‘ନିର୍ବାଚନୀ ବଣ୍ଡ’କୁ ନେଇ ବିଜେପିକୁ ଟାର୍ଗେଟ୍ । ଚର୍ଚ୍ଚାରେ କଂଗ୍ରେସର ବିଜ୍ଞାପନ, ଚାନ୍ଦା ଦିଅ, ଧନ୍ଦା ନିଅ!
କନକ ବ୍ୟୁରୋ : ଆଗାମୀ ଲୋକସଭା ନିର୍ବାଚନରେ ‘ଇଲେକ୍ଟୋରାଲ ବଣ୍ଡ’କୁ ପ୍ରମୁଖ ପ୍ରସଙ୍ଗ କରିବାକୁ ସ୍ଥିର କରିଛି କଂଗ୍ରେସ । ନିର୍ବାଚନୀ ବଣ୍ଡ ଜରିଆରେ ମୋଟା ଆକାରରରେ ଚାନ୍ଦା ଆଦାୟ କରିବା ଅଭିଯୋଗରେ ବିଜେପିକୁ ଟାର୍ଗେଟ କରୁଛି କଂଗ୍ରେସ । ଏହାକୁ ନେଇ ଦଳ ପକ୍ଷରୁ ଏକ ବିଜ୍ଞପ୍ତି ମଧ୍ୟ ପ୍ରକାଶ କରାଯାଇଛି । ପ୍ରାୟ ସବୁ ଆଂଚଳିକ ଖବର କାଗଜରେ ପ୍ରକାଶ ପାଇଛି କଂଗ୍ରେସର ଏହି ବିଜ୍ଞାପନ । ଏଥିରେ ଲେଖାଯାଇଛି, ଦୁନିଆର ସବୁଠାରୁ ବଡ ବଟି ବସୁଲି ରାକେଟ୍ । ଚାନ୍ଦା ଦିଅ ଧନ୍ଦା ନିଅ! ଇଲେକ୍ଟୋରାଲ ବଣ୍ଡ ଜରିଆରେ ବିଜେପି ୨ ଜାନୁଆରୀ ୨୦୧୮ରୁ ୧୫ ଫେବ୍ରୁଆରୀ ୨୦୨୪ ମଧ୍ୟରେ ୮ ହଜାର କୋଟିରୁ ଅଧିକ ଚାନ୍ଦା ଆଦାୟ କରିଥିବା ବିଜ୍ଞାପନ ଜରିଆରେ ଟାର୍ଗେଟ କରିଛି କଂଗ୍ରେସ । ଏଥର ଏହି ବସୁଲି ସରକାର ବଦଳାଇ ଦେବାକୁ କଂଗ୍ରେସର ଏହି ବିଜ୍ଞାପନରେ ଉଲ୍ଲେଖ କରାଯାଇଛି ।
Kanak News is now on WhatsApp
Join and get latest news updates delivered to you via WhatsApp
୨୦୧୭ ମସିହାରେ ରାଜନୈତିକ ଦଳଗୁଡିକୁ ଚାନ୍ଦା ପ୍ରଦାନ ପାଇଁ ଏଭଳି ବ୍ୟବସ୍ଥା ବିଜେପି ପ୍ରଚଳନ କରିଥିଲା ଏବଂ ଏହାକୁ ନିର୍ବାଚନୀ ଦାନ ପ୍ରକ୍ରିୟାକ ସ୍ୱଚ୍ଛ କରିବା ପାଇଁ ଏକ ସଂସ୍କାର ବୋଲି ଦର୍ଶାଇଥିଲା ଭାରତୀୟ ଜନତା ପାର୍ଟି । ତେବେ ଏହି ଯୋଜନାର ସମାଲୋଚନା ସତ୍ୱେ କେନ୍ଦ୍ର ସରକାର ଏହା ସପକ୍ଷରେ ଦୃଢୋକ୍ତି ପ୍ରକାଶ କରିଛନ୍ତି । ଏହାସହ ଇଲକ୍ଟୋରାଲ ବଣ୍ଡ ଦ୍ୱାରା ନିର୍ବାଚନ ସମୟରେ କଳାଟଙ୍କାର ପ୍ରଭାବକୁ ରୋକିବାରେ ସହାୟକ ହେଉଥିବା ଯୁକ୍ତି ବାଢିଛନ୍ତି ସରକାର । ହେଲେ କଂଗ୍ରେସ କହିଛି ଏହି ନିର୍ବାଚନୀ ବଣ୍ଡରୁ ବିପୁଳ ପରିମାଣରେ ଚାନ୍ଦା ଆଦାୟ କରିଛି ବିଜେପି ।
ଷ୍ଟେଟ୍ ବ୍ୟାଙ୍କ ଅଫ୍ ଇଣ୍ଡିଆ ୨୧ ମାର୍ଚ୍ଚରେ ନିର୍ବାଚନୀ ବଣ୍ଡ ସଂକ୍ରାନ୍ତିୟ ସମସ୍ତ ତଥ୍ୟ ନିର୍ବାଚନ କମିଶନଙ୍କୁ ପ୍ରଦାନ କରିଛନ୍ତି । ଏହାପରେ ନିର୍ବାଚନ କମିଶନ୍ ଏହାକୁ ସାର୍ବଜନୀନ କରିଛନ୍ତି ।
ଏସବିଆଇର ତଥ୍ୟ ଅନୁସାରେ,
– ମୋଟ ୧୨୬୩ଟି ଇଲେକ୍ଟୋରାଲ ବଣ୍ଡ ବିକ୍ରି ହୋଇଛି
– ବିଜେପିକୁ ୧୦ଟି କମ୍ପାନୀ ୨,୧୨୩ କୋଟି ଟଙ୍କା ଦେଇଛନ୍ତି
– କଂଗ୍ରେସକୁ ୧୦ଟି କମ୍ପାନୀ ୬୧୫ କୋଟି ଟଙ୍କା ଚାନ୍ଦା ଦେଇଛନ୍ତି
ମୋଦୀ ସରକାର ବସୁଲି ରାକେଟ୍ ଚଳାଉଥିବା କହି ବିଜେପିକୁ ଟାର୍ଗେଟ କରିଛି କଂଗ୍ରେସ । ବରିଷ୍ଠ ନେତା ଜୟରାମ ରମେଶ କହିଛନ୍ତି, ଇଲେକ୍ଟୋରାଲ ବଣ୍ଡ ଜରିଆରେ ବିଜେପିକୁ ଦାନ ଦେଇିବା ୨୧ଟି କମ୍ପାନୀ ଏମିତି ଅଛନ୍ତି, ଯେଉଁମାନେ ଇଡି, ସିବିଆ ଓ ଆୟକର ବିଭାଗର ତଦନ୍ତ ପରିସର ଭୁକ୍ତ ହୋଇଥିଲେ । ଚାନ୍ଦା ଦେବା ପରେ ଏହି ତଦନ୍ତ ବନ୍ଦ ହୋଇଯାଇଥିବା କଂଗ୍ରେସ ଅଭିଯୋଗ କରିଛି ।