ପଶ୍ଚିମବଙ୍ଗ ବିଧାନସଭା ପାଇଁ କଂଗ୍ରେସ-ବାମଦଳ ଭିତରେ ସିଟ୍ ବୁଝାମଣା । ୯୨ ଆସନରେ ଲଢିବ କଂଗ୍ରେସ, ୧୦୧ରେ ବାମଦଳ । ଅନ୍ୟ ସିଟ୍ ପାଇଁ ଆଗାମୀ ବୈଠକରେ ନିଷ୍ପତ୍ତି

କନକ ବ୍ୟୁରୋ: ପଶ୍ଚିମବଙ୍ଗ ବିଧାନସଭା ନିର୍ବାଚନକୁ ଆଉ ମାତ୍ର କେଇ ମାସ ବାକି । ଏହା ପୂର୍ବରୁ କଂଗ୍ରେସ ଓ ବାମଦଳ ଭିତରେ ସିଟ୍ ଭାଗବଣ୍ଟା ଶେଷ ହୋଇଛି । ଆଜି ବସିଥିବା ବୈଠକ ପରେ ୧୯୩ଟି ଆସନରୁ କଂଗ୍ରେସ ୯୨ଟି ଲଢିବାକୁ ସ୍ଥିର ହୋଇଛି । ସେହିପରି ୧୦୧ଟି ସିଟରେ ବାମଦଳର ପ୍ରାର୍ଥୀ ଛିଡା ହେବେ । ବାକି ଆସନ ପାଇଁ କେଉଁ ଦଳ କେତେ ପ୍ରାର୍ଥୀ ଦେବେ ସେନେଇ ଆଗାମୀ ବୈଠକରେ ଜଣାପଡିବ ବୋଲି ସ୍ଥିର ହୋଇଛି ।

ଏହାପୂର୍ବରୁ ୨୦୧୬ ମସିହା ବିଧାନସଭା ନିର୍ବାଚନରେ ମଧ୍ୟ ଦୁଇ ଦଳ ଏକାଠି ହୋଇ ଲଢିଥିଲେ । ଯେଉଁଥିରେ ସିପିଆଇଏମ ୧୪୮ଟି ଆସନରେ ଲଢି ୨୬ଟିରେ ବିଜୟୀ ହୋଇଥିଲା । ସେହିପରି କଂଗ୍ରେସ ୯୨ଟି ଆସନରେ ଲଢି ୪୪ ଆସନ ହାତେଇଥିଲା । ଏହାବାଦ୍ ସେହିବର୍ଷ ଇଲେକ୍ସନରେ ବାମଦଳର ସହଯୋଗୀ ଦଳ ଫରୱାଡ୍ ବ୍ଲକ ୨୫ଟି ଆସନରେ ଲଢି ୨ଟି ବିଜୟୀ ଏବଂ ସିପିଆଇ ୧୧ଟି ଆସନରେ ଲଢି ଗୋଟିଏରେ ବିଜୟୀ ହୋଇଥିଲେ । ଏହାପରେ କଂଗ୍ରେସ ବିଧାନସଭାରେ ମୁଖ୍ୟ ବିରୋଧୀ ଦଳର ମାନ୍ୟତା ପାଇଥିଲା ।

ଏହାପରେ କିନ୍ତୁ କଂଗ୍ରେସ ଓ ବାମଦଳ ଭିତରେମେଣ୍ଟ ଭାଙ୍ଗି ଯାଇଥିଲା । ତେଣୁ ଗତ ୨୦୧୯ ଲୋକସଭା ନିର୍ବାଚନରେ ଦୁଇ ଦଳ ଅଲଗା ହୋଇ ଲଢିଥିଲେ । ଏବେ କିନ୍ତୁ ଦୁଇ ଦଳ ପୁଣି ଏକାଠି ହୋଇ ଲଢିବାକୁ ନିଷ୍ପତ୍ତି ନେଇଛନ୍ତି ।