ମାସ୍କ କିଣା ଦୁର୍ନୀତି ପ୍ରସଙ୍ଗରେ ସରକାରଙ୍କୁ ଘେରିଲେ ବିରୋଧୀ । ସ୍ୱାସ୍ଥ୍ୟମନ୍ତ୍ରୀଙ୍କ ଇସ୍ତଫା ଦାବି କଲା କଂଗ୍ରେସ, ମନ୍ତ୍ରୀଙ୍କୁ ୫ ପ୍ରଶ୍ନ ପଚାରିଲା ବିଜେପି ।
କନକ ବ୍ୟୁରୋ : ରାଜ୍ୟରେ କୋଭିଡ୍ ଉପକରଣ କିଣାକୁ ନେଇ ରାଜନୀତି ଥମିବାର ନାଁ ନେଉନି । କୌଣସି ଦୁର୍ନୀତି ହୋଇନଥିବା ସରକାର ବାରମ୍ବାର ସଫେଇ ଦେବା ପରେ ବି ବିରୋଧୀ, ପ୍ରସଙ୍ଗକୁ ଛାଡିବାକୁ ନାରାଜ । ଆଜି ସ୍ୱାସ୍ଥ୍ୟମନ୍ତ୍ରୀଙ୍କ ଇସ୍ତଫା ଦାବି କରିଛି କଂଗ୍ରେସ । ସେହିପରି ସ୍ୱାସ୍ଥ୍ୟମନ୍ତ୍ରୀଙ୍କୁ ୫ଟି ପ୍ରଶ୍ନ କରିଛି ବିଜେପି ।
Kanak News is now on WhatsApp
Join and get latest news updates delivered to you via WhatsApp
କୋଭିଡ୍ ସାମଗ୍ରୀ କିଣାରେ କୌଣସି ଦୁର୍ନୀତି ହୋଇନଥିବା ନେଇ ସ୍ୱାସ୍ଥ୍ୟମନ୍ତ୍ରୀଙ୍କ ସଫେଇ ପରେ ବି ଏହି ପ୍ରସଙ୍ଗରୁ ଓହରି ନାହାନ୍ତି ବିରୋଧୀ । ବରଂ ଆହୁରି ଶାଣିତ ସ୍ୱରରେ ସରକାରଙ୍କୁ ଟାର୍ଗେଟ କରିଛନ୍ତି ଉଭୟ କଂଗ୍ରେସ ଓ ବିଜେପି । ମାସ୍କ କିଣାରେ କିପରି ବଡ଼ ଧରଣର ଦୁର୍ନୀତି ହୋଇଛି, ସେ ନେଇ ତଥ୍ୟ ଉପସ୍ଥାପନ କରି ସରକାରଙ୍କୁ ଘେରିଛି କଂଗ୍ରେସ ।
ସେପଟେ ସ୍ୱାସ୍ଥ୍ୟମନ୍ତ୍ରୀଙ୍କ ଆଗରେ କିଛି ପ୍ରଶ୍ନ ରଖିଛନ୍ତି ବିଜେପି ନେତା ପୃଥ୍ୱୀରାଜ ହରିଚନ୍ଦନ । ସେ କହିଛନ୍ତି, ମାର୍ଚ୍ଚ ୨୧ ଗେଜେଟ୍ ପରେ କିଛି ରାଜ୍ୟରେ ସମସ୍ୟା ହେବାରୁ ମାର୍ଚ୍ଚ ୨୪ ତାରିଖରେ ୩ ପରସ୍ତ ମାସ୍କର ଦାମ ୧୬ ଟଙ୍କା ଭିତରେ ରଖିବାକୁ ବିଜ୍ଞପ୍ତି ପ୍ରକାଶ କରିଥିଲେ କେନ୍ଦ୍ର ସରକାର । ଏହା ପରେ ଏପ୍ରିଲ ୪ ତାରିଖରେ ୩ ପରସ୍ତ ମାସ୍କର ଦାମ ଅତି ବେଶୀରେ ୧୦ ଟଙ୍କା ରଖି ଟେଣ୍ଡର ଆହ୍ୱାନ କରିଥିଲା ଓଡ଼ିଶା ରାଜ୍ୟ ମେଡିକାଲ କର୍ପୋରେସନ୍ । ହେଲେ ପରବର୍ତ୍ତି ସମୟରେ କିପରି ଅନ୍ୟ ଏକ କଂପାନୀରୁ ୧୬ ଟଙ୍କା ଦେଇ ମାସ୍କ କିଣାଗଲା, ଏ ନେଇ ପ୍ରଶ୍ନ ଉଠାଇଛନ୍ତି ବିଜେପି ନେତା ପୃଥ୍ୱୀରାଜ ହରିଚନ୍ଦନ ।
ବିରୋଧୀଙ୍କ ଏହି ଅଭିଯୋଗକୁ ଶନିବାର ଦିନ ଖଣ୍ଡନ କରିଥିଲେ ସ୍ୱାସ୍ଥ୍ୟମନ୍ତ୍ରୀ । କେନ୍ଦ୍ର ସରକାର ମାସ୍କ କିଣିବା ପାଇଁ ଯେଉଁ ଦର ଧାର୍ଯ୍ୟ କରିଥିଲେ, ସେହି ଅନୁସାରେ କିଣାଯାଇଛି ବୋଲି ଯୁକ୍ତି ଦର୍ଶାଇଥିଲେ ନବ ଦାସ । ଯେଉଁ ଅଫିସରମାନେ କୋଭିଡ୍ ମୁକାବିଲା ପାଇଁ ଦିନରାତି ଏକ କରି କାମ କରିଛନ୍ତି, ସେମାନଙ୍କୁ ପ୍ରଶଂସା କରିବା ପରିବର୍ତେ ନିନ୍ଦା କରିବା କେତେ ସମୀଚୀନ ବୋଲି ପ୍ରଶ୍ନ କରିଥିଲେ ସ୍ୱାସ୍ଥ୍ୟମନ୍ତ୍ରୀ । ସେହିପରି କରୋନା ମୁଖପାତ୍ର ସୁବ୍ରତ ବାଗଚୀ କହିଥିଲେ ଯେ ଅଫିସରଙ୍କ ବିରୋଧରେ ଗୁଜବ ସୃଷ୍ଟି କରାଯାଉଛି । ତେବେ କେଉଁ ପରିସ୍ଥିତିରେ ଅଧିକ ଟଙ୍କା ଦେଇ ମାସ୍କ କିଣାଗଲା, ତା’ର ସନ୍ତୋଷଜନକ ଉତ୍ତର ନମିଳିବା ଯାଏଁ, ଏହି ପ୍ରସଙ୍ଗରେ ରାଜନୀତି ଥମିବା ସମ୍ଭାବନା କମ୍ ।