କନକ ବ୍ୟୁରୋ: କଟକରେ କଲେଜ ପଢୁଆ ଯୁବତୀଙ୍କୁ କିରାସିନି ଢାଳି ନିଆଁ ଲଗାଇଦେବା ଘଟଣାରେ ପୋଲିସ ୩ଜଣଙ୍କ ଅଟକ ରଖିଛି । ଅଟକଙ୍କ ଭିତରେ ଅଛନ୍ତି ଆହତ ଯୁବତୀଙ୍କ ସମ୍ପର୍କୀୟ ମାଉସୀ । ଏକତରଫା ପ୍ରେମରୁ ପ୍ରେମିକ ଏପରି କାଣ୍ଡ ଘଟାଇଥିବା ସନ୍ଦେହ କରାଯାଉଛି । ଆହତ ଯୁବତୀଙ୍କ ବାପା ମା ଲାଲବାଗ ଥାନାରେ ଏନେଇ ଏତଲା ଦେବା ପରେ, ସେମାନେ ଯାହାକୁ ସନ୍ଦେହ କରୁଛନ୍ତି ପୋଲିସର ତଦନ୍ତ ଏବେ ସେ ଦିଗରେ ଆଗଉଛି । ସିସିଟିଭି ଫୁଟେଜକୁ ଯାଂଚ କରି ପୋଲିସ ଅପରାଧୀଙ୍କ ପାଖରେ ପହଂଚିବାକୁ ଉଦ୍ୟମ କରୁଛି ।
Kanak News is now on WhatsApp
Join and get latest news updates delivered to you via WhatsApp
କଲେଜ ପଢୁଆ ଯୁବତୀଙ୍କୁ ହାତଗୋଡ ବାନ୍ଧି ନିଆଁ ଲଗାଇବା ପଛର କାରଣ କଣ? ଏନେଇ ପୋଲିସ ତନାଘନା କରୁଥିବା ବେଳେ ବିଶେଷ ସୁତ୍ରରୁ କିଛି ଏମିତି ସୂଚନା ଆସିଛି ଯାହା ଜାଣିଲେ ଆପଣ ଆଶ୍ଚର୍ଯ୍ୟ ହୋଇଯିବେ । ଯୁବତୀଙ୍କୁ ଜାଳିଦେବାକୁ ଉଦ୍ୟମ କରିବା ଘଟଣାରେ ପୋଲିସ ୨ଜଣ ଯୁବକ ଏବଂ ଜଣେ ଯୁବତୀଙ୍କୁ ଅଟକ ରଖିଛି ।
ମିଳିଥିବା ସୂଚନା ଅନୁସାରେ ପ୍ରେମିକ ଜଣଙ୍କୁ ମଧ୍ୟ ପୋଲିସ ଅଟକ ରଖିଛି । ଆହତ ଯୁବତୀଙ୍କ ପରିବାରଲୋକେ ଲାଲବାଗ ଥାନାରେ ଦେଇଥିବା ଏତଲା ଅନୁସାରେ, ଯୁବକ ଜଣଙ୍କ ଏକତରଫା ଭଲ ପାଉଥିଲେ । ଏପିରିକି ଫେସବୁକରେ କିଛି ଫଟୋ ଭାଇରାଲ କରିଥିଲା । କଥା ନଶୁଣିଲେ ଆଗକୁ ଅଧିକ ଭାଇରାଲ କରିବାକୁ ଧମକ ମଧ୍ୟ ଦେଇଥିଲା । ସେହି ପ୍ରେମିକ ଏବଂ ତାର କିଛି ସହଯୋଗୀ ଏହି କାଣ୍ଡ ଘଟାଇଥିବା ଅନୁମାନ କରାଯାଉଛି । କିନ୍ତୁ ଅଟକ ଯୁବକଙ୍କ ବାପା ଏହି ଘଟଣାରେ ସମ୍ପୃକ୍ତି ଅଭିଯୋଗକୁ ଖଣ୍ଡନ କରିଛନ୍ତି ।
ଘରେ କେହି ନଥିବା ବେଳେ ଯୁବତୀଙ୍କୁ ଜାଳିଦେବାକୁ ଉଦ୍ୟମ ହୋଇଥିଲା । ୪ଜଣ ଯୁବକ ଏବଂ ଜଣେ ଯୁବତୀ ମୁଖାପିନ୍ଧି ଏହି କାଣ୍ଡ ଘଟାଇଥିଲେ । ଏମାନଙ୍କୁ ଚିହ୍ନଟ କରିବା ପାଇଁ ପୋଲିସ ଏବେ ସିସିଟିଭି ଫୁଟେଜ ଯାଂଚ କରୁଛି । ଆହତ ଯୁବତୀଙ୍କ ବାପା ମା ଯେଉଁମାନଙ୍କ ଆଡକୁ ସନ୍ଦେହର ଅଙ୍ଗୁଳି ଦେଖାଉଛନ୍ତି ପୋଲିସ ତଦନ୍ତ ଏବେ ସେ ଦିଗରେ ଆଗଉଛି । ଅଟକ ଯୁବତୀ ଜଣଙ୍କ ଆହତ କଲେଜ ପଢୁଆ ଝିଅଙ୍କ ସମ୍ପର୍କିୟ ମାଉସୀ ବୋଲି ପୋଲିସ ଜାଣିବାକୁ ପାଇଛି । ତେବେ ଏହି ଘଟଣାରେ ଆଉ କେଉଁମାନେ ସମ୍ପୃକ୍ତ ଅଛନ୍ତି ସେନେଇ ତନାଘନା ଚଳାଇଛି ପୋଲିସ । ଅତ୍ୟନ୍ତ ନିଷ୍ଠୁର ଭାବେ ୪ଜଣ ଯୁବକ ଏବଂ ଜଣେ ଯୁବତୀ ଏହି କଲେଜ ପଢୁଆ ଝିଅଙ୍କୁ ଜୀବନରେ ମାରିବାକୁ ଷଡଯନ୍ତ୍ର କରିଥିଲେ । ଅଳ୍ପକେ ବର୍ତିଗଲା ଜୀବନ । କିନ୍ତୁ ଏବେ ପୋଲିସ ଅପରାଧୀଙ୍କ ପାଖରେ ପହଂଚିବା ପାଇଁ ସବୁ ବଳ ଲଗେଇ ଦେଇଛି ।