ମୋଦି କହିଥିଲେ ଓଡ଼ିଶାରୁ ବିଦା ହେବ ବିଜେଡି । ନବୀନ କହିଲେ, ଓଡ଼ିଶାବାସୀଙ୍କ ଆଶିର୍ବାଦରୁ ବହୁମତ ପାଇଲାଣି ବିଜେଡି, ଶପଥ ଗ୍ରହଣ ଉତ୍ସବରେ ଅତିଥି ଭାବେ ଯୋଗଦେବାକୁ ନିମନ୍ତ୍ରଣ ।

କନକ ବ୍ୟୁରୋ: ବାଲେଶ୍ୱର ରେମୁଣାରୁ ନବୀନଙ୍କ ରଣହୁଙ୍କାର । ମୋଦିଙ୍କୁ ସିଧା ନିଶାନା କଲେ ନବୀନ । ଓଡ଼ିଶାରୁ ବିଜେଡି ବିଦା ହେବା ପ୍ରସଙ୍ଗରେ ପ୍ରଧାନମନ୍ତ୍ରୀଙ୍କୁ କଟାକ୍ଷ କରି ନବୀନ କହିଲେ, “ଗତକାଲି ପ୍ରଧାନମନ୍ତ୍ରୀ ମୋଦି କହିଥିଲେ ଓଡ଼ିଶାରୁ ବିଜେଡି ଗଲାପରେ ସେ ଓଡ଼ିଶାକୁ ଆସିବେ । ତେଣୁ ନବୀନ କହିଛନ୍ତି ପ୍ରଧାନମନ୍ତ୍ରୀ ମୋଦିଙ୍କୁ ନମ୍ରତାର ସହ ନିମନ୍ତ୍ରଣ କରୁଛି ଓଡ଼ିଶା ଆସିବେ । କାରଣ ତୃତୀୟ ପର୍ଯ୍ୟାୟ ଭୋଟ୍ ପରେ ଓଡ଼ିଶାବାସୀଙ୍କ ଆଶୀର୍ବାଦରେ ବିଜେଡି ବହୁମତ ପାଇ ସାରିଲାଣି ତେଣୁ ବିଜେଡି ସରକାର ସପଥ ଗ୍ରହଣ ଉତ୍ସବରେ ଅତିଥିଭାବେ ଯୋଗଦେବାକୁ ମୋଦିଜୀଙ୍କୁ ନମ୍ରତାର ସହ ଅନୁରୋଧ କରୁଛି ।”

ଗତକାଲି ପ୍ରଧାନମନ୍ତ୍ରୀ ନରେନ୍ଦ୍ର ମୋଦି କେନ୍ଦ୍ରାପଡ଼ା ବାରୁଅ ଜନସମାବେଶରେ ନବୀନଙ୍କୁ ନେଇ ଦେଇଥିବା ବୟାନ ଉପରେ ସିଧା ନିଶାନା କରିଛନ୍ତି ସୁପ୍ରିମୋ ନବୀନ ପଟ୍ଟନାୟକ । ଆଉ ନବୀନଙ୍କ ଏଭଳି କଟାକ୍ଷ “ନିମନ୍ତ୍ରଣ” ରାଜ୍ୟ ରାଜନୀତିକୁ ଉଷ୍ମ କରିଛି । କାରଣ ଚତୁର୍ଥ ପର୍ଯ୍ୟାୟ ନିର୍ବାଚନ ତାରିଖ ଯେତେ ନିକଟତର ହେଉଛି ପ୍ରମୁଖ ଦଳର ଶୀର୍ଷ ନେତାଙ୍କ ଲଢ଼େଇ ଏବଂ  ଆରୋପ ପ୍ରତ୍ୟାରୋପ ଘାମାସାନ ହେଉଛି । ଆଉ ଖୁଲମଖୁଲା ପ୍ରତିପକ୍ଷକୁ ଶାଣିତ ଆକ୍ରମଣ କରୁଛନ୍ତି ହେଭିୱେଟ୍ । 

ପୂର୍ବରୁ ମଧ୍ୟ ମୋଦିଙ୍କ ଡବଲ ଇଞ୍ଜିନ୍   ଥିଓରୀକୁ ନେଇ ନବୀନ ମୋଦିଙ୍କୁ ସିଧା ନିଶାନା କରିଥିଲେ । ଏବଂ କହିଥିଲେ ଯେଉଁ ରାଜ୍ୟରେ ବିଜେପି ଡ଼ବଲ ଇଂଜିନ୍ ଲଗାଇଥିଲା ସେଠାରେ କାହିଁକି ହାରିଲା  । ଏପରିକି ଆସନ୍ତା ମେ’ ୨୩  ତାରିଖରେ ମଧ୍ୟ ବିଜେପିର ମେନ୍ ଇଞ୍ଜିନ୍ ଲାଇନଚ୍ୟତ୍ ହେବ କହି ସିଧା ନିଶାନା ବିଜେପି ଶିବିରରେ ଛନକା ଭରିଛି । ଆଉ ଏବେ ମୋଦିଙ୍କୁ ବିଜେଡି ସରକାରଙ୍କ ଶପଥ ଗ୍ରହଣ ଉତ୍ସବକୁ ନିମନ୍ତ୍ରଣ ବୟାନ ସାରା ରାଜନୀତିକୁ ହଟଚମଟ କରିଦେଇଛି ।