ଦିଲ୍ଲୀ ପହଂଚିଲେ ମୁଖ୍ୟମନ୍ତ୍ରୀ ନବୀନ ପଟ୍ଟନାୟକ, ଭଉଣୀ ଗୀତା ମେହଟ୍ଟାଙ୍କ ଅନ୍ତିମ ଦର୍ଶନରେ ହେବେ ସାମିଲ

କନକ ବ୍ୟୁରୋ : ଗତରାତିରେ ମୁଖ୍ୟମନ୍ତ୍ରୀ ନବୀନ ପଟ୍ଟନାୟକଙ୍କ ଭଉଣୀ ଗୀତା ମେହେଟ୍ଟାଙ୍କର ଦିଲ୍ଲୀରେ ମୃତ୍ୟୁ ହୋଇଛି । ତାଙ୍କ ମୃତ୍ୟୁ ଖବର ପାଇବା ପରେ ଆଜି ତାଙ୍କ ଶେଷ ଦର୍ଶନ ପାଇଁ ଭୁବନେଶ୍ୱରରୁ ଯାଇ ଦିଲ୍ଲୀରେ ପହଂଚିଛନ୍ତି ମୁଖ୍ୟମନ୍ତ୍ରୀ ନବୀନ ପଟ୍ଟନାୟକ । ଭଉଣୀଙ୍କ ମୃତ୍ୟୁ ଖବର ପାଇବା ପରେ ମୁଖ୍ୟମନ୍ତ୍ରୀ ଆଜି ସକାଳେ ଏକ ସ୍ୱତନ୍ତ୍ର ବିମାନ ଯୋଗେ ଦିଲ୍ଲୀ ଯାତ୍ରା କରିଥିଲେ । ଏବେ ଏବେ ସେ ଗୀତା ମେହେଟ୍ଟାଙ୍କର ବାସଭବନରେ ପହଂଚିଛନ୍ତି । ସେଠାରେ ସେ ଭଉଣୀଙ୍କ ଶେଷକୃତ୍ତ୍ୟରେ ଯୋଗଦେବେ ।

ଗୀତା ମେହେଟ୍ଟା ପେଶାରେ ଜଣେ ଲେଖିକା ସହ ଜଣେ ସମାଜସେବୀ ଥିଲେ । ସେ ମୁଖ୍ୟମନ୍ତ୍ରୀ ନବୀନ ପଟ୍ଟନାୟକଙ୍କର ବଡ ଭଉଣୀ । ଗତକାଲି ରାତିରେ ୮୦ ବର୍ଷ ବୟସରେ ତାଙ୍କର ପରଲୋକ ହୋଇଛି । ୧୯୪୨ ମସିହାରେ ସେ ଜନ୍ମଗ୍ରହଣ କରିଥିଲେ । ପୂର୍ବତନ ମୁଖ୍ୟମନ୍ତ୍ରୀ ବିଜୁପଟ୍ଟନାୟଙ୍କର ସେ ଏକମାତ୍ର କନ୍ୟା ।