ବାଲେଶ୍ୱରରୁ ମୋଦିଙ୍କ ଉପରେ ବର୍ଷିଲେ ନବୀନ । କହିଲେ, ବିପଦରେ ଆସିଲେନି, ନିର୍ବାଚନବେଳେ ଭୋଟ୍ ପାଇଁ ପ୍ରତିଦିନ ଆସୁଛନ୍ତି ମୋଦି ।
କନକ ବ୍ୟୁରୋ: ବାଲେଶ୍ୱର ନିର୍ବାଚନୀ ପ୍ରଚାର ମୈଦାନରୁ ମୋଦିଙ୍କ ଉପରେ ବର୍ଷିଲେ ବିଜେଡି ସୁପ୍ରିମୋ ନବୀନ ପଟ୍ଟନାୟକ । ଜନସଭାରେ ବିଜେପିକୁ ନିଶାନା କରି ନବୀନ କହିଛନ୍ତି କି, ପ୍ରାକୃତିକ ବିପର୍ଯ୍ୟୟ, ଦୁର୍ବିପାକ ହେଲା କିନ୍ତୁ କେନ୍ଦ୍ରୀୟ ନେତାଙ୍କ ଦେଖା ମିଳିଲାନି । ହେଲେ ନିର୍ବାଚନ ସମୟରେ ଭୋଟ୍ ପାଇଁ ଦୌଡ଼ି ଆସି କୁମ୍ଭୀର କାନ୍ଦଣା କାନ୍ଦୁଛନ୍ତି କହି ବିଜେପିକୁ ସମାଲୋଚନା କରିଛନ୍ତି ନବୀନ । ଏପରିକି ପ୍ରତିଥର ଭଳି ‘କାଳିଆ’ ଯୋଜନାକୁ ନେଇ ମଧ୍ୟ ବିଜେପି ଉପରେ ବର୍ଷିଛନ୍ତି ନବୀନ । ଏହି ଯୋଜନାକୁ କେନ୍ଦ୍ରର ବିଜେପି ସରକାର ବନ୍ଦ କରିବାକୁ ଚକ୍ରାନ୍ତ କରିଛି । କିନ୍ତୁ ମୁଁ ଥିବା ଯାଏଁ ଏହି ଯୋଜନାକୁ କେହି ବନ୍ଦ କରିପାରିବେ ନାହିଁ । ସରକାର ଗଠନର ପ୍ରଥମ ଦିନରେ ୨ଟି କିସ୍ତିର ୧୦ ହଜାର ଟଙ୍କା ମିଳିବ ବୋଲି ପ୍ରତିଶ୍ରୁତି ଦେଇଛନ୍ତି ନବୀନ ।
Kanak News is now on WhatsApp
Join and get latest news updates delivered to you via WhatsApp
ସେହିପରି ବାଲେଶ୍ୱରରେ ମେଡ଼ିକାଲ କଲେଜ ହେଲା ଆପଣ ମାନେ ଖୁସି ତ? କିନ୍ତୁ ଏଥିରେ ମଧ୍ୟ କେନ୍ଦ୍ର ସରକାର ପକ୍ଷପାତିତା କରିଛି । ରାଜ୍ୟ ସରକାର ୨୫୦ କୋଟି ଟଙ୍କା ଦେଇଥିବାବେଳେ କେନ୍ଦ୍ର ଦେଇଛି ୧୦୦ କୋଟି । ଆଉ ଜଣେ ଓଡ଼ିଆ କେନ୍ଦ୍ରମନ୍ତ୍ରୀ ଏହି ମେଡ଼ିକାଲ କଲେଜ ନିର୍ମାଣକୁ ବିରୋଧ କରୁଥିଲେ କିନ୍ତୁ ରାଜ୍ୟ ସରକାର ନିଜ ଉଦ୍ୟମରେ ଏହାକୁ ସଫଳ କରାଇଛନ୍ତି । ଏହା କେମିତିକା ହୀନ ରାଜନୀତି ବୋଲି ପ୍ରଶ୍ନ କରିଛନ୍ତି ନବୀନ । ଯାହାର ଜବାବ୍ ଓଡ଼ିଶାବାସୀ ଆଗାମି ଦିନରେ ନିଶ୍ଚିତ ଦେବେ ବୋଲି କହି ବିଜେପିକୁ ଟାର୍ଗେଟ କରିଛନ୍ତି ନବୀନ ।
ସେହିଭଳି ସାଢ଼େ ୪ କୋଟି ଓଡ଼ିଶାବାସୀ ମୋ ପରିବାର ଆଉ ମୁଁ ଆପଣଙ୍କ ସାଥିରେ ସବୁବେଳେ ରହିଛି । ମୋତେ ପୁଣି ଆଶୀର୍ବାଦ କରନ୍ତୁ ମୁଁ ଆପଣଙ୍କ ସେବା କରିଚାଲିଥିବି ବୋଲି ବାଲେଶ୍ୱର ଜନସଭାରେ ରାଜ୍ୟବାସୀଙ୍କୁ ଅନୁରୋଧ କରିଛନ୍ତି ବିଜେଡି ସୁପ୍ରିମୋ ନବୀନ ପଟ୍ଟନାୟକ । ଏହାସହ ବାଲେଶ୍ୱର ସାଂସଦ ରବିନ୍ଦ୍ର ଜେନା ଏବଂ ଭୋଗରାଇ ବିଜେଡି ବିଧାୟକ ପ୍ରାର୍ଥୀ ଅନନ୍ତ ଦାସଙ୍କ ପାଇଁ ଭୋଟ୍ ଭିକ୍ଷା କରିଛନ୍ତି ନବୀନ ।