କନକ ବ୍ୟୁରୋ: ଦରଦାମ, ମୁଦ୍ରାସ୍ପୀତି ବୃଦ୍ଧିକୁ ବିରୋଧ କରି ଶୁକ୍ରବାର ବିଭିନ୍ନ ରାଜ୍ୟରେ ଜୋରଦାର ବିକ୍ଷୋଭ କରିଛି କଂଗ୍ରେସ । ଦଳ ରାଜଧାନୀ ଦିଲ୍ଲୀଠୁ ନେଇ ବିଭିନ୍ନ ରାଜ୍ୟରେ ପ୍ରତିବାଦ କରିଛି । ଦଳୀୟ ନେତା, କର୍ମୀ,ମନ୍ତ୍ରୀ ଓ ବରିଷ୍ଠ ନେତା ବିକ୍ଷୋଭରେ ସାମିଲ ହୋଇ ସରକାରଙ୍କ ବିରୋଧରେ ନାରାବାଜୀ ଦେଇ ନିଜର ଦାବି ଜଣାଇଛନ୍ତି ।
Kanak News is now on WhatsApp
Join and get latest news updates delivered to you via WhatsApp
ସଂସଦ ଭବନରୁ ରାଷ୍ଟ୍ରପତି ଭବନ ପର୍ଯ୍ୟନ୍ତ ପଦଯାତ୍ରା କରି କଂଗ୍ରେସ ନେତା,ମନ୍ତ୍ରୀ କର୍ମୀ ପହଁଚିଥିବାବେଳେ ପୁଲିସ ସହ ମୁହାଁମୁହିଁ ହୋଇଥିବା ଦେଖିବାକୁ ମିଳିଛି । ଏହି ସମୟରେ କଂଗ୍ରେସର ସାଂସଦ ରାହୁଲ ଗାନ୍ଧୀ, ମହାସଚିବ ପ୍ରିୟଙ୍କା ଗାନ୍ଧୀଙ୍କ ସମେତ ଅନେକ ବରିଷ୍ଠ ନେତାଙ୍କୁ ଅଟକ ରଖାଯାଇଥିଲା । ତେବେ କିଛି ସମୟ ଅଟକ ରଖିବା ପରେ ଏମାନଙ୍କୁ ଛାଡିଦିଆଯାଇଥିଲା ।
ଶୁକ୍ରବାର ବିରୋଧ ପ୍ରର୍ଦଶନ କରିବା ପୂର୍ବରୁ କଂଗ୍ରେସ ସାଂସଦ ସାମ୍ବାଦିକ ସମ୍ମିଳନୀ କରି ବିଜେପି ସରକାରଙ୍କ ଉପରେ ବର୍ଷିଥିଲେ । ରାହୁଲ କହିଥିଲେ ଏକଛତ୍ରବାଦୀ ଶାସକ ଅଧୀନରେ ଚାଲିଛି ଦେଶ । ବିରୋଧୀ ଯେଉଁ ସମୟରେ ଦେଶର ଗୁରୁତ୍ୱପୂର୍ଣ୍ଣ ପ୍ରସଙ୍ଗ ଉଠାଉଛି ତାଙ୍କୁ କହିବାକୁ ଦଉନାହାଁନ୍ତି ସରକାର । ସଂସଦରେ ପ୍ରଦର୍ଶନ କଲେ ନିଲମ୍ବନ ଓ ବାହାରେ ପ୍ରତିବାଦ କଲେ ଗିରଫ କରାଯାଉଛି । ୮ ବର୍ଷର ଶାସନରେ ଦେଶରେ ଦରଦାମ, ବେକାରୀ ସମସ୍ୟା, ହିଂସା ବୃଦ୍ଧି ପାଇଛି । ଅର୍ଥମନ୍ତ୍ରୀ ନିର୍ମଳା ସୀତାରମଣଙ୍କୁ ଟାର୍ଗେଟ କରି ରାହୁଲ କହିଛନ୍ତି, ତାଙ୍କର ମାଇକ୍ରୋ ଅର୍ଥଶାସ୍ତ୍ର ଉପରେ ଜ୍ଞାନ ନାହିଁ । ଭାରତ ଅର୍ଥନୀତି କିପରି ଚାଲୁଛି ତାହା ଉପରେ ମଧ୍ୟ ଅର୍ଥମନ୍ତ୍ରୀ କିଛି ଜାଣନ୍ତି ନାହିଁ । ସେ କେବଳ ମୁଖପାତ୍ର ଭଳି କାର୍ଯ୍ୟ କରନ୍ତି ବୋଲି ରାହୁଲ ଗାନ୍ଧୀ କହିଛନ୍ତି ।
କଂଗ୍ରେସ ନେତାମାନେ କଳା କୁର୍ତା ପିନ୍ଧି ବିକ୍ଷୋଭ କରିଛନ୍ତି । କେବଳ ରାସ୍ତାକୁ ଦଳ ଶହ ଶହ କର୍ମୀ ସମର୍ଥକଙ୍କ ସହ ଓହ୍ଲାଇନି । ସେପଟେ ସଂସଦ ଭବନ ପରିସରରେ ମଧ୍ୟ ସାଂସଦମାନେ ପ୍ଲାକାର୍ଡ ଧରି ସରକାରଙ୍କ ନୀତି ବିରୋଧରେ ବିକ୍ଷୋଭ କରିଛନ୍ତି ।