କର୍ଣ୍ଣାଟକ ନ୍ୟାୟରେ ସରକାର ଗଠନ ପାଇଁ ନିଜ ନିଜ ରାଜ୍ୟର ରାଜ୍ୟପାଳଙ୍କ ନିକଟରେ ଦାବି କରିବେ ଗୋଆ କଂଗ୍ରେସ ଓ ବିହାର ଆରଜେଡି । କାରଣ ଏହି ଦୁଇ ରାଜ୍ୟରେ ସବୁଠାରୁ ବଡ ଦଳ ସରକାର ନକରି ଅନ୍ୟ ଦଳଙ୍କ ସହ ମେଂଟ କରି ସରକାର ଗଢିଛି ବିଜେପି ।
Kanak News is now on WhatsApp
Join and get latest news updates delivered to you via WhatsApp
ଏକକ ସଂଖ୍ୟା ଗରିଷ୍ଠ ଦଳ ହୋଇଥିବାରୁ, ବିଜେପିକୁ ସରକାର ଗଠନ ପାଇଁ କର୍ଣ୍ଣାଟକ ରାଜ୍ୟପାଳ ଆମନ୍ତ୍ରଣ କରିବା ପରେ ଦୁଇ ବିରୋଧି ଦଳ କଂଗ୍ରେସ ଓ ଆରଜେଡି, ସରକାର ଗଠନ ପାଇଁ ସେମାନଙ୍କୁ ଆମନ୍ତ୍ରଣ କରିବା ଉଚିତ ବୋଲି ଦାବି କରିଛନ୍ତି । ଏକ ସାମ୍ବାଦିକ ସମ୍ମିଳନୀ କରି ଗୋଆର କଂଗ୍ରେସ ନେତା କହିଛନ୍ତି ସେମାନେ ଗୋଆର ରାଜ୍ୟପାଳଙ୍କୁ ଭେଟି ସରକାର ଗଠନ ପାଇଁ ଦାବି ପତ୍ର ରଖିବେ ।
୪୦ ଆସନ ବିଶିଷ୍ଟ ଗୋଆ ବିଧାନସଭା ନିର୍ବାଚନରେ କଂଗ୍ରେସ ୧୬ଟି ଆସନରେ ବିଜୟୀ ହୋଇ ସବୁଠୁ ବଡ଼ ପାର୍ଟି ଭାବେ ଉଭା ହୋଇଥିଲା । କିନ୍ତୁ ସରକାର ଗଢ଼ିବା ପାଇଁ ଆବଶ୍ୟକୀୟ ସଂଖ୍ୟା ହାସଲ କରିପାରିନଥିଲା । ଯାହାର ଫାଇଦା ଉଠାଇଥିଲା ବିଜେପି । ଅନ୍ୟ ଆଞ୍ଚଳିକ ଦଳକୁ ସାଥୀ କରି ୧୪ଟି ଆସନରେ ବିଜୟୀ ହୋଇଥିବା ବିଜେପି ସରକାର ଗଢ଼ିଥିଲା ।
ସେପଟେ ଏହି ବିବାଦ ଭିତରେ ବିହାରରେ ମଧ୍ୟ ରାଜନୀତି ସରଗରମ ହୋଇଛି । ରାଷ୍ଟ୍ରିୟ ଜନତା ଦଳ ନେତା ତେଜସ୍ୱୀ ଯାଦବ କହିଛନ୍ତି, ବିହାର ବିଧାନସଭା ଭଙ୍ଗ କରିବା ପାଇଁ ତାଙ୍କ ଦଳ ବିହାର ରାଜ୍ୟପାଳଙ୍କୁ ଦାବି ଜଣାଇବ । କାରଣ କର୍ଣ୍ଣାଟକ ନ୍ୟାୟରେ ବିହାରର ତାଙ୍କର ଦଳ ଆରଜେଡି ଏକକ ସଂଖ୍ୟା ଗରିଷ୍ଠ ଦଳ ହୋଇଥିବାରୁ, ସରାର ତାଙ୍କର ହେବା ଉଚିତ ବୋଲି ତେଜସ୍ୱୀ ଯୁକ୍ତି ବାଢିଛନ୍ତି ।
କେବଳ ବିହାର କିମ୍ବା ଗୋଆ ନୁହେଁ ମଣିପୁର ଓ ମେଘାଳୟରେ ମଧ୍ୟ କଂଗ୍ରେସ ରାଜ୍ୟପାଳଙ୍କୁ ଭେଟିବାକୁ ସମୟ ମାଗିଛି । ମଣିପୁରରେ ୬୦ ସିଟ ବିଶିଷ୍ଟ ବିଧାନସଭା ନିର୍ବାଚନରେ କଂଗ୍ରେସ ୨୮ଟି ସିଟରେ ବାଜିମାତ କରିଥିଲା । କିନ୍ତୁ ଅନ୍ୟ ଆଞ୍ଚଳିକ ଦଳର ସମର୍ଥନରେ ୨୧ଟି ସିଟ ଜିତିଥିବା ବିଜେପି ସରକାର ଗଢ଼ିବାକୁ ସକ୍ଷମ ହୋଇଥିଲା । ତେଣୁ କର୍ଣ୍ଣାଟକ ନ୍ୟାୟରେ ବୃହତ ଦଳ ଭାବେ ମଣିପୁରରେ ମଧ୍ୟ ସରକାର ଗଢ଼ିବା ପାଇଁ ଡାକିବାକୁ ଦାବି କରିଛି କଂଗ୍ରେସ ଦଳ ।
କଂଗ୍ରେସକୁ ସବୁଠୁ ବଡ଼ ଝଟକା ଲାଗିଥିଲା ମେଘାଳୟ ନିର୍ବାଚନରେ । ଏଠାରେ କଂଗ୍ରେସ ୨୦ଟି ସିଟ ଜିତି ବଡ଼ ଦଳ ଭାବେ ଉଭା ହୋଇଥିଲେ ମଧ୍ୟ ମାତ୍ର ୨ଟି ସିଟ ଜିତି ଏନପିପି ନେତୃତ୍ୱରେ ସରକାର ଗଢ଼ିଥିଲା ବିଜେପି । ତେବେ ଏସବୁ ଭିତରେ କର୍ଣ୍ଣାଟକ ରାଜନୀତି ସାରା ଦେଶରେ ଚର୍ଚ୍ଚାର ବିଷୟ ପାଲଟିଛି । ଏବେ ଗୋଆ ଓ ବିହାରରେ ରାଜନୀତି କେଉଁ ମୋଡ ନେଉଛି, ତା ଉପରେ ସମସ୍ତଙ୍କ ନଜର ।