ଆଜି କଂଗ୍ରେସ ଘୋଷଣା କରିପାରେ ନିର୍ବାଚନ ଇସ୍ତାହାର । ସକାଳ ୧୧ଟାରେ ଦିଲ୍ଲୀସ୍ଥିତ ଦଳୀୟ କାର୍ଯ୍ୟାଳୟରେ ଘୋଷଣା ହୋଇପାରେ ଇସ୍ତାହାର

କନକ ବ୍ୟୁରୋ : ନିର୍ବାଚନ ଯେତିକି ଯେତିକି ପାଖେଇ ଆସୁଛି ରାଜନୈତିକ ପ୍ରତିଶୃତି ମଧ୍ୟ ବଢିବାରେ ଲାଗିଛି । ନିଜ ଦଳ ସପକ୍ଷରେ ଭୋଟରଙ୍କୁ ମନାଇବା ପାଇଁ ନେତାମାନେ ପ୍ରତିଶୃତିର ପାହାଡ ଛିଡା କରୁଛନ୍ତି । କ୍ଷମତାରେ ଥିବା ଦଳ ପୁଣି ଥରେ କ୍ଷମତାକୁ ଆସିବା ପାଇଁ ବିଭିନ୍ନ ପ୍ରତିଶୃତି ଦେଉଛନ୍ତି । ତେବେ କ୍ଷମତାରେ ନଥିବା ରାଜନୈତିକ ଦଳ ଗୁଡିକ ମଧ୍ୟ ଅନେକ ପ୍ରତିଶୃତି ଦେଉଛନ୍ତି । ଯେପରି ଭାବରେ ସେମାନେ ଚଳିତଥର କ୍ଷମତାକୁ ଫେରିବେ ବୋଲି । ତେବେ ମଳିଥିବା ସୂଚନା ଅନୁସାରେ, ଆଜି କଂଗ୍ରେସ ନିଜର ନିର୍ବାଚନୀ ଇସ୍ତାହାର ଘୋଷଣା କରିପାରେ ।

କଂଗ୍ରେସ ଅଧ୍ୟକ୍ଷ ରାହୁଲ ଗାନ୍ଧୀ ଆଜି କିଛି କଂଗ୍ରେସ ଶାସିତ ରାଜ୍ୟର ମୁଖ୍ୟମନ୍ତ୍ରୀଙ୍କ ଉପସ୍ଥିତିରେ ଦଳର ଇସ୍ତାହାର ଘୋଷଣା କରିବେ । ଇସ୍ତାହାର ଘୋଷଣା ପାଇଁ ଦିଲ୍ଲୀସ୍ଥିତ ଦଳୀୟ କାର୍ଯ୍ୟାଳୟରେ ପ୍ରସ୍ତୁତି ମଧ୍ୟ ହୋଇଛି । ଏହି ସମୟରେ କଂଗ୍ରେସ ଅଧ୍ୟକ୍ଷା ରାହୁଲ ଗାନ୍ଧୀ, ୟୁପିଏ ଅଧ୍ୟକ୍ଷା ସୋନିଆ ଗାନ୍ଧୀ, ପୂର୍ବତନ ପ୍ରଧାନମନ୍ତ୍ରୀ ଡ. ମନୋମହନ ସିଂ ଓ ଦଳର ସାଧାରଣ ସମ୍ପାଦକ ପ୍ରିୟଙ୍କା ଗାନ୍ଧୀ ଉପସ୍ଥିତ ରହିବେ ବୋଲି ଜାତୀୟ ଗଣମାଧ୍ୟମରୁ ସୂଚନା ମିଳିଛି । କେବଳ ଏତିକି ନୁହେଁ ଅନେକ କଂଗ୍ରେସ ଶାସିତ ରାଜ୍ୟର ମୁଖ୍ୟମନ୍ତ୍ରୀ ମଧ୍ୟ ଉପସ୍ଥିତ ରହିବେ ।