ଖେଳ ଛୁଟିରେ ଅଘଟଣ : ସୂଚନା ଫଳକ ପଡି ପ୍ରଥମ ଶ୍ରେଣୀ ଛାତ୍ରଙ୍କ ମୃତ୍ୟୁ

କନକ ବ୍ୟୁରୋ : ଖେଳ ଛୁଟିରେ ଅଘଟଣ । ରାସ୍ତା କାମର ଫଳକ ଖସି ପ୍ରଥମ ଶ୍ରେଣୀ ଛାତ୍ରଙ୍କ ମୃତ୍ୟୁ । ଭଦ୍ରକ ଜିଲ୍ଲା ଧାମନଗର ବ୍ଲକ ଉଚ୍ଚପଦା ଗାଁରେ ଘଟିଛି ଏହି ଅଘଟଣ । ମୃତ ଛାତ୍ର ହେଉଛନ୍ତି ଉଚ୍ଚପଦା ପ୍ରାଥମିକ ବିଦ୍ୟାଳୟରେ ପ୍ରଥମ ଶ୍ରେଣୀରେ ପଢୁଥିବା ଅସିତ ନାୟକ । ସୂଚନା ଅନୁସାରେ ଖେଳ ଛୁଟି ସମୟରେ ଛାତ୍ର ଜଣକ ଖେଳୁଥିବା ବେଳେ ସ୍କୁଲ ପରିସରରେ ଥିବା ସୂଚନା ଫଳକ ତା ଉପରେ ପଡିଯାଇଥିଲା । ଗୁରୁତର ଅବସ୍ଥାରେ ତାଙ୍କୁ ଭଦ୍ରକ ଜିଲ୍ଲା ମୁଖ୍ୟ ଚିକିତ୍ସାଳୟରେ ଭର୍ତ୍ତି କରାଯାଇଥିଲା ।

ସେଠାରେ ଡାକ୍ତର ତାଙ୍କୁ ମୃତ ଘୋଷଣା କରିଛନ୍ତି । ଏହାକୁ ନେଇ ଉଚ୍ଚପଦା ଗାଁରେ ଉତେଜନା ଖେଳି ଯାଇଥିଲା । ଉତ୍ୟକ୍ତ ଲୋକେ ପ୍ରଧାନ ଶିକ୍ଷୟିତ୍ରୀ ଓ ସହାୟକ ଶିକ୍ଷକଙ୍କୁ ଅଟକ ରଖିଥିଲେ । ଖବର ପାଇ ପୋଲିସ ଘଟଣାସ୍ଥଳରେ ପହଞ୍ଚି ଶିକ୍ଷକ ଶିକ୍ଷୟିତ୍ରୀଙ୍କୁ ଉଦ୍ଧାର କରି ଥାନାକୁ ନେଇଥିଲା । ଏହାପରେ ଶିକ୍ଷକଙ୍କ ଅବହେଳାରୁ ଏଭଳି ଅଘଟଣ ଘଟିଥିବା ଅଭିଯୋଗ ଆଣି ମୃତଦେହକୁ ରଖି ଗ୍ରାମବାସୀ ଭଦ୍ରକ-ଆଖଣ୍ଡଳମଣି ମୁଖ୍ୟ ରାସ୍ତାକୁ ଅବରୋଧ କରିଥିଲେ । ତେବେ ୨ ଲକ୍ଷ ଟଙ୍କାର ଆର୍ଥିକ ସହାୟତା ପ୍ରତିଶ୍ରୁତି ପରେ ରାସ୍ତାରୋକ ହଟିଥିଲା ।