ତୃତୀୟ ପର୍ଯ୍ୟାୟ ଟିକାକରଣକୁ ନେଇ ଦ୍ୱନ୍ଦ୍ୱ । ପରିବାର କଲ୍ୟାଣ ନିର୍ଦ୍ଦେଶକ କହିଲେ, ମେ ମାସରେ କୋଭିସିଲ୍ଡ ଟିକା ପଂହଚିବା ସମ୍ଭାବନା କ୍ଷୀଣ ।
କନକ ବ୍ୟୁରୋ: ତୃତୀୟ ପର୍ଯ୍ୟାୟ ଟିକାକରଣ ପାଇଁ ଆସନ୍ତାକାଲିଠାରୁ ଆରମ୍ଭ ହେବ ଅନ୍ଲାଇନ୍ ପଞ୍ଜିକରଣ । ଏହି ପର୍ଯ୍ୟାୟରେ ଓଡ଼ିଶାରେ ପ୍ରାୟ ୨ କୋଟି ଯୁବକଙ୍କୁ କରୋନା ଟିକା ଦେବାକୁ ଲକ୍ଷ୍ୟ ଥିବା ବେଳେ ଦେଶରେ ଏହିବର୍ଗରେ ଅଛନ୍ତି ପ୍ରାୟ ୬୫ କୋଟି ଲୋକ । ମେ’ ପହିଲାରୁ ଆରମ୍ଭ ହେଉଥିବା ଟିକାକରଣରେ ୧୮ରୁ ୪୪ ବର୍ଷ ମଧ୍ୟରେ ଯୁବବର୍ଗଙ୍କୁ ସାମିଲ କରାଯାଇଥିବା ବେଳେ ପୂର୍ବ ଦୁଇ ପର୍ଯ୍ୟାୟ ଅପେକ୍ଷା ଏହି ପର୍ଯ୍ୟାୟରେ ବହୁ ଅଧିକ ଲୋକଙ୍କ ଟିକାକରଣ ହେବ । ଆଉ ଠିକ୍ ଏତିକି ବେଳେ ଟିକାକରଣରେ ବିଳମ୍ବ ହେବା ନେଇ ଆଶଙ୍କା ପ୍ରକାଶ ପାଇଛି ଯେତେବେଳେ ପରିବାର କଲ୍ୟାଣ ନିର୍ଦ୍ଦେଶକ କହିଛନ୍ତି- ଟିକା ଆସିଲେ ଟିକାକରଣ ହେବ ।
Kanak News is now on WhatsApp
Join and get latest news updates delivered to you via WhatsApp
ଘରେ ନପଶୁଣୁ ଚାଲ ବାଜିଲା ଭଳି ହୁଏତ, ସ୍ଥିତିଟିଏ ଉପୁଜିବା ପାଇଁ ଯାଉଛି ଯେତେବେଳେ ତୃତୀୟ ପର୍ଯ୍ୟାୟ ଟିକାକରଣ ଆରମ୍ଭ ହେବା ପୂର୍ବରୁ ଟିକାକରଣରେ ବିଳମ୍ବ ହେବାର ଆଶଙ୍କା ପ୍ରକାଶ ପାଇଛି । ଓଡ଼ିଶାକୁ ଟିକା ଆସିବାରେ ବିଳମ୍ବ ହେବାର ଆଶଙ୍କା କରିଛନ୍ତି ପରିବାର କଲ୍ୟାଣ ନିର୍ଦ୍ଦେଶ । ତାଙ୍କ ସୂଚନା ଅନୁସାରେ- କୋଭିଡସିଲ୍ଡ ଟିକା ପହଁଚିବା ସମ୍ଭାବନା କ୍ଷୀଣ । ମେ ମାସ ମଧ୍ୟଭାଗ ସୁଦ୍ଧା କୋଭାକ୍ସିନ ଆସିପାରେ । କିନ୍ତୁ କୋଭିସିଲ୍ଡ ଟିକା ପହଁଚିପାରିବ କି ନାହିଁ କହିହେବ ନାହିଁ । ଏଭଳି ସ୍ଥିତିରେ ଟିକା ଆସିଲେ ଓଡ଼ିଶାରେ ଟିକାକରଣ ହେବ ।
ଏହି ଆଶା-ଆଶଙ୍କା ଭିତରେ ଓଡ଼ିଶାରେ ଯେତିକି ଟିକା ଅଛି, ତାହା ୨ରୁ ୩ଦିନରେ ସରିଯିବ । ସୋମବାର ୫୯୫ଟି କେନ୍ଦ୍ରରେ ଟିକାକରଣ ହୋଇଥିଲା । ଯେଉଁଥିରେ ୮୮ ହଜାର ୭୭୦ ଜଣଙ୍କୁ ଟିକା ଦିଆଯାଇଛି । ମଙ୍ଗଳବାର ୬୦୦ଟି କେନ୍ଦ୍ରରେ ଟିକାକରଣ ହୋଇଛି । ଆଉ ଏସବୁ ଭିତରେ ରାଜ୍ୟରେ ୧ ଲକ୍ଷ ୨୩ ହଜାର କୋଭିସିଲ୍ଡ ଟିକା ଏବଂ ୩ ଲକ୍ଷ ୬୫ ହଜାର କୋଭାକ୍ସିନ୍ ମହଜୁଦ ରହିଛି ।
ଏସବୁ ଭିତରେ ତୃତୀୟ ପର୍ଯ୍ୟାୟ ଟିକାକରଣରେ ଓଡ଼ିଶା ୨ କୋଟି ଯୁବକ-ଯୁବତୀଙ୍କୁ ମାଗଣା ଟିକା ଦେବା ପାଇଁ ଘୋଷଣା କରିଛନ୍ତି ମୁଖ୍ୟମନ୍ତ୍ରୀ । ଆଉ ୩କୋଟି ୭୭ଲକ୍ଷ ଡୋଜ କୋଭିସିଲ୍ଡ ଟିକା ଯୋଗାଇ ଦେବା ପାଇଁ ସେରମ ଇନଷ୍ଟିଚ୍ୟୁଟକୁ ଓଡ଼ିଶା ସରକାର ଚିଠି ଲେଖିଥିବା ବେଳେ ୧୦ଲକ୍ଷ ୩୪ହଜାର କୋଭାକ୍ସିନ୍ ଟିକା ଯୋଗାଇବା ପାଇଁ ଭାରତ ବାୟୋଟେକ୍କୁ ଚିଠି ଲେଖାଯାଇଛି । ଆଉ ଏସବୁ ଭିତରେ ଯଦି ଠିକ୍ ସମୟରେ ଟିକା ନପହଂଚେ ତେବେ ମେ’ ପହିଲାରୁ ସ୍ୱାଭାବିକ ଭାବେ ଟିକାକରଣ କରିବା ନେଇ ଏକ ସନ୍ଦେହ ଦେଖାଦେଇଛି ।