ବିଜେଡିର ୭, ବିଜେପିର ୪ ଆଉ କଂଗ୍ରେସର ୩/୧୭ । ମହିଳା ନେତୃତ୍ୱ ଉପରେ କେଉଁ ଦଳର କେତେ ଭରସା?
କନକ ବ୍ୟୁରୋ: ବିଜେଡିର ୭, ବିଜେପିର ୪ ଆଉ କଂଗ୍ରେସର ୧୭ରୁ ୩ । ଆସନ୍ତା ଲୋକସଭା ନିର୍ବାଚନ ପାଇଁ ରାଜ୍ୟର ପ୍ରମୁଖ ଦୁଇଟି ଦଳ ବିଜେଡି, ବିଜେପି ପ୍ରାର୍ଥୀ ଘୋଷଣା କରିସାରିଥିବାବେଳେ, ଏପର୍ଯ୍ୟନ୍ତ ୧୭ଟି ସିଟରେ ପ୍ରାର୍ଥୀ ଘୋଷଣା କରିଛି କଂଗ୍ରେସ । ହେଲେ ତା ଭିତରେ କିନ୍ତୁ ମହିଳା ପ୍ରାର୍ଥୀଙ୍କ ସଂଖ୍ୟା ବିଜେଡିକୁ ଛାଡିଦେଲେ କୌଣସି ଦଳରେ ବି ୩୩ ପ୍ରତିଶତ ଛୁଇଁନି ।
Kanak News is now on WhatsApp
Join and get latest news updates delivered to you via WhatsApp
ପ୍ରତିଶ୍ରୁତି ମୁତାବକ ଏଥର ମଧ୍ୟ ଲୋକସଭା ନିର୍ବାଚନରେ ୩୩ ପ୍ରତିଶତ ମହିଳା ସିଟ୍ ସଂରକ୍ଷଣ କଥା ପାଳନ କରିଛି ବିଜେଡି । ୨୧ ଲୋକସଭା ଆସନରୁ ୭ଟି ସିଟରେ ଦଳ ଦେଇଛି ମହିଳା ଚେହେରା । କୋରାପୁଟ ଆସନ ସହିତ ଆସ୍କା, ଯାଜପୁର, ଜଗତସିଂହପୁର, ଭଦ୍ରକ, ବରଗଡ ଏବଂ ବାଲେଶ୍ୱର ଆସନରେ ଦଳ ମହିଳା ପ୍ରାର୍ଥୀଙ୍କୁ ଭରସା କରିଛି । ତେବେ ଏହା ଭିତରେ ବିଜେଡି କିଛି ପୁରୁମା ମହିଳା ଚେହେରାଙ୍କୁ ପୁଣିଥରେ ଭରସା କରିଥିବାବେଳେ, କିଛି ନୂଆ ଚେହେରାଙ୍କୁ ମଧ୍ୟ ସାମ୍ନାକୁ ଆଣିଛି ।
ଅନ୍ୟପଟେ ବିଜେପି କିନ୍ତୁ ନିଜର ୨୧ ଲୋକସଭା ପ୍ରାର୍ଥୀଙ୍କ ଭିତରେ କେବଳ ୪ ଜଣ ମହିଳାଙ୍କୁ ଟିକେଟ୍ ଦେଇଛି । ଭୁବନେଶ୍ୱରରୁ ଅପରାଜିତା ଷଡଙ୍ଗୀଙ୍କ ସହିତ ବଲାଙ୍ଗୀରରୁ ସଙ୍ଗୀତା ସିଂହଦେଓ, ଆସ୍କାରୁ ଅନୀତା ଶୁଭଦର୍ଶିନୀ ଟିକେଟ୍ ପାଇଛନ୍ତି । ତା ସହିତ କଳାହାଣ୍ଡିରୁ ସାଂସଦ ବସନ୍ତ ପଣ୍ଡାଙ୍କ ଟିକେଟ୍ କାଟି ଦଳ ଏଥର ମାଳବିକା କେଶରୀ ଦେଓଙ୍କ ଉପରେ ଭରସା କରିଛି ।
ସେପଟେ କିନ୍ତୁ କଂଗ୍ରେସ ଏପର୍ଯ୍ୟନ୍ତ ରାଜ୍ୟର ୧୭ଟି ଲୋକସଭା ଆସନ ପାଇଁ ପ୍ରାର୍ଥୀ ଘୋଷଣା କରିଥିବାବେଳେ, ଏହା ଭିତରେ କେବଳ ୩ ଜଣ ମହିଳା ପ୍ରାର୍ଥୀ ରହିଛନ୍ତି । ପୁରୀରୁ ସୁଚରିତା ମହାନ୍ତି, ଢେଙ୍କାନାଳରୁ ସସ୍ମିତା ବେହେରା ଆଉ କଳାହାଣ୍ଡିରୁ ଦ୍ରୌପଦୀ ମାଝୀଙ୍କୁ ଟିକେଟ୍ ଦେଇଛି କଂଗ୍ରେସ । ତେବେ ଆଗକୁ କେବଳ ଆସ୍କା, ମୟୂରଭଞ୍ଜ, କଟକ ଆଉ ସମ୍ବଲପୁର ଆସନ ବାକି ଥିବାରୁ, ଏହି ୪ଟି ଆସନରେ ଦଳ କାହାକୁ ଭରସା କରୁଛି ତାହା ଦେଖିବାକୁ ବାକି ରହିଲା ।