ମୁଣ୍ଡ ବିନା ଶରୀରର ଲାଭ କଣ? ସେନାପତି ନଥିଲେ ଲଢେଇ କିଭଳି ହେବ? କଂଗ୍ରେସକୁ ସାମନାରେ ବାଣ ମାରିଲା ଶିବସେନା ।
କନକ ବ୍ୟୁରୋ : କଂଗ୍ରେସକୁ ନେଇ ବଡ କଥା କହିଛି ଶିବସେନା । କଂଗ୍ରେସ ଦଳର ଜଣେ ପୂର୍ଣ୍ଣକାଳୀନ ଅଧ୍ୟକ୍ଷ ଆବଶ୍ୟକ ବୋଲି ଶିବସେନା ପକ୍ଷରୁ କୁହାଯାଇଛି ଜ୍ଝ ଶିବସେନା ପକ୍ଷରୁ କୁହାଯାଇଛି ଯେ ପଞ୍ଜାବରେ ରାଜନୈତିକ ସଙ୍କଟ ପାଇଁ କଂଗ୍ରେସରେ ନେତୃତ୍ୱ ଦ୍ୱନ୍ଦ୍ୱ ସହ ବିଜେପି ମଧ୍ୟ ଦାୟୀ । ଯଦିଓ ରାହୁଲ ଗାନ୍ଧୀ କଂଗ୍ରେସ ଦଳର ଅନେକ ସମସ୍ୟାର ସମାଧାନ କରିବାକୁ ଚେଷ୍ଟା କରୁଛନ୍ତି, ତଥାପି ତାଙ୍କୁ ରୋକିବା ପାଇଁ ଦଳର ପୁରୁଣା ନେତାମାନେ ବିଜେପି ସହିତ ଏକ ଗୁପ୍ତ ଚୁକ୍ତି କରିଛନ୍ତି ଏବଂ ତେଣୁ ସେମାନେ ଦଳକୁ ବୁଡ଼ାଇଦେବାକୁ ଲକ୍ଷ୍ୟ ରଖିଛନ୍ତି। ଶିବସେନାର ମୁଖପତ୍ର ‘ସାମନା’ରେ ସମ୍ପାଦକୀୟରେ ଲେଖାଯାଇଛି ଯେ କଂଗ୍ରେସକୁ ଜଣେ ପୂର୍ଣ୍ଣକାଳୀନ ଅଧ୍ୟକ୍ଷ ଦରକାର। ମୁଣ୍ଡ ବିନା ଶରୀରର ବ୍ୟବହାର କ’ଣ? କଂଗ୍ରେସ ଅସୁସ୍ଥ ଥିବାବେଳେ ଏହାର ଚିକିତ୍ସା କରାଯିବା ଉଚିତ । କିନ୍ତୁ ଚିକିତ୍ସା ଠିକ କି ଭୁଲ ସମୀକ୍ଷା କରାଯାଉ।
Kanak News is now on WhatsApp
Join and get latest news updates delivered to you via WhatsApp
ସମ୍ପାଦକୀୟରେ ଶିବସେନା ପକ୍ଷରୁ କୁହାଯାଇଛି ଯେ ରାହୁଲ ଗାନ୍ଧୀ (କଂଗ୍ରେସ ଦଳ) ଦୁର୍ଗର ମରାମତି କରିବାକୁ ଚାହୁଁଛନ୍ତି। ଦୁର୍ଗକୁ ରଙ୍ଗ ଦେବାକୁ ଚେଷ୍ଟା କରୁଛନ୍ତି । ଦଳରେ ସୃଷ୍ଟି ହୋଇଥିବା ଗର୍ତ୍ତକୁ ପୂର୍ଣ୍ଣ କରିବାକୁ ଚାହୁଁଛନ୍ତି, କିନ୍ତୁ ବରିଷ୍ଠ ନେତାମାନେ ରାହୁଲ ଗାନ୍ଧୀଙ୍କୁ ତାହା କରିବାକୁ ଦେଉ ନାହାଁନ୍ତି। ରାହୁଲ ଗାନ୍ଧୀଙ୍କୁ ଅଟକାଇବା ପାଇଁ ଏହି ଲୋକମାନେ ଭିତରେ ଭିତରେ ବିଜେପି ଭଳି ଦଳ ସହ ହାତ ମିଳାଇଛନ୍ତି, ଏହା ଏବେ ନିଶ୍ଚିତ ହୋଇଛି। ତେବେ କଂଗ୍ରେସକୁ ସ୍ଥାୟୀ ଅଧ୍ୟକ୍ଷ ମିଳିବା ଉଚିତ । ଯଦି ଦଳର ସେନାପତି ରହିବେ ନାହିଁ ତେବେ କିପରି ଲଢେଇ ହେବ ? ଶିବସେନା ପକ୍ଷରୁ କୁହାଯାଇଛି ଯେ ପୁରୁଣା ଭେଟେରାନ କଂଗ୍ରେସ ନେତାମାନଙ୍କ ଏହି ଦାବି ମଧ୍ୟ ଭୁଲ ନୁହେଁ। କଂଗ୍ରେସ ଦଳର ନେତା କିଏ, ତାହା ହେଉଛି ପ୍ରଶ୍ନ। ଗାନ୍ଧୀ ପରିବାର ଅଛନ୍ତି, କିନ୍ତୁ ନେତା କିଏ? ଅଧ୍ୟକ୍ଷ କିଏ? ଏହାକୁ ନେଇ ଦ୍ୱନ୍ଦ୍ୱ ରହିବ, ତେଣୁ ଏହାକୁ ସମାଧାନ କରାଯିବା ଉଚିତ୍ ।
ଉଲ୍ଲେଖନୀୟ ବିଷୟ ହେଉଛି, ମହାରାଷ୍ଟ୍ରରେ ଉଦ୍ଧବ ଠାକରେଙ୍କ ନେତୃତ୍ୱରେ ଶିବସେନା, କଂଗ୍ରେସ ଏବଂ ଏନସିପି ସହଯୋଗରେ ମହା ବିକାଶ ଆଘାଡି ସରକାର ଚଳାଉଛି। ତେବେ କଂଗ୍ରେସରେ ଅଧ୍ୟକ୍ଷ ସମସ୍ୟାକୁ ନେଇ ଏବେ ଶିବସେନା ମଧ୍ୟ ମୁହଁ ଖୋଲିଛି ।