କନକ ବ୍ୟୁରୋ: ଲକ୍ଷ୍ମୀପୁର ଖେରୀ ହିଂସାକାଣ୍ଡକୁ ନେଇ ଉତ୍ତରପ୍ରଦେଶରେ ଉତ୍ତେଜନା ଲାଗି ରହିଥିବାବେଳେ ପ୍ରଧାନମନ୍ତ୍ରୀ ନରେନ୍ଦ୍ର ମୋଦୀ ଲକ୍ଷ୍ନୌରେ ପହଁଚି ପାଳନ କରିଛନ୍ତି ‘ଆଜାଦୀ କା ଅମୃତ ମହୋତ୍ସବ’ । ଏହି ଅବସରରେ ମୋଦୀ ଏକାଧିକ ପ୍ରକଳ୍ପର ଉଦଘାଟନ କରିଛନ୍ତି । ଏହି କାର୍ଯ୍ୟକ୍ରମରେ ପଧାନମନ୍ତ୍ରୀଙ୍କ ସହ ପ୍ରତିରକ୍ଷା ମନ୍ତ୍ରୀ ରାଜନାଥ ସିଂହ, ଉତ୍ତରପ୍ରଦେଶ ମୁଖ୍ୟମନ୍ତ୍ରୀ ଯୋଗୀ ଆଦିତ୍ୟନାଥ ଏବଂ ରାଜ୍ୟପାଳ ଆନନ୍ଦିବେନ ପଟେଲଙ୍କୁ ମଧ୍ୟ ଦେଖିବାକୁ ମିଳିଛି । ତେବେ ଏସବୁ ଭିତରେ ଏତେ ବଡ ହିଂସାକାଣ୍ଡକୁ ନେଇ କୌଣସି ବି ଟିପ୍ପଣୀ ରଖିନାହାଁନ୍ତି ପ୍ରଧାନମନ୍ତ୍ରୀ ।
Kanak News is now on WhatsApp
Join and get latest news updates delivered to you via WhatsApp
ଉତ୍ତର ପ୍ରଦେଶ, ଲକ୍ଷ୍ମୀପୁର ଖେରୀ ହିଂସାକାଣ୍ଡକୁ ନେଇ କଂଗ୍ରେସ ସାରା ଦେଶରେ ପ୍ରତିବାଦ ପାଳନ କରୁଥିବାବେଳେ ସେପଟେ କିନ୍ତୁ ବିଜେପି ପାଳନ କରୁଛି ଆଜାଦୀର ଅମୃତ ମହୋତ୍ସବ । ଆଉ ଏହାକୁ ପାଳିବାକୁ ନିଜେ ପହଁଚିଛନ୍ତି ପ୍ରଧାନମନ୍ତ୍ରୀ ମୋଦୀ । ଉତ୍ତରପ୍ରଦେଶ ରାଜଧାନୀ ଲକ୍ଷ୍ନୌରେ ଆଜାଦୀର ଅମୃତ ମହୋତ୍ସବ ପାଳନ ହୋଇଛି । ଯେଉଁଠି ୩ ଦିନିଆ ଅରବାନ କନକ୍ଲେଭ କାର୍ଯ୍ୟକ୍ରମର ଶୁଭାରମ୍ଭ କରିଛନ୍ତି ମୋଦୀ । ମ୍ରୁଖ୍ୟ ଅତିଥି ଭାବେ ଯୋଗଦେଇ ପ୍ରଧାନମନ୍ତ୍ରୀ ବହୁ ପ୍ରକଳ୍ପର ଉଦଘାଟନ କରିଛନ୍ତି । ସହରାଞ୍ଚଳ ଆବାସ ଯୋଜନାରେ ୭୫ ହଜାର ଲାଭାର୍ଥୀଙ୍କୁ ଡିଜିଟାଲ ମାଧ୍ୟମରେ ତାଙ୍କ ଘରର ଚାବି ବାଣ୍ଟିଛନ୍ତି ମୋଦୀ । ସେହିପରି ୭୫ଟି ସ୍ମାଟ ବସର ଉଦଘାଟନ କରିଛନ୍ତି । ଏହା ଭଗବାନ ଶ୍ରକୃଷ୍ଣ ଓ ରାମଙ୍କର ଭୂମି ଅଟେ । ଏହାକୁ ଆହୁରି ସମୃଦ୍ଧ କରିବାପାଇଁ ଆମେ ସଂକଳ୍ପ ବଦ୍ଧ ବୋଲି କହିଛନ୍ତି ପ୍ରଧାନମନ୍ତ୍ରୀ ।
ଏହି କାର୍ଯ୍ୟକ୍ରମରେ ବିରୋଧୀଙ୍କ ନାଁ ନନେଇ ବର୍ଷିଛନ୍ତି ମୋଦୀ । ସେ କହିଛନ୍ତି, ଗତ ସରକାର ସମୟରେ ପିଏମ ଆବାସ ଯୋଜନାରେ ମହାଘୋଟାଲା ହୋଇଥିଲା । ୧୮ ହଜାର ପରିବାରକୁ ଘର ମଞ୍ଜୁରି ମିଳିବାପରେ ୧୮ଟି ଘର ମଧ୍ୟ ତିଆରି ହୋଇପାରିନଥିବା ମୋଦୀ କହିଛନ୍ତି । ସେହିପରି ୟୁପି ବାସୀଙ୍କୁ କିଛି ହୋମୱାର୍କ ଦେବାକୁ ସେ କହିଛନ୍ତି । ଏବର୍ଷ ଦୀପାବଳିରେ ଅଯୋଧ୍ୟାରେ ୭ ଲକ୍ଷ ୫୦ ହଜାରରୁ ଅଧିକ ଦୀପ ଜଳେଇବାର କାର୍ଯକ୍ରମ ରହିଛି । ଆହୁରି ଅଧିକ ଦୀପ ଜାଳିବାକୁ ୟୁପି ନାଗରିକଙ୍କୁ କହିଛନ୍ତି ପ୍ରଧାନମନ୍ତ୍ରୀ ।