ଦେଶରେ ପ୍ରଥମ ରାଜ୍ୟ ଭାବେ କରୋନାର ଗୋଷ୍ଠୀ ସଂକ୍ରମଣକୁ ସ୍ୱୀକାର କଲା କେରଳ: ଶୁକ୍ରବାର ରାଜ୍ୟର ୭୯୧ ସଂକ୍ରମିତଙ୍କ ମଧ୍ୟରେ ୫୩୨ ଲୋକାଲ କେସ୍
ଥିରୁବନନ୍ତପୁରମର ଦୁଇଟି ସ୍ଥାନରେ କମ୍ୟୁନିଟି ଟ୍ରାନ୍ସମିଶନ ଆରମ୍ଭ ହୋଇଥିବା କହିଲା ମୁଖ୍ୟମନ୍ତ୍ରୀଙ୍କ କାର୍ଯ୍ୟାଳୟ
କନକ ବ୍ୟୁରୋ: କେରଳ ଆରମ୍ଭ ହେଲାଣି କରୋନାର କମ୍ୟୁନିଟି ଟ୍ରାନ୍ସମିଶନ୍ ବା ଗୋଷ୍ଠୀ ସଂକ୍ରମଣ । ଦେଶରେ ମହାମାରୀ କରୋନାର ସଂକ୍ରମଣ ହୁ ହୁ ହୋଇ ବଢିଚାଲିଛି । କ୍ୱାରେଂଟିନ ସେଂଟରରୁ ନୂଆ ସଂକ୍ରମଣ ମାମଲା ସହ ତାଳଦେଇ ଲୋକାଲ କେସ୍ ବାହାରିବାରେ ଲାଗିଛି । ତଥାପି ଗୋଷ୍ଠୀ ସଂକ୍ରମଣକୁ ଏଯାଏଁ ସ୍ୱୀକାର କରିନାହାନ୍ତି କେନ୍ଦ୍ର ସରକାର । ହେଲେ ପ୍ରଥମଥର କେରଳରେ ଗୋଷ୍ଠୀ ସଂକ୍ରମଣ ଆରମ୍ଭ ହୋଇସାରିଥିବା ସ୍ୱୀକାର କରିଛି କେରଳ ମୁଖ୍ୟମନ୍ତ୍ରୀଙ୍କ କାର୍ଯ୍ୟାଳୟ । ବିଶେଷ କରି ଥିରୁବନନ୍ତପୁରମର ଦୁଇଟି ସ୍ଥାନରେ ଗେଷ୍ଠୀ ସଂକ୍ରମଣ ଆରମ୍ଭ ହୋଇସାରିଥିବା କୁହାଯାଇଛି ।
Kanak News is now on WhatsApp
Join and get latest news updates delivered to you via WhatsApp
ଶୁକ୍ରବାର କେରଳରେ ସର୍ବାଧିକ ୭୯୧ ଜଣ କରୋନା ଆକ୍ରାନ୍ତ ଚିହ୍ନଟ ହୋଇଥିବାବେଳେ ଏମାନଙ୍କ ଭିତରେ ୫୩୨ଟି ଲୋକାଲ କେସ ରହିଛି । ଯେତେବେଳେ ଚିହ୍ନଟ ହେଉଥିବା ଜଣେ କରୋନା ସଂକ୍ରମିତ କାହା ସଂସ୍ପର୍ଷରେ ଆସି ସଂକ୍ରମିତ ହୋଇଛନ୍ତି ତାହା ଜଣାପଡେ ନାହିଁ ତାକୁ ଗେଷ୍ଠୀ ସଂକ୍ରମଣ ବୋଲି କୁହାଯାଉଛି । ଏହାକୁ କରୋନା ସଂକ୍ରମଣର ତୃତୀୟ ଷ୍ଟେଜ ବୋଲି ବିଚାର କରାଯାଏ । ଥିରୁବନନ୍ତପୁରମର ପୁନ୍ଥୁରାରେ କୌଣସି ଲକ୍ଷଣ ନଥିବା ୫୦ ଜଣଙ୍କ ନମୂନା ପରୀକ୍ଷା କରାଯାଇଥିଲା ।
ଏମାନଙ୍କ ମଧ୍ୟରୁ ୨୬ ଜଣ କରୋନା ପଜିଟିଭ ଥିବା ଜଣାପଡିଲ । ସେହିପରି ପୁଲୁଭିଲ୍ଲାରେ ମଧ୍ୟ ୫୭ ଜଣଙ୍କ ନମୂନା ପରୀକ୍ଷାରୁ ୨୮ ଜଣଙ୍କର କରୋନା ପଜିଟିଭ ବାହାରିବା ପରେ କେରଳର କେତେକ ସ୍ଥାନରେ ଗୋଷ୍ଠୀ ସଂକ୍ରମଣ ଆରମ୍ଭ ହୋଇସାରିଥିବା ଆଶଙ୍କା କରାଯାଉଛି । ସବୁଠୁ ବଡକଥା ହେଉଛି କେଳର ମୁଖ୍ୟମନ୍ତ୍ରୀ ପନିରାୟୀ ବିଜୟନଙ୍କ କାର୍ଯ୍ୟାଳୟ ପକ୍ଷରୁ ଏହାକୁ ସ୍ୱୀକାର କରାଯାଇଛି ।