ନବୀନଙ୍କ ଟିକା ଚିଠି । ସବୁ ରାଜ୍ୟର ମୁଖ୍ୟମନ୍ତ୍ରୀଙ୍କୁ ଲେଖିଲେ ଚିଠି, କହିଲେ ଟିକା ପାଇଁ ନ ଲଢି ଲୋକଙ୍କ ଜୀବନ ବଞ୍ଚାଇବାକୁ ଏକାଠି ହୁଅନ୍ତୁ । ଟିକା ସଂକଟ ଦୂର ପାଇଁ ଲୋଡିଲେ ସହମତି । 

କନକ ବ୍ୟୁରୋ : ଟିକାକୁ ନେଇ ସବୁ ରାଜ୍ୟର ମୁଖ୍ୟମନ୍ତ୍ରୀଙ୍କୁ ଚିଠି ଲେଖିଲେ ମୁଖ୍ୟମନ୍ତ୍ରୀ ନବୀନ ପଟ୍ଟନାୟକ । କରୋନା କାଳରେ କେବଳ ଟିକାକରଣ ହିଁ ଲୋକଙ୍କୁ ସୁରକ୍ଷିତ ରଖିପାରିବ । ଟିକାକରଣ ପ୍ରାଥମିକତା ନ ପାଇଲେ କୌଣସି ରାଜ୍ୟ ସୁରକ୍ଷିତ ନୁହେଁ । ଏଭଳି ସ୍ଥଳେ କେନ୍ଦ୍ର ଟିକା ସଂଗ୍ରହ କରି ରାଜ୍ୟ ଗୁଡିକୁ ଯୋଗାଇବାକୁ ଯୁକ୍ତି ପୁଣିଥରେ ଦୋହରାଇଛନ୍ତି ନବୀନ । ଯାହାଦ୍ୱାରା ସମସ୍ତଙ୍କର ଟିକାକରଣ ଅତିଶୀଘ୍ର ହୋଇପାରିବ ।

ଟିକା ପାଇଁ ରାଜ୍ୟ ଗୁଡିକ ପ୍ରତିଯୋଗିତା ନହେଉ । ଲୋକଙ୍କ ସୁରକ୍ଷା ଓ କିଭଳି ସମସ୍ତେ ଟିକା ପାଇବେ ସେ ଉପରେ ଗୁରୁତ୍ୱ ଦିଆଯାଉ । କେନ୍ଦ୍ର ୧୮ ବର୍ଷରୁ ଉଦ୍ଧ୍ୱର୍ ବୟସର ବ୍ୟକ୍ତିଙ୍କୁ ଟିକା ଦେବାକୁ ଘୋଷଣା କରିବା ପରେ ଟିକାର ଯଥେଷ୍ଟ ଚାହିଦା ବଢିଛି । ଏଥିପାଇଁ ଅଧିକାଂଶ ରାଜ୍ୟ ଗ୍ଲୋବାଲ ଟେଣ୍ଡର ଉପରେ ଗୁରୁତ୍ୱ ଦେଇଥିଲେ । କିନ୍ତୁ ବିଦେଶୀ କମ୍ପାନି ଗୁଡିକ ସିଧାସଳଖ କେନ୍ଦ୍ରର କ୍ଲିୟରାନ୍ସ ଚାହୁଁଛନ୍ତି । ଯାହାଦ୍ୱାରା ବିଦେଶ କମ୍ପାନି ଗୁଠିକ ରାଜ୍ୟ ସହ ଟିକା ଚୁକ୍ତି କରିବାକୁ ପଛଘୁଞ୍ଚା ଦେଉଛନ୍ତି । ଏଭଳି ସ୍ଥଳେ ଘରୋଇ ଟିକା ରାଜ୍ୟ ଗୁଡିକ ପାଇଁ ଯଥେଷ୍ଟ ହେଉନାହିଁ । ଟିକାକରଣ ନିୟମରେ ଆବଶ୍ୟକୀୟ ପରିବର୍ତ୍ତନ ପାଇଁ ରାଜ୍ୟ ଗୁଡିକୁ କେନ୍ଦ୍ର ଅନୁମତି ଦେଉ । ସ୍ଥଳ ବିଶେଷରେ ସ୍ଥିତିର ଅନୁଧ୍ୟାନ କରି ନିୟମ କୋହଳ କରି ଟିକା ପାଇଁ ରାଜ୍ୟ ଗୁଡିକୁ ଅନୁମତି ମିଳୁ । ଆଉ ଏଥିପାଇଁ ରାଜ୍ୟ ଗୁଡିକ ଭିତରେ ସହମତି ହେଉ ।

Wrote to all CMs for a consensus on centralised procurement of vaccines by GOI in view of the challenges faced by states. Spoke to some CMs who shared my views. No State is safe unless all States adopt vaccination as a top priority & execute it on war-footing. pic.twitter.com/lMkpjDeYRg

— Naveen Patnaik (@Naveen_Odisha) June 2, 2021

ନବୀନ କହିଛନ୍ତି, ଏ ବାବଦରେ ପୂର୍ବରୁ କେନ୍ଦ୍ର ସରକାରଙ୍କୁ ଚିଠି ଲେଖି ଜଣାଇଛି । ତେଣୁ ଅନ୍ୟ ରାଜ୍ୟ ମାନେ ମଧ୍ୟ ଏ ଦିଗରେ ଆଗେଇ ଆସିଲେ ସମସ୍ୟାର ସମାଧାନ ହୋଇପାରିବ । ତୃତୀୟ ଲହର ଆସିବା ପୂର୍ବରୁ ଆମକୁ ଏ ବାବଦରେ ନିଷ୍ପତି ନେବାକୁ ପଡିବ । ସ୍ୱାଧୀନତା ସଂଗ୍ରାମ ପରେ କରୋନା ସବୁଠାରୁ ବଡ ଆହ୍ୱାନ ଭାବେ ଆମ ଆଗରେ ଛିଡା ହୋଇଛି । କିନ୍ତୁ ବାଦବିବାଦ ଛାଡି ଲୋକଙ୍କ ଜୀବନ ବଞ୍ଚାଇବାକୁ ଏକାଠି ହେବାକୁ ପଡିବ ବୋଲି କହିଛନ୍ତି ନବୀନ ।