ବିଧାନସଭାରେ ବିବୃତି ରଖିଲେ ମୁଖ୍ୟମନ୍ତ୍ରୀ । କହିଲେ, ଲୋକଙ୍କ ପାଖକୁ ଯାଇ ଅଭିଯୋଗ ଆଣିବାକୁ ସିଏମଓକୁ ନିର୍ଦ୍ଦେଶ ଦେଇଥିଲି, ଏବେ ସୁଦ୍ଧା ୪୩୫୩୬ ଅଭିଯୋଗର ହୋଇଛି ସମାଧାନ ।

କନକ ବ୍ୟୁରୋ : ଜିଲ୍ଲାରୁ ଜିଲ୍ଲା ବୁଲି ସିଏମଓ ଲୋକଙ୍କ ଠାରୁ ଅଭିଯୋଗପତ୍ର ଆଣିଥିବା ବେଳେ ଏହାକୁ ନେଇ ପ୍ରଶ୍ନ ଉଠାଇଥିଲେ ବିରୋଧୀ । ଯେଉଁ ପ୍ରସଙ୍ଗରେ ଆଜି ଗୃହରେ ବିବୃତି ରଖିଛନ୍ତି ମୁଖ୍ୟମନ୍ତ୍ରୀ ନବୀନ ପଟ୍ଟନାୟକ । ଗୃହରେ ନବୀନ କହିଛନ୍ତି, ମୋ ସରକାର ଲୋକଙ୍କ ସମସ୍ୟାକୁ ଗୁରୁତ୍ୱ ଦିଏ । କୋଭିଡ ପୂର୍ବରୁ ଜନ ଶୁଣାଣି ଭୁବନେଶ୍ୱରରେ ହେଉଥିଲା । କିନ୍ତୁ ୨ ବର୍ଷର କୋଭିଡ ସ୍ଥିତି ଏଥିରେ ସମସ୍ୟା ସୃଷ୍ଟି କଲା । ଯେଉଁଥିପାଇଁ ସିଏମଓକୁ ଲୋକଙ୍କ ପାଖରେ ପହଞ୍ଚାଇ ଅଭିଯୋଗର ଶୁଣାଣି କରିବାକୁ ନିଷ୍ପତ୍ତି ନେଇଥିଲି । ଯେଉଁଥିପାଇଁ ସିଏମଓର ଅଧିକାରୀଙ୍କୁ ନିର୍ଦ୍ଦେଶ ଦେଇଥିଲି । ସବୁ ବ୍ଲକ ଓ ସହରାଞ୍ଚଳରେ ପହଞ୍ଚି ସମସ୍ୟା ଶୁଣିବାକୁ କହିଥିଲି । ସମସ୍ତ ଜିଲ୍ଲାରେ ସିଏମଓ ପକ୍ଷରୁ ଜନ ଶୁଣାଣି କରାଯାଇଛି । ୬ ମାସ ମଧ୍ୟରେ ୧୯୦ଟି ସ୍ଥାନରେ ହୋଇଛି ଜନ ଶୁଣାଣି । ଏହି ସମୟରେ ମୋଟ ୫୭୪୪୨ଟି ଅଭିଯୋଗପ୍ରତ ସଂଗ୍ରହ କରାଯାଇଛି । ଯେଉଁମଧ୍ୟରୁ ୪୩୫୩୬ଟି ଅଭିଯୋଗର ସମାଧାନ ହୋଇଛି । ପୂରା ପ୍ରକ୍ରିୟାରେ ସ୍ୱଚ୍ଛତା ଅବଲମ୍ବନ କରାଯାଉଛି ।

ଏହାସହ ବିରୋଧୀ ଯେଉଁ ପ୍ରଶ୍ନ ଉଠାଇଛନ୍ତି ତାହାକୁ ନେଇ ନବୀନ କହିଛନ୍ତି, ଏହି ପୂରା ପ୍ରକ୍ରିୟାରେ ସଚିବ ବନାମ ମନ୍ତ୍ରୀ ପ୍ରସଙ୍ଗ ଉଠୁନାହିଁ । କରୋନା ସମୟରେ ମଧ୍ୟ ସିଏମଓକୁ ପଠାଇ କରୋନା ପରିଚାଳନା କରିଥିଲୁ । କରୋନା ସମୟରେ ସିଏମଓର ଅଧିକାରୀ ଜୀବନକୁ ବାଜି ଲଗାଇ ଜିଲ୍ଲାରୁ ଜିଲ୍ଲା ବୁଲିଥିଲେ ଏବଂ ସେଠାରୁ ମିଳୁଥିବା ମତାମତ ଆଧାରରେ ତୁରନ୍ତ ପଦକ୍ଷେପ ନିଆଯାଇ ପାରୁଥିଲା । ଯାହାଦ୍ୱାରା ହଜାର ହଜାର ଲୋକଙ୍କର ଜୀବନ ବଞ୍ଚି ପାରିଥିଲା ।

ନବୀନ କହିଛନ୍ତି, ବିଭିନ୍ନ ଜିଲ୍ଲାରୁ ଆସୁଥିବା ଅଭିଯୋଗର ସମାଧାନ କ୍ଷେତ୍ରରେ ବିଭାଗୀୟ ମନ୍ତ୍ରୀଙ୍କର ଗୁରୁତ୍ୱପୂର୍ଣ୍ଣ ଭୂମିକା ରହୁଛି । ଗାଣତନ୍ତ୍ରିକ ବ୍ୟବସ୍ଥାରେ ଟିମୱାର୍କ ଜରିଆରେ ଲୋକଙ୍କ ଅଭିଯୋଗର ସମାଧାନ କରିବା ହିଁ ଆମର ମୂଳ ଲକ୍ଷ୍ୟ । ଏହି ଅଭିଯୋଗପତ୍ର ଦାଖଲ କରିବାକୁ ଲୋକେ ଭୁବନେଶ୍ୱର ଆସିଥିଲେ ଖର୍ଚ୍ଚାନ୍ତ ହେବା ସହ ସମୟ ନଷ୍ଟ ହୋଇଥାନ୍ତା । ସିଏମଓ ଏହି ଅଭିଯୋଗପତ୍ର ଗ୍ରାଉଣ୍ଡକୁ ଯାଇ ଗ୍ରହଣ କରିବା ଦ୍ୱାରା ଲୋକଙ୍କ ସମୟ ବଞ୍ଚିବା ସହ ଖର୍ଚ୍ଚାନ୍ତ ହେବାରୁ ବଞ୍ଚିଥିଲେ ।

ସିଏମଓ ଜିଲ୍ଲାରୁ ଜିଲ୍ଲା ଗସ୍ତ ବେଳେ ହେଲିକପ୍ଟର ଖର୍ଚ୍ଚକୁ ନେଇ ମୁଖ୍ୟମନ୍ତ୍ରୀ କହିଛନ୍ତି, ଗତ ସାଢେ ୩ ବର୍ଷ ମଧ୍ୟରେ ହେଲିକପ୍ଟର ଖର୍ଚ୍ଚ ବାବଦକୁ ୪୦ କୋଟି ଟଙ୍କା ଖର୍ଚ୍ଚ ହେଇଛି । ମାସିକ ୧ କୋଟି ୧.୫ କୋଟି ଟଙ୍କା ହେଲିକପ୍ଟର ଯାତ୍ରା ବାବଦକୁ ଖର୍ଚ୍ଚ ହୁଏ । ଗତ ୬ ମାସ ମଧ୍ୟରେ ବି ମାସିକ ସେହି ୧ରୁ ୧.୫ କୋଟି ଟଙ୍କା ଖର୍ଚ୍ଚ ହୋଇଛି । ତେଣୁ ହେଲିକପ୍ଟର ଯାତ୍ରାରେ ଅତ୍ୟଧିକ ଖର୍ଚ୍ଚ ହୋଇଥିବା ଖବର ସମ୍ପୂର୍ଣ୍ଣ ଭ୍ରାନ୍ତ ଓ ଅମୂଳକ ବୋଲି କହିଛନ୍ତି ନବୀନ ।ଯେତିକି ଅଭିଯୋଗପତ୍ର ଗ୍ରହଣ କରାଯାଇଛି ତାହା ଯଦି ସଡକପଥରେ ଯାଇ କରାଯାଇଥାନ୍ତା ତେବେ ଦେଢ ବର୍ଷ ସମୟ ଲାଗିଥାନ୍ତା । କାରଣ ପ୍ରତିଦିନ ୩ରୁ ୫ଟି ସ୍ଥାନରେ ଅଭିଯୋଗପତ୍ର ଗ୍ରହଣ କରାଯାଉଥିଲା ।ଯେହେତୁ ଲୋକଙ୍କ ସୁବିଧା ଦୃଷ୍ଟିରୁ ଦିନ ୧୦ଟାରୁ ୩ଟା ମଧ୍ୟରେ ସଭା ହେଉଥିଲା, ତେଣୁ ସଡକପଥରେ ଯାଇ ୩ରୁ ୫ଟି ସଭା କରିବା ସମ୍ଭବପର ନଥିଲା ।

ନବୀନ କହିଛନ୍ତି, ବିରୋଧୀ ଖୁସି ହେବା କଥା ଯେ ସେମାନଙ୍କ ନିର୍ବାଚନମଣ୍ଡଳୀର ଅନେକ ଅଭିଯୋଗ ଏହା ମଧ୍ୟରେ ସମାଧାନ ହୋଇଛି । ଲୋକଙ୍କ ସମସ୍ୟାର ସମାଧାନକୁ ଜଣେ କିପରି ବି ବିରୋଧ କରିପାରିବ । ଏଥିପାଇଁ ବିରୋଧୀଙ୍କୁ ଲୋକେ ଉଚିତ୍ ଜବାବ ଦେବେ । ଆମେ ସମସ୍ତେ ଜନସେବାରେ ଅଛୁ ତେଣୁୁ ଲୋକଙ୍କ ଅଭିଯୋଗ ଓ ସମସ୍ୟାକୁ ବୁଝିବା ଆମର ପ୍ରାଥମିକତା । କୌଣସି ରାଜନୈତିକ ଉଦ୍ଦେଶ୍ୟ ରଖି ବିରୋଧୀ ଏମିତି କରନ୍ତୁନି ।