ଲାଲଗ୍ରହରୁ ଆସିଲା ଭସା ମେଘର ଦୃଶ୍ୟ । ରାତିରେ ବି ଚମକୁଛି ଲାଲ ଗ୍ରହର ମେଘ । ନାସାର କ୍ୟୁରୋସିଟି ରୋଭର ଉଠାଇଥିବା ଭିଡିଓ ସୋସିଆଲ ମିଡିଆରେ ଭାଇରାଲ ।
କନକ ବ୍ୟୁରୋ: ଲାଲଗ୍ରହରୁ ଆସିଲା ଭସା ମେଘର ଭିଡିଓ । ପୃଥିବୀ ଭଳି ମଙ୍ଗଳଗ୍ରହରେ ଭାସୁଛି ମେଘ । ମଙ୍ଗଳଗ୍ରହରେ ଏକ ଭିଡିଓ ଏବେ ସୋସିଆଲ ମିଡିଆରେ ଭାଇରାଲ ହେବାରେ ଲାଗିଛି । ଯେଉଁଥିରେ ମେଘ ଭାସୁଥିବାର ଦେଖିବାକୁ ମିଳୁଛି । ତେବେ ଏହା ଫେକ ଭିଡିଓ ନୁହେଁ ବରଂ ଆମେରିକାର ମହାକାଶ ଗବେଷଣା ନାସାର କ୍ୟୁରୋସିଟି ରୋଭର ଉଠାଇଥିବା ଫଟୋର ଭିଡିଓ ।
Kanak News is now on WhatsApp
Join and get latest news updates delivered to you via WhatsApp
କେମିତି ପ୍ରସ୍ତୁତ ହେଲା ମଙ୍ଗଳ ଗ୍ରହର ଭିଡିଓ?
୨୦୧୨ ମସିହାରେ ମଙ୍ଗଳଗ୍ରହକୁ ନାସା ପଠାଇଥିବା କ୍ୟୁରୋସିଟି ରୋଭର ନେଭିଗେସନ କ୍ୟାମେରାରେ ଉଠାଇଥିବା ଅଲଗା ଅଲଗା ୮ଟି ଦୃଶ୍ୟରୁ ଏହି ଭିଡିଓ ପ୍ରସ୍ତୁତ ହୋଇଛି । ଯାହାକୁ ଟୁଇଟରରେ ସେୟାର କରିଛନ୍ତି ନର୍ଥ କ୍ୟାରୋଲିନା ଷ୍ଟେଟ ୟୁନିର୍ଭସିଟିର ବୈଜ୍ଞାନିକ ପାଲ ବାର୍ଣ୍ଣେ । ମଙ୍ଗଳଗ୍ରହର ପୃଷ୍ଠରୁ ଏହି ଭସା ମେଘ ଏତେ ଉଚ୍ଚରେ ରହିଛି ଯେ ରାତିରେ ମଧ୍ୟ ସୂର୍ଯ୍ୟ କିରଣରେ ଚମକୁଛି । ଏହା ପୃଥିବୀର ବାଦଲ ଭଳି ଦେଖାଯାଉଥିଲେ ମଧ୍ୟ ସମାନ ନୁହେଁ । ରିପୋର୍ଟ କହୁଛି ଦୁଇ ଗ୍ରହର ବାୟୁମଣ୍ଡରେ ବିଶେଷ ପାର୍ଥକ୍ୟ ରହିଛି ।
ବାୟୁମଣ୍ଡଳରେ କ’ଣ ରହିଛି ପାର୍ଥକ୍ୟ?
ମଙ୍ଗଳ ଗ୍ରହ ଓ ପୃଥିବୀର ବାୟୁମଣ୍ଡଳରେ ବିଶେଷ ପାର୍ଥକ୍ୟ ରହିଛି । ମଙ୍ଗଳ ଗ୍ରହର ବାୟୁ ମଣ୍ଡଳ ପୃଥିବୀର ବାୟୁମଣ୍ଡଳ ତୁଳନାରେ ବହୁତ ପତଳା । ୟୁରୋପୀୟ ସ୍ପେଶ ଏଜେନ୍ସୀ ଅନୁସାରେ ପୃଥିବୀର ବାୟୁ ମଣ୍ଡଳରେ ନାଇଟ୍ରୋଜେନ ଓ ଅକ୍ସିଜେନ ଅଧିକ ରହିଛି । କିନ୍ତୁ ମଙ୍ଗଳ ଗ୍ରହର ବାୟୁ ମଣ୍ଡଳରେ କାର୍ବନଡାଇଅକ୍ସାଇଡ ବା ଅଙ୍ଗାରକାମ୍ଲର ମାତ୍ରା ଅଧିକ ।
ମଙ୍ଗଳ ଗ୍ରହରେ କେମିତି ହୁଏ ମେଘର ସୃଷ୍ଟି
ପୃଥିବୀରେ ଛୋଟ ଛୋଟ ଜଳ କଣିବା ଘନୀଭୂତ ହୋଇ ବାୟୁରେ ଉପରକୁ ଯାଇ ବିଶେଷ ପରିବେଶରେ ମେଘ ସୃଷ୍ଟି ହୋଇଥାଏ । ହେଲେ ମଙ୍ଗଳ ଗ୍ରହରେ ମହାକାଶରୁ ଆସିଥିବା ଧୂଳିକଣା ଯୋଗୁଁ ମେଘ ସୃଷ୍ଟି ହେ୍ଉଥିବା କହୁଛନ୍ତି ବୈଜ୍ଞାନିକ । ତେବେ ମଙ୍ଗଳଗ୍ରହରେ ଉଡୁଥିବା ମେଘର ଅଣୁ ଜଳକଣିକା ନୁହେଁ ଅଙ୍ଗାରକାମ୍ଳର । ଏହାଛଡା ଲାଲଗ୍ରହର ପତଳା ବାୟୁ ମଣ୍ଡଳ ଯୋଗୁଁ ମେଘ ଭାସିଥାଏ ବୋଲି ମହାକାଶ ବିଜ୍ଞାନୀ କହିଛନ୍ତି ।