ବିଧାନସଭା ଆରମ୍ଭରୁ ତାତି । ଦିବ୍ୟଶଙ୍କରଙ୍କୁ ଗୃହ ଭିତରେ ନ ପୂରାଇ ଦେବାକୁ ଫାଟକ ସାମ୍ନାରେ ବସିଲେ କଂଗ୍ରେସ ବିଧାୟକ ।
କନକ ବ୍ୟୁରୋ : ଆଜିଠାରୁ ଆରମ୍ଭ ହୋଇଛି ବିଧାନସଭାର ଶୀତ ଅଧିବେଶନ । ଭିଡ଼ିଓ କନଫରେନ୍ସିଂରେ ମୁଖ୍ୟମନ୍ତ୍ରୀ ନବୀନ ପଟ୍ଟନାୟକ ଅଧିବେଶନରେ ଯୋଗ ଦେଇଥିବା ବେଳେ ଶୋକ ପ୍ରସ୍ତାବ ଆଗତ କରିଛନ୍ତି । ମୁଖ୍ୟମନ୍ତ୍ରୀ ଆଣିଥିବା ଶୋକ ପ୍ରସ୍ତାବକୁ ବିରୋଧୀ ଦଳ ସମର୍ଥନ କରିବା ପରେ ଗୃହକୁ ଦିନ ୫ଟା ଯାଏଁ ମୁଲତବୀ କରାଯାଇଛି । ଅନ୍ୟପଟେ ବିଧାନସଭା ଆରମ୍ଭରୁ ତାତି ଦେଖିବାକୁ ମିଳିଛି । ଗୃହ ବାହାରେ ବିରୋଧୀ କଂଗ୍ରେସ ବିଧାୟକ ବିଧାନସଭାର ଦୁଇଟି ଗେଟରେ ବିକ୍ଷୋଭ ପ୍ରଦର୍ଶନ କରୁଥିବା ବେଳେ ଅନ୍ୟ ଗେଟରେ ତାଲା ପକାଇ ଦେଇଥିଲେ ।
Kanak News is now on WhatsApp
Join and get latest news updates delivered to you via WhatsApp
ମମିତା ହତ୍ୟାକାଣ୍ଡ ଘଟଣାରେ ଗୃହରାଷ୍ଟ୍ରମନ୍ତ୍ରୀଙ୍କ ଇସ୍ତଫା ଦାବି କରି କଂଗ୍ରେସ ବିଧାୟକ ବିଧାନସଭା ଫାଟକ ନିକଟରେ ଧାରଣା ଦେଇଛନ୍ତି । ଏପରିକି ଗୃହ ଭିତରକୁ ମନ୍ତ୍ରୀଙ୍କୁ ପୂରାଇ ନେଦେବାକୁ ଏଭଳି ରାସ୍ତା ଆପଣାଇଥିବା କହିଛନ୍ତି କଂଗ୍ରେସ ବିଧାୟକ । କାରଣ ପବିତ୍ର ଗୃହକୁ ମନ୍ତ୍ରୀ ଦିବ୍ୟ ଶଙ୍କର ଆସିଲେ ଏହା ଅପବିତ୍ର ହୋଇଯିବ ବୋଲି କହିଛନ୍ତି କଂଗ୍ରେସ ବିଧାୟକ ସନ୍ତୋଷ ସିଂ ସାଲୁଜା । ବିଧାନସଭା ମୁଖ୍ୟ ଫାଟକ ସମ୍ମୁଖରେ ଧାରଣାରେ ବସିବା ସହ ରାଜ୍ୟ ସରକାର ଓ ଦିବ୍ୟ ଶଙ୍କରଙ୍କ ବିରୋଧରେ ନାରାବାଜି କରିଛନ୍ତି କଂଗ୍ରେସ ବିଧାୟକ । ତେବେ ଦୁଇଟି ଗେଟରୁ କଂଗ୍ରେସ ବିଧାୟକ ମାନେ ଉଠୁନଥିବା ବେଳେ ଅନ୍ୟ ଗେଟର ତାଲାକୁ ଭାଙ୍ଗିଛନ୍ତି ବିଧାନସଭା କର୍ମଚାରୀ ।
ଏସବୁ ଭିତରେ ଗୃହରେ ଆଜି ପ୍ରଥମ ଦିନରେ ୨୦୨୧-୨୨ ଆର୍ଥିକ ବର୍ଷ ପାଇଁ ଅତିରିକ୍ତ ବଜେଟ ଉପସ୍ଥାପନ କରିବେ ରାଜ୍ୟ ସରକାର । ଅର୍ଥମନ୍ତ୍ରୀ ନିରଞ୍ଜନ ପୂଜାରୀ ବିଧାନସଭାରେ ଅତିରିକ୍ତ ବଜେଟ ଉପସ୍ଥାପନ କରିବେ । ୨୧-୨୨ ଆର୍ଥିକ ବର୍ଷ ପାଇଁ ୧୯ ହଜାର ୩୮୦ କୋଟି ଟଙ୍କାର ଅତିରିକ୍ତ ବଜେଟ ଚିଠା ଆଗତ ହେବ । ଗତ ବର୍ଷ ତୁଳନାରେ ଚଳିତ ବର୍ଷ ଅତିରିକ୍ତ ବଜେଟର ପରିମାଣ ବଢାଯାଇଛି । ବିଶେଷ କରି ପାନୀୟ ଜଳ ଯୋଗାଣ, ପଂଚାୟତିରାଜ, ରାସ୍ତା ବାବଦକୁ ଅଧିକ ବ୍ୟୟ ବରାଦ କରାଯାଇଥିବା ସୂଚନା ମିଳିଛି । ଆଗକୁ ପୌର ଓ ପଂଚାୟତ ନିର୍ବାଚନ ଥିବାରୁ ସରକାର କାମଚଳା ବଜେଟର ପରିମାଣ ବଢାଇଥିବା ଅନୁମାନ କରାଯାଉଛି ।