ପ୍ରଥମ ପର୍ଯ୍ୟାୟ ପୂର୍ଣ୍ଣାଙ୍ଗ ପ୍ରାର୍ଥୀ ତାଲିକା ନେଇ ୩ଦଳରେ କନଫ୍ୟୁଜନ୍ । ପ୍ରାର୍ଥୀପତ୍ର ଦାଖଲ ପାଇଁ ହାତରେ ଆଉ ମାତ୍ର ୪୮ ଘଣ୍ଟା
କନକ ବ୍ୟୁରୋ: ଆସନ୍ତା ଏପ୍ରିଲ ୧୧ରେ ପ୍ରଥମ ପର୍ଯ୍ୟାୟ ନିର୍ବାଚନ ପାଇଁ ରାଜ୍ୟର ୪ଟି ଲୋକସଭା ଓ ଏହା ଅଧିନରେ ଥିବା ୨୮ଟି ବିଧାନସଭା କ୍ଷେତ୍ରରେ ମତଦାନ ହେବ । ଯେଉଁଥି ପାଇଁ ରାଜ୍ୟର ପ୍ରମୁଖ ତିନି ଦଳ ପ୍ରାର୍ଥୀ ଘୋଷଣା କରିଛନ୍ତି । କିନ୍ତୁ ୪ ଲୋକସଭା ଏବଂ ୨୮ଟି ବିଧାନସଭା ପାଇଁ ପୂର୍ଣ୍ଣାଙ୍ଗ ପ୍ରାର୍ଥୀ ତାଲିକାକୁ ନେଇ ଏବେ ବିଜେଡି-ବିଜେପି ଓ କଂଗ୍ରେସ ଦଳରେ ଅଙ୍କ ଛିଣ୍ଡୁନି । ଯାହାକୁ ନେଇ ଏବେ ପ୍ରଥମ ପର୍ଯ୍ୟାୟ ନିର୍ବାଚନ ପାଇଁ ଦଳରୁ ଟିକେଟ୍ ପାଇବାକୁଥିବା ଆଶାୟୀଙ୍କ ମଧ୍ୟରେ ଛକାପଞ୍ଝା ଲାଗିରହିଛି । କାରଣ ପ୍ରଥମ ପର୍ଯ୍ୟାୟ ମତଦାନ ପାଇଁ ପୂର୍ବରୁ ଆସନ୍ତା ୨୫ ତାରିଖ ମଧ୍ୟରେ ପ୍ରାର୍ଥୀ ପତ୍ର ଦାଖଲ କରିବାର ଶେଷ ଦିନ ଧାର୍ଯ୍ୟ କରାଯାଇଛି । କିନ୍ତୁ ଏଯାବତ୍ ତିନି ଦଳରେ ଉଭୟ ଲୋକସଭା ଓ ବିଧାନସଭାର ବିଭିନ୍ନ କ୍ଷେତ୍ରକୁ ନେଇ ଦ୍ୱନ୍ଦ ଲାଗି ରହିଛି ।
Kanak News is now on WhatsApp
Join and get latest news updates delivered to you via WhatsApp
ବିଜେଡି ପ୍ରଥମ ପର୍ଯ୍ୟାୟ ନିର୍ବାଚନ ପାଇଁ ୪ଟି ଲୋକସଭା କ୍ଷେତ୍ର ପାଇଁ ପ୍ରାର୍ଥୀ ଚୂଡ଼ାନ୍ତ ତାଲିକା ଦେଇଥିବାବେଳେ ଏଥିମଧ୍ୟରେ ଥିବା ୨୮ଟି ବିଧାନସଭା କ୍ଷେତ୍ରରୁ ୯ଟି ଅସନକୁ ଝୁଲାଇ ରଖିଛି । ସେଥିମଧ୍ୟରେ ରହିଛି- ଲାଞ୍ଜିଗଡ଼, ଝରିଗାଁ, ମାଲକାନଗିରି, ପଟାଙ୍ଗୀ, ବ୍ରଜରାଜନଗର, ବୀରମିତ୍ରପୁର, ବଲାଙ୍ଗୀର, ଲୋଇସିଂହା ଏବଂ ଫୁଲବାଣୀ । ତେବେ ଏହି ସବୁ ଆସନରେ ବିଜେଡି ସୁପ୍ରିମୋ କାହାକୁ ବାଛିବେ ତାକୁ ନେଇ କଳ୍ପନା ଜଳ୍ପନା ଲାଗି ରହିଛି । ଅନ୍ୟପଟେ ନିର୍ବାଚନ କମିଶନଙ୍କ ପୂର୍ବ ଘୋଷଣା ମୁତାବକ, ପ୍ରାର୍ଥୀ ପତ୍ର ନାମାଙ୍କନ ଦାଖଲର ଶେଷ ଦିନ ମାର୍ଚ୍ଚ ୨୫ ତାରିଖ ହୋଇଥିବାବେଳେ କେବେ ଏହି ପ୍ରଥମ ପର୍ଯ୍ୟାୟ ଆସନ ଅଙ୍କ ଛିଣ୍ଡିବ ତାହା ଉପରେ ନଜର ରହିଛି ।
ସେପଟେ କେବଳ ଶାସକ ବିଜେଡି ନୁହେଁ ବିରୋଧୀ ବିଜେପି ଓ କଂଗ୍ରେସରେ ସମାନ ସ୍ଥିତି ଲାଗି ରହିଛି । ନିକଟରେ ରାତି ଅଧିଆ ପ୍ରାର୍ଥୀ ତାଲିକା ଘୋଷଣା କରିଥିବା କଂଗ୍ରେସ ଦଳ ମଧ୍ୟ ପ୍ରଥମ ପର୍ଯ୍ୟାୟର ହେବାକୁଥିବା କୋରାପୁଟ ସଂସଦୀୟ କ୍ଷେତ୍ର ସହ ୯ଟି ବିଧାନସଭା ନିର୍ବାଚନ ମଣ୍ଡଳୀରେ କାହାକୁ ପ୍ରାର୍ଥୀ ଦେବ ସେନେଇ ଅଙ୍କ ଛିଣ୍ଡାଇପାରୁନି । ସେହିଭଳି ଗତକାଲି ବିଜେପି ଘୋଷଣା କରିଥିବା ୧୦ଟି ଲୋକସଭା ଏବଂ ୯୯ ବିଧାନସଭା କ୍ଷେତ୍ର ପାଇଁ ପ୍ରାର୍ଥୀ ତାଲିକାରେ ପ୍ରଥମ ପର୍ଯ୍ୟାୟ ପାଇଁ ୨ଟି ଲୋକସଭା ଆସନରେ ପ୍ରାର୍ଥୀ ଚୂଡ଼ାନ୍ତ ହୋଇପାରିନି । ଏଥି ମଧ୍ୟରେ ରହିଛି- କୋରାପୁଟ ଓ କଳାହାଣ୍ଡି ଭଳି ଚର୍ଚ୍ଚିତ ସଂସଦୀୟ କ୍ଷେତ୍ର । ତେବେ ଆସନ୍ତା ୨୪ ତାରିଖ ଦିନ ଛୁଟି ଦିନଥିବାରୁ ନାମାଙ୍କନ ଦାଖଲ କରିପାରିବେ ନାହିଁ ପ୍ରାର୍ଥୀ । ଆସନ୍ତା କାଲି ଏବଂ ଆସନ୍ତା ସୋମବାର ଦୁଇ ଦିନ ମଧ୍ୟରେ ପ୍ରଥମ ପର୍ଯ୍ୟାୟ ମତଦାନ ପାଇଁ ପ୍ରାର୍ଥୀ ପତ୍ର ଦାଖଲ କରିବାର ସୁଯୋଗ ମିଳିବ । କିନ୍ତୁ ଏବେ ପ୍ରମୁଖ ଦଳମାନଙ୍କରେ ପ୍ରଥମ ପର୍ଯ୍ୟାୟ ପାଇଁ ବିଭିନ୍ନ ଲୋକସଭା ଓ ବିଧାନସଭା କ୍ଷେତ୍ର ଝୁଲି ରହିଥିବାରୁ ଆଶାୟୀଙ୍କ ମଧ୍ୟରେ ଦ୍ୱନ୍ଦ ରହିଥିବା ଦେଖିବାକୁ ମିଳିଛି ।