁହେଁ ବୋଲି ନିରଞ୍ଜନ କହିଛନ୍ତି ।
Kanak News is now on WhatsApp
Join and get latest news updates delivered to you via WhatsApp
ପିସିସି ଉପସଭାପତି ଅନନ୍ତ ସେଠୀ କହିଛନ୍ତି ଯଦି ଇସ୍ତଫା ଦେବାର ଥିଲା ତେବେ ପୂର୍ବରୁ ଦେଇଥିଲେ ଉପନିର୍ବାଚନ ହୋଇଥାନ୍ତା । ଏବେ ଦେବାର ମୂଲ୍ୟ କିଛି ନାହିଁ । ଏବଂ ଇସ୍ତଫା କୌଣସି ସମସ୍ୟା ସମାଧାନର ବାଟ ନୁହେଁ । କୁନ୍ଦୁଲି କେବଳ ବାହାନା, ସଗରିଆଙ୍କ ଉଦ୍ଦେଶ୍ୟ ଭିନ୍ନ । ତାଙ୍କ ଇସ୍ତଫାର କାରଣ ଗ୍ରହଣୀୟ ନୁହେଁ । କୁନ୍ଦୁଲି ଲଢେଇ ତାଙ୍କର ନିଜସ୍ୱ କହିବା କେତେ ଦୂର ସତ, ତାହା ଲୋକେ ବିଚାର କରିବେ । ଏହି ଲଢେଇକୁ କଂଗ୍ରେସ ଦଳ ଜୋରଦାର କରିଥିଲା ବୋଲି ପିସିସି ଉପସଭାପତି ଅନନ୍ତ ସେଠୀ କହିଛନ୍ତି ।
ସେହିପରି ବିଭୁ କିଶୋର ତରାଇ କହିଛନ୍ତି କୁନ୍ଦୁଲି ପୀଡିତାଙ୍କ ପାଇଁ କୃଷ୍ଣ ନେଇଥିବା ପଦକ୍ଷେପକୁ ଧନ୍ୟବାଦ । କିନ୍ତୁ କଂଗ୍ରେସ ବିରୋଧରେ ତାଙ୍କର ଅଭିଯୋଗ ନିରାଧାର । କାରଣ ଏହି ପ୍ରସଙ୍ଗରେ ସମସ୍ତ ପ୍ରକାର ସମର୍ଥନ କରିଛି କଂଗ୍ରେସ । ତେବେ ଶଗରିଆଙ୍କ ପଦକ୍ଷେପକୁ କଡା ଭାଷାରେ ସମାଲୋଚନା କରିଛନ୍ତି ବରିଷ୍ଠ ନେତା ସୁର ରାଉତ୍ ରାୟ । ସେ କହିଛନ୍ତି ଦଳ ଛାଡିଲେ କୌଣସି ପ୍ରଭାବ ପଡିବନି । କଂଗ୍ରେସ ଦଳ ଏକ ସମୁଦ୍ର ଏବଂ ସମୁଦ୍ରରୁ ବାଲଟିଏ ପାଣି ଗଲେ କିଛି ଅସୁବିଧା ହେବ ନାହିଁ ବୋଲି ସୁର ରାଉତରାୟ କହିଛନ୍ତି ।