ଦକ୍ଷିଣରୁ ଦିଲ୍ଲୀ ସରଗରମ ରାଜନୀତି, କେସିଆରଙ୍କ ନେତୃତ୍ୱରେ ଏକାଠି ହେଲେ ଅଣ କଂଗ୍ରେସ ଓ ଅଣ ବିଜେପି ନେତା
କନକ ବ୍ୟୁରୋ : ତେଲେଙ୍ଗାନାର ଶାସକ ଦଳ ତେଲେଙ୍ଗାନା ରାଷ୍ଟ୍ର ସମିତି ବା ଭାରତ ରାଷ୍ଟ୍ର ସମିତିର ମେଗା ରାଲି । ଦଳର ନାମ ପରିବର୍ତନ ହେବା ପରେ ପ୍ରଥମ ଥର ପାଇଁ ତେଲେଙ୍ଗାନା ମୁଖ୍ୟମନ୍ତ୍ରୀ କେସିଆରଙ୍କ ନେତୃତ୍ୱରେ ଖମ୍ମାମରେ ମେଗା ରାଲି ହୋଇଛି । ଏହା ପୂର୍ବରୁ ୟାଦଗିରିଗୁଟା ମନ୍ଦିରରେ ମୋଦୀ ବିରୋଧୀ ଏକାଠି ହୋଇଛନ୍ତି । ଏହି ମନ୍ଦିରକୁ ୧୨୦୦ କୋଟି ଟଙ୍କା ଖର୍ଚ୍ଚ କରି ପୁନରୁଦ୍ଧାର କରିଛନ୍ତି କେସିଆର ସରକାର । ଏପରି କରି ହିନ୍ଦୁତ୍ୱ କାର୍ଡ ଖେଳି ବିଜେପିର ଭୋଟ୍ ବ୍ୟାଙ୍କକୁ ଟାର୍ଗେଟ କରିଛନ୍ତି କେସିଆର । ମେଗା ରାଲି ଜରିଆରେ ଦକ୍ଷିଣରୁ ଦିଲ୍ଲୀକୁ ୨୦୨୪ ସାଧାରଣ ନିର୍ବାଚନ ପୂର୍ବରୁ କେସିଆର ବଡ ବାର୍ତା ପଠାଇବାକୁ ପ୍ରୟାସ କରିଛନ୍ତି । ଏହି ରାଲିରେ ଆପ୍ ନେତା ତଥା ଦିଲ୍ଲୀ ମୁଖ୍ୟମନ୍ତ୍ରୀ ଅରବିନ୍ଦ କେଜ୍ରିୱାଲ, ପଂଜାବ ମୁଖ୍ୟମନ୍ତ୍ରୀ ଭଗୱନ୍ତ ମାନ୍, ସମାଜବାଦୀ ପାର୍ଟି ଅଖିଳେଶ ଯାଦବ, କେରଳ ମୁଖ୍ୟମନ୍ତ୍ରୀ ପିନରାୟ ବିଜୟନ ଏବଂ ସିପିଆଇ ନେତା ଡି. ରାଜା ସାମିଲ ହୋଇଥିଲେ । ବିଜେପିର ଜାତୀୟ କାର୍ଯ୍ୟକାରିଣୀ ବୈଠକରେ ୪୦୦ ଦିନର ଟାର୍ଗେଟ ପ୍ରଧାନମନ୍ତ୍ରୀ ଦେବା ପରେ ଏହି ମେଗା ରାଲି ହୋଇଛି । ଅଖିଳେଶ ମଧ୍ୟ ଏହାକୁ ନେଇ ଜୋରଦାର ବର୍ଷିଛନ୍ତି । କେସିଆର ମୋଦୀ ବିରୋଧୀଙ୍କୁ ଏକାଠି କରି ଦିଲ୍ଲୀରେ ବିଜେପିକୁ କ୍ଷମତାଚ୍ୟୁତ ପାଇଁ ହୁଙ୍କାର ଦେଇଛନ୍ତି ।
Kanak News is now on WhatsApp
Join and get latest news updates delivered to you via WhatsApp
ବିରୋଧୀ ରାଲିରେ ରୋଜଗାର ପାଖରୁ ଆରମ୍ଭ କରି ବିଭିନ୍ନ ରାଜ୍ୟରେ ରାଜ୍ୟପାଳ ଏବଂ ସରକାର ମଧ୍ୟରେ ଚାଲିିଥିବା ବିବାଦ କଥା ଉଠାଇଛନ୍ତି । ପଞ୍ଜାବ ମୁଖ୍ୟମନ୍ତ୍ରୀ ଭଗୱନ୍ତ ମାନ କହିଛନ୍ତି ଯେ ଦେଶର ଯୁବକମାନେ ଚାକିରି ଚାହୁଁଛନ୍ତି । ଏ ଦେଶ ରୋଜଗାର ଚାହୁଁଛି, ଯୁବକମାନେ ବେକାର ଅଛନ୍ତି । ସେହିପରି ବିଜେପିକୁ ଭାରତୀୟ ଜୁମଲା ପାର୍ଟି କହି କଟାକ୍ଷ କରିଛନ୍ତି ।
ଅନ୍ୟପଟେ ବିଜେପି ମଧ୍ୟ ତେଲେଙ୍ଗାନାରେ ଗଡ ମଜବୁତ ପାଇଁ ପ୍ରୟାସ କରିଛି । ଫେବୃଆରୀରୁ ବିଭିନ୍ନ ଶକ୍ତି କେନ୍ଦ୍ରରେ ୧୧ ହଜାର ରାଲି ଆରମ୍ଭ କରିବାକୁ ଯାଉଛି । ତେଲେଙ୍ଗାନାରେ ପୌର ନିର୍ବାଚନରେ ଏବଂ ସହର ଗୁଡିକରେ ବିଜେପିର ଭୋଟ୍ ବ୍ୟାଙ୍କ ବଢିଛି । ଗତବର୍ଷ ନିଜେ ପ୍ରଧାନମନ୍ତ୍ରୀ ମଧ୍ୟ ୪ ଥର ତେଲେଙ୍ଗାନା ଗସ୍ତରେ ଆସିଥିଲେ ।