ମମିତା ହତ୍ୟା ମାମଲା : ସାଲୁଜାଙ୍କ ସାଂଘାତିକ ଅଭିଯୋଗ, ଆପୋଷ ବୁଝାମଣା ପାଇଁ ଚେଷ୍ଟା କରିଥିଲେ ମନ୍ତ୍ରୀ

215

କନକ ବ୍ୟୁରୋ : ବରିଷ୍ଠ ବିଜେପି ନେତା ବିଜୟ ମହାପାତ୍ରଙ୍କ ପରେ, ମନ୍ତ୍ରୀ ଦିବ୍ୟଶଙ୍କର ମିଶ୍ରଙ୍କ ରାୟପୁର ଘର ବାବଦରେ ସାଂଘାତିକ ଅଭିଯୋଗ ଆଣିଛନ୍ତି କଂଗ୍ରେସ ବିଧାୟକ ସନ୍ତୋଷ ସିଂ ସାଲୁଜା । ତାଙ୍କ କହିବା ହେଲା ସେପ୍ଟେମ୍ବର ୨୦ ତାରିଖରେ ମମିତାଙ୍କୁ ରାୟପୁର ନେଇଥିଲେ ଗୋବିନ୍ଦ ସାହୁ । ଆଉ ସେଠାରେ ମନ୍ତ୍ରୀ ଦିବ୍ୟଶଙ୍କର ମିଶ୍ର ଗୋବିନ୍ଦ ଓ ମମିତାଙ୍କ ଭିତରେ ବୁଝାମଣା କରିବାକୁ ଚେଷ୍ଟା କରିଥିଲେ। ଗୃହ ରାଷ୍ଟ୍ରମନ୍ତ୍ରୀ ଦିବ୍ୟଶଙ୍କର ମିଶ୍ରଙ୍କ କୁଲ ହୋମ ଆପାର୍ଟମେଣ୍ଟରେ ଏହି ବୁଝାମଣା କରିବାକୁ ଚେଷ୍ଟା କରଯାଇଥିଲା।

ରାୟପୁର ଯିବା ଲାଗି କଣ୍ଟାବାଞ୍ଜିରୁ ମହାଲିଙ୍ଗ ଯିବା ପାଇଁ ଝିଅକୁ ବସରେ ବସାଇଥିଲେ ମମିତାଙ୍କ ବାପା । ସେଠାରୁ ରାୟପୁରକୁ ନେଇଥିଲେ ଗୋବିନ୍ଦ ସାହୁ । ସେପ୍ଟେମ୍ବର ୨୩ ତାରିଖ ଯାଏଁ ୪ ଦିନ ସେଠାରେ ରହିଥିଲେ ବୋଲି କଂଗ୍ରେସ ବିଧାୟକ ସୂଚନା ଦେଇଛନ୍ତି । ୨୩ରେ ଫେରି ମମିତା କଂଟାବାଞ୍ଜି ଯାଇଥିଲେ । ଆଉ ବୁଝାମଣା ହୋଇନପାରିବାରୁ ଅକ୍ଟୋବର ୭ ତାରିଖରେ ମମିତାଙ୍କ ଆକାଉଂଟକୁ ୮ ହଜାର ଟଙ୍କା ପଠାଇଥିଲେ ଗୋବିନ୍ଦ । ପରଦିନ ଅର୍ଥାତ ୮ ତାରିଖରେ ମମିତାଙ୍କୁ ପୁଣି ଡକାଇ ଅତି ନିର୍ମମ ଭାବେ ହତ୍ୟା କରିଥିଲେ ଗୋବିନ୍ଦ ସାହୁ । ତେଣୁ ରାୟପୁରର କଲ ରେଜିଷ୍ଟରକୁ ସାମ୍ନାକୁ ଅଣାଯଉ ବୋଲି ଦାବି କରିଛନ୍ତି କଂଗ୍ରେସ ବିଧାୟକ ସନ୍ତୋଷ ସିଂ ସାଲୁଜା ।

ସେ ଆହୁରି ମଧ୍ୟ ଅଭିଯୋଗ କରିଛନ୍ତି, ପେନଡ୍ରାଇଭ ଓ ଲାପଟପ ମିଳିଛି, ମାତ୍ର ତାହାର ଖୁଲାସା କରୁ ନାହିଁ ପୁଲିସ । ଏହି ପେନଡ୍ରାଇଭ ଓ ଲାପଟପରେ ଅନେକ ନେତା ମନ୍ତ୍ରୀଙ୍କ ସେକ୍ସ ସ୍କାଣ୍ଡଲ ରହିଛି । ତେଣୁ ପୁଲିସ ଏହାକୁ ଲୁଚାଉଛି । ସୂଚନାଯୋଗ୍ୟ, ପୂର୍ବରୁ ବରିଷ୍ଠ ବିଜେପି ନେତା ବିଜୟ ମହାପାତ୍ର ବି ଏଭଳି ଅଭିଯୋଗ ଆଣିଥିଲେ ।