‘ଜଣେ ବ୍ୟକ୍ତି,ଗୋଟିଏ ପଦ’ ନେଇ ରାହୁଲଙ୍କ ପ୍ରତିକ୍ରିୟା ପରେ ଗେହଲଟଙ୍କୁ ବଡ ଝଟକା । ଛାଡିବେ କି ରାଜସ୍ଥାନ ମୁଖ୍ୟମନ୍ତ୍ରୀ ପଦ? ପାଇଲଟ ଶିବିରରେ ଖୁସିର ଲହରୀ ।
କନକ ବ୍ୟୁରୋ: କଂଗ୍ରେସ ଅଧ୍ୟକ୍ଷ ପଦ ନିର୍ବାଚନକୁ ନେଇ ଲାଗି ରହିଥିବା ଚର୍ଚ୍ଚା ଆଲୋଚନା ଭିତରେ ରାଜସ୍ଥାନ ମୁଖ୍ୟମନ୍ତ୍ରୀ ଅଶୋକ ଗେହଲଟଙ୍କୁ ବଡ ଝଟକା ଦେଇଛନ୍ତି ରାହୁଲ ଗାନ୍ଧୀ । ‘ଜଣେ ବ୍ୟକ୍ତି, ଗୋଟିଏ ପଦ’କୁ ନେଇ ରାହୁଲ ମୁହଁ ଖୋଲିବା ସହିତ, ଉଦୟପୁରରେ ଯାହା ସଙ୍କଳ୍ପ ପାରିତ ହେଇଛି ତାହା କାଏମ ରହିବାକୁ ଆଶା କରିଛନ୍ତି ରାହୁଲ । ଯାହା ରାଜସ୍ଥାନ ମୁଖ୍ୟମନ୍ତ୍ରୀ ତଥା ଅଧ୍ୟକ୍ଷ ପଦ ନିର୍ବାଚନ ଲଢିବାକୁ ପ୍ରସ୍ତୁତ ହେଉଥିବା ଅଶୋକ ଗେହଲଟଙ୍କୁ ଏକ ବଡ ଝଟକା ବୋଲି କୁହାଯାଉଛି ।
Kanak News is now on WhatsApp
Join and get latest news updates delivered to you via WhatsApp
ତେବେ ରାହୁଲଙ୍କ ଏହି ଉତ୍ତର ଏଭଳି ସମୟରେ ଆସିଛି, ଯେତେବେଳେ ମୁଖ୍ୟମନ୍ତ୍ରୀ ପଦରେ ରହିବା ସହିତ ଗେହଲଟ କଂଗ୍ରେସ ଅଧ୍ୟକ୍ଷ ପଦ ପାଇଁ ନିର୍ବାଚନ ଲଢିବାକୁ ଇଚ୍ଛା ଜାହିର କରିଛନ୍ତି । ତେଣୁ ଏପରି ସ୍ଥିତିରେ ପ୍ରଶ୍ନ ଉଠୁଛି ଯେ, କଣ କଂଗ୍ରେସ ଅଧ୍ୟକ୍ଷ ହେବାକୁ ରାଜସ୍ଥାନ ମୁଖ୍ୟମନ୍ତ୍ରୀ ପଦ ଛାଡିବେ ଗେହଲଟ?
ରାହୁଲଙ୍କ ଏପରି ଉତ୍ତର ପରେ ରାଜସ୍ଥାନ ରାଜନୀତି ସରଗରମ ହେଇଛି । ଗୋଟିଏ ପଟେ ଏହାକୁ ନେଇ ଗେହଲଟ ପକ୍ଷ ନିରାଶ ଥିବାବେଳେ, ପାଇଲଟ ପକ୍ଷରେ କିନ୍ତୁ ଉତ୍ସାହ ଦେଖିବାକୁ ମିଳିଛି । କାହିଁକି ନା ଗେହଲଟଙ୍କ ପରେ ସଚିନ ପାଇଲଟ ହେଉଛନ୍ତି ଏମିତି ଜଣେ ନେତା, ଯିଏ କି ରାଜସ୍ଥାନ ମୁଖ୍ୟମନ୍ତ୍ରୀ ପଦରେ ବସିବାକୁ ପ୍ରବଳ ଦାବିଦାର ଅଟନ୍ତି ।
ସୂଚନାଯୋଗ୍ୟ ଯେ, ଚଳିତ ବର୍ଷ ମେ ମାସରେ ଉଦୟପୁରରେ କଂଗ୍ରେସର ଚିନ୍ତନ ଶିବିର ଆୟୋଜିତ ହେଇଥିଲା । ଏହି ଶିବିରରେ କଂଗ୍ରେସ ଜଣେ ବ୍ୟକ୍ତି, ଗୋଟିଏ ପୋଷ୍ଟ ସଙ୍କଳ୍ପ ପାରିତ କରିବା ସହିତ ଏହାକୁ ପାଳନ କରିବାକୁ ନେତାମାନେ ନିଷ୍ପତ୍ତି ନେଇଥିଲେ । ତେବେ ସଚିନ ପାଇଲଟଙ୍କ କ୍ଷେତ୍ରରେ କିନ୍ତୁ ଏହା ଲାଗୁ ହେଇନଥିଲା । ସେ ପ୍ରଦେଶ ଅଧ୍ୟକ୍ଷ ରହିବା ସହିତ ରାଜ୍ୟର ଉପ-ମୁଖ୍ୟମନ୍ତ୍ରୀ ରହିଥିଲେ । ଏହି ସ୍ଥିତି ମଧ୍ୟପ୍ରଦେଶର ପୂର୍ବତନ ମୁଖ୍ୟମନ୍ତ୍ରୀ କମଳନାଥଙ୍କ କ୍ଷେତ୍ରରେ ମଧ୍ୟ ହେଇଥିଲା । ହେଲେ ଏହାକୁ ପରବର୍ତ୍ତୀ ସମୟରେ ପରିବର୍ତ୍ତନ କରାଯିବା ସହିତ କଡାକଡି ଭାବେ ଲାଗୁ କରାଯାଇଥିଲା ।
ତେଣୁ ବର୍ତ୍ତମାନ ସ୍ଥିତିରେ ରାଜସ୍ଥାନ ମୁଖ୍ୟମନ୍ତ୍ରୀ ଯଦି କଂଗ୍ରେସ ଅଧ୍ୟକ୍ଷ ପଦ ପାଇଁ ନିର୍ବାଚନ ଲଢନ୍ତି, ତେବେ ତାଙ୍କୁ ରାଜସ୍ଥାନ ମୁଖ୍ୟମନ୍ତ୍ରୀ ପଦ ଛାଡିବାକୁ ପଡିବ । ଏପରି ସ୍ଥିତିରେ ଏହି ଖବର ପାଇଲଟ ଶିବିରରେ ଖୁସିର ଲହରୀ ଆଣିଛି । ଏପଟେ ଗୁରୁବାର ଗେହଲଟ କହିଛନ୍ତି ଯେ, ସେ ପୁଣି ରାହୁଲ ଗାନ୍ଧୀଙ୍କୁ ଭେଟିବା ସହିତ ଅଧ୍ୟକ୍ଷ ପଦ ନିର୍ବାଚନକୁ ନେଇ ଆଲୋଚନା କରିବେ ।