ବିହାର ପରାଜୟ ପରେ ପଦାରେ କଂଗ୍ରେସର ଅନ୍ତରୀଣ କନ୍ଦଳ । କପିଲ ସିବଲ ଓ ଚିଦାମ୍ବରମଙ୍କ ପରେ ମୁହଁ ଖୋଲିଲେ ଗୁଲାମ ନବୀ ଆଜାଦ । କହିଲେ, ଫାଇଭ ଷ୍ଟାର ହୋଟେଲରୁ ଲଢାଯାଏନି ନିର୍ବାଚନ
କନକ ବ୍ୟୁରୋ : ପଦାରେ ପଡିଲା କଂଗ୍ରେସ କନ୍ଦଳ । ବିହାର ପରାଜୟ ପରେ କଂଗ୍ରେସର କଳି ବଢିବାରେ ଲାଗିଛି । ବରିଷ୍ଠ ନେତାଙ୍କ ଆରୋପ ପ୍ରତ୍ୟାରୋପ ରାଜନୀତି ଉଷ୍ମ ହେଉଛି । ଦଳର ବରିଷ୍ଠ ନେତା କପିଲ ଶିବଲଙ୍କ ପରେ ପି ଚିଦାମ୍ବରମଙ୍କ ପରେ ଏବେ ମୁହାଁ ଖୋଲିଛନ୍ତି ଦଳର ଅନ୍ୟତମ ବରିଷ୍ଠ ନେତା ଗୁଲାମ ନବୀ ଆଜାଦ । ଦଳର ରଣନୀତିକୁ ନେଇ ପ୍ରଶ୍ନ ଉଠାଇଛନ୍ତି । ଫାଇଭ ଷ୍ଟାରରେ ବସି ନିର୍ବାଚନ ଲଢାଯାଏ ନାହିଁ ବୋଲି ସିଧାସଳଖ କହିଛନ୍ତି ଗୁଲାମ ନବୀ ।
Kanak News is now on WhatsApp
Join and get latest news updates delivered to you via WhatsApp
କଂଗ୍ରେସର ଭିଆଇପି କଲଚର ଉପରେ ପ୍ରଶ୍ନ ଉଠାଇବା ସହ ଦଳ ସବୁଠୁ ଦୁର୍ବଳ ସ୍ତରରେ କହିଛନ୍ତି କଂଗ୍ରେସର ଏହି ବରିଷ୍ଠ ନେତା । ତେବେ କଂଗ୍ରେସର ଶୀର୍ଷ ନେତୃତ୍ୱକୁ କ୍ଲିନଚିଟ ଦେଇଥିବା ବେଳେ ବ୍ଲକ ଓ ଜିଲ୍ଲା ସ୍ତରରେ ସାଧାରଣ ଲୋକଙ୍କ ସହ ଦୂରତା ବଢିଥିବା କହିଛନ୍ତି ।
ସେପଟେ ଏହାର ଜବାବ ରଖିଛନ୍ତି ବରିଷ୍ଠ କଂଗ୍ରେସ ନେତା ତାରିକ ଅନୱର । ଦଳର ସମସ୍ୟାକୁ ସର୍ବସାଧାରଣ କଲେ ଏହାର ସମାଧାନ ହେବ ନାହିଁ ବରଂ ସମସ୍ତେ ମିଳିମିଶି ଏନେଇ ଆଲୋଚନା କଲେ ଫଳ ବାହାରିବ ବୋଲି କହିଛନ୍ତି ।
ପୂର୍ବରୁ ଦଳର ବରିଷ୍ଠ ନେତା ପି .ଚିଦାମ୍ବରମ କହିଥିଲେ ଯେ, ନିକଟରେ ସରିଥିବା ନିର୍ବାଚନ ଫଳାଫଳରୁ ଦଳର ଭିତ୍ତିଭୂମି ଓ ତୃଣମୂଳସ୍ତରର ସଙ୍ଗଠନ ଦୁର୍ବଳ ହୋଇପଡିଥିବା ସ୍ପଷ୍ଟ ହୋଇଛି । ଏବଂ ଦଳ ବାରମ୍ବାର ବିପର୍ଯ୍ୟୟର ସମ୍ମୁଖୀନ କାହିଁକି ହେଉଛି, ତାର ତର୍ଜମା କରାଯିବା ଦରକାର ବୋଲି କହିଥିଲେ ପି.ଚିଦାମ୍ବରମ ।
ସେହିପରି କପିଲ ଶିବଲ କହିଥିଲେ ଯେ, କଂଗ୍ରେସ ଦଳ ସଂପ୍ରତି ବିକଳ୍ପ ରାଜନୈତିକ ଶକ୍ତି ଭାବେ ଲୋକଙ୍କ ପସନ୍ଦ ହରାଇଛି । ନିକଟରେ ଶେଷ ହୋଇଥିବା ବିହାର ନିର୍ବାଚନରେ କଂଗ୍ରେସ ଲଢୁଥିବା ୭୦ଟି ଆସନରୁ ମାତ୍ର ୧୯ଟି ଆସନରେ ବିଜୟୀ ହୋଇଥିଲା । ଏହା ସହ ଅନ୍ୟ ରାଜ୍ୟ ହୋଇଥିବା ଉପନିର୍ବାଚନରେ ମଧ୍ୟ କଂଗ୍ରେସ ବିଫଳ ରହିଛି । ଏପରି ସ୍ଥିତିରେ ଦଳୀୟ କନ୍ଦଳ ଏବେ ପଦାରେ ପଡିବାକୁ ଲାଗିଛି ।