କେମିତି ହେବ ମାଟ୍ରିକ ପରୀକ୍ଷା? ସମାଲୋଚନା ପରେ ମାଟ୍ରିକ ପରୀକ୍ଷା ଫର୍ମ ପୂରଣ ସ୍ଥଗିତ ରଖିଲା ମାଧ୍ୟମିକ ଶିକ୍ଷା ପରିଷଦ; ସ୍କୁଲ ଖୋଲିବା ପରେ ନିଆଯିବ ନିଷ୍ପତି
ଅନିଶ୍ଚିତତା ଭିତରେ ସାଢ଼େ ୬ ଲକ୍ଷ ଛାତ୍ରଛାତ୍ରୀଙ୍କ ଭବିଷ୍ୟତ
କନକ ବ୍ୟୁରୋ: ମହାମାରୀ କରୋନା ଯୋଗୁଁ ମାଟ୍ରିକ ପରୀକ୍ଷା ଦେବାକୁ ଥିବା ଲକ୍ଷ ଲକ୍ଷ ଛାତ୍ରଛାତ୍ରୀଙ୍କ ଭବିଷ୍ୟତ ଦ୍ୱନ୍ଦ୍ୱ ଭିତରକୁ ଠେଲି ହୋଇ ଯାଇଛି । ଏସବୁ ଭିତରେ ପାଠପଢ଼ା ହୋଇନଥିବାରୁ ୨୦୨୧ ମାଟ୍ରିକ୍ ପରୀକ୍ଷା ଫର୍ମ ପୂରଣ ପ୍ରକ୍ରିୟାକୁ ସ୍ଥଗିତ ରଖିଛନ୍ତି ସରକାର । ଏନେଇ ମାଧ୍ୟମିକ ଶିକ୍ଷା ପରିଷଦ ପକ୍ଷରୁ ନୂଆ ବିଜ୍ଞପ୍ତି ପ୍ରକାଶ ପାଇଛି । ତେବେ କେବେ ଫର୍ମ ପୂରଣ, ସେନେଇ ପରବର୍ତୀ ସମୟରେ ବିଜ୍ଞପ୍ତି ପ୍ରକାଶ ପାଇବ । ୨୦୨୧ ମାଟ୍ରିକ୍ ପରୀକ୍ଷା ପାଇଁ ୯ ତାରିଖରୁ ଫର୍ମ ପୂରଣ କରିବାକୁ ପ୍ରକାଶ ପାଇଥିଲା ବିଜ୍ଞପ୍ତି । କରୋନା ଯୋଗୁଁ ଚଳିତ ବର୍ଷ ଦିନଟିଏ ସ୍କୁଲ ଖୋଲିନଥିବା ବେଳେ, ଏପରି ବିଜ୍ଞପ୍ତିକୁ ନେଇ ଚାରିଆଡୁ ସମାଲୋଚନା କରାଯାଇଥିଲା । ଏପରିକି ଓଡିଶା ମାଧ୍ୟମିକ ସ୍କୁଲ ଶିକ୍ଷକ ସଂଘ ‘ଓଷ୍ଟା’ ମଧ୍ୟ ଏହାକ୍ୁ ବିରୋଧ କରିଥିଲା ।
Kanak News is now on WhatsApp
Join and get latest news updates delivered to you via WhatsApp
ଏହାପରେ ଫର୍ମ ପୂରଣ ପାଇଁ ଦିଆଯାଇଥିବା ବିଜ୍ଞପ୍ତି ପ୍ରତ୍ୟାହାର ପାଇଁ ନିର୍ଦେଶ ଦେଇଥିଲେ ଗଣଶିକ୍ଷା ମନ୍ତ୍ରୀ ସମୀର ରଂଜନ ଦାଶ । ମନ୍ତ୍ରୀଙ୍କ ନିର୍ଦ୍ଦେଶ ପରେ ଫର୍ମ ପୂରଣ ସ୍ଥଗିତ ନେଇ ନୂଆ ବିଜ୍ଞପ୍ତି ପ୍ରକାଶ କରିଛି ମାଧ୍ୟମିକ ଶିକ୍ଷା ପରିଷଦ । ତେବେ କେବେ ଫର୍ମ ପୂରଣ ହେବ, ଏ ନେଇ ବିଦ୍ୟାଳୟ ଓ ଗଣଶିକ୍ଷା ବିଭାଗର ପରାମର୍ଶ କ୍ରମେ ପରବର୍ତୀ ନିଷ୍ପତି ନିଆଯିବ ବୋଲି ମାଧ୍ୟମିକ ଶିକ୍ଷା ପରିଷଦ ପକ୍ଷରୁ କୁହାଯାଇଛି ।
କରୋନା ସଂକଟ ଭିତରେ ସିବିଏସଇ ପକ୍ଷରୁ ଦଶମ ଶ୍ରେଣୀ ଛାତ୍ର ଛାତ୍ରୀଙ୍କ ଫର୍ମ ଫିଲପ କରାଯିବା ସହ ଅନ୍ଲାଇନ୍ କ୍ଲାସରେ ପିଲାଙ୍କ ପାଠପଢ଼ା ଚାଲିଛି । ଏପଟେ କିନ୍ତୁ ଓଡ଼ିଶାର ମାଧ୍ୟମିକ ଶିକ୍ଷା ପରିଷଦ ଅଧୀନରେ ଥିବା ସ୍କୁଲଗୁଡିକରେ ଚଳିତ ଶିକ୍ଷାବର୍ଷର ପାଠପଢ଼ା ଗୁରୁତର ବାଧାପ୍ରାପ୍ତ ହୋଇଛି । ନା’ ଅନଲାଇନ କ୍ଲାସ ଠିକ୍ ଭାବେ ହୋଇପାରୁଛି, ନା’ ସ୍କୁଲ ଖୋଲିବା ନେଇ ସରକାର କିଛି ନିଷ୍ପତି ନେଇ ପାରୁଛନ୍ତି । ଗୋଟିଏ ପଟେ ପିଲାଙ୍କ ପାଠପଢ଼ା, ଅନ୍ୟପଟେ କରୋନା ସଂକ୍ରମଣ । ଏହାକୁ ନେଇ ଦ୍ୱନ୍ଦ୍ୱ ଭିତରେ ପଡିଛନ୍ତି ସରକାର । ଏପଟେ ପାଠପଢ଼ା କିପରି ହେବ, ପରୀକ୍ଷା କିପରି ହେବ ଏ ନେଇ ରାଜ୍ୟ ସରକାରଙ୍କ ନିକଟରେ କିଛି ପ୍ରସ୍ତାବ ରଖିଛି ଅଭିଭାବକ ସଂଘ ।
• ଅଭିଭାବକ ସଂଘର ପ୍ରସ୍ତାବ
• ୨୦୨୧ ଜାନୁୟାରୀ ପ୍ରଥମ ସପ୍ତାହରୁ ନବମରୁ ଦ୍ୱାଦଶ ଶ୍ରେଣୀ ପର୍ଯ୍ୟନ୍ତ କ୍ଲାସ କରାଯାଉ
• ଜୁଲାଇରେ ପରୀକ୍ଷା ଓ ଅଗଷ୍ଟରେ ପରୀକ୍ଷା ଫଳ ପ୍ରକାଶ ପାଉ
• ସେପ୍ଟେମ୍ବରରେ ପରିବର୍ତ୍ତୀ ଶିକ୍ଷାବର୍ଷ ଆରମ୍ଭ ହେଉ
• ବିନା ପରୀକ୍ଷାରେ ପ୍ରଥମରୁ ଅଷ୍ଟମ ପର୍ଯ୍ୟନ୍ତ ଶ୍ରେଣୀ ପ୍ରମୋସନ୍ ଦିଆଯାଉ
କରୋନା ଯୋଗୁଁ ମାଟ୍ରିକ ପରୀକ୍ଷା ଦେବାକୁ ଥିବା ପ୍ରାୟ ସାଢ଼େ ୬ ଲକ୍ଷ ଛାତ୍ର/ଛାତ୍ରୀଙ୍କ ଭବିଷ୍ୟତକୁ ନେଇ ଦ୍ୱନ୍ଦ୍ୱ ସୃଷ୍ଟି ହୋଇଛି । ସେପଟେ ସ୍କୁଲ ଖୋଲିବାର ଚୂଡ଼ାନ୍ତ ତାରିଖ ଘୋଷଣା ପରେ ମାଟ୍ରିକ ଫର୍ମ ଫିଲପ୍ ନେଇ ବିଜ୍ଞପ୍ତି ପ୍ରକାଶ ପାଇବ ବୋଲି ସୂଚନା ମିଳିଛି । ମିଳିଥିବା ସୂଚନା ଅନୁଯାୟୀ, କରୋନା ସଂକ୍ରମଣକୁ ଦୃଷ୍ଟିରେ ରଖି ପାଠ୍ୟକ୍ରମ କାଟଛାଂଟ କରି ନୂଆ ଢାଂଚାରେ ପରୀକ୍ଷା କରିବାକୁ ଯୋଜନା କରିଛି ମାଧ୍ୟମିକ ଶିକ୍ଷା ପରିଷଦ ।