ବିଜେଡି ବିଧାୟକ ପ୍ରାର୍ଥୀ ପ୍ରଶାନ୍ତ ମୁଦୁଲିଙ୍କୁ ନେଇ ଅଶାନ୍ତ ଜଗତସିଂହପୁର: ରାଲି ବେଳେ ସମର୍ଥକ ଓ ବିରୋଧୀ ମୁହାଁମୁହିଁ

କନକ ବ୍ୟୁରୋ: ଜଗତସିଂହପୁରରେ ପଦାରେ ପଡିଛି ବିଜେଡିର ଗୋଷ୍ଠୀ କନ୍ଦଳ । ଜଗତସିଂହପୁର ନିର୍ବାଚନ ମଣ୍ଡଳୀ ଆସନ ପାଇଁ ବିଜେଡିରୁ ଟିକେଟ ପାଇଥିବା ପ୍ରଶାନ୍ତ ମୁଦୁଲିଙ୍କୁ ବିରୋଧ । ପ୍ରଶାନ୍ତ ମୁଦୁଲି ଆଜି ନାଉ ଗାଁ ବ୍ଲକକୁ ରାଲିରେ ଯାଇଥିବା ବେଳେ ତାଙ୍କୁ ବିଭିନ୍ନ ସ୍ଥାନରେ କଳା ପତାକା ଦେଖାଇ ବିରୋଧ ପ୍ରଦର୍ଶନ କରାଯାଇଥିଲା ।

ବାଲିଭଉଁରୀରୁ ନାଉଗାଁ ଯିବା ବାଟରେ ତାଙ୍କୁ ବିରୋଧ ପ୍ରଦର୍ଶନ କରାଯାଇଥିଲା । ଫଳରେ ପ୍ରଶାନ୍ତ ମୁଦୁଲିଙ୍କ ସମର୍ଥକ ଓ ବିରୋଧୀଙ୍କ ମଧ୍ୟରେ ମୁହାଁମୁହିଁ ପରିସ୍ଥିତି ସୃଷ୍ଟି ହୋଇଥିଲା । ତେବେ ସେଠାରେ ଥିବା ପୁଲିସ ପ୍ରଶାସନ ପକ୍ଷରୁ ଉଭୟ ଗୋଷ୍ଠୀଙ୍କୁ ଆୟତ କରାଯିବା ପରେ ଶୋଭାଯାତ୍ରା ନାଉଗାଁ ଯାଇଥିଲା ।

ଜଗତସିଂହପୁର ବିଧାନସଭା ଆସନ ପାଇଁ ବିଜୁ ଯୁବ ଜନତା ଦଳର ଜିଲ୍ଲା ସଭାପତି ଅମରେନ୍ଦ୍ର ଦାସ ଦାବି କରି ଆସୁଥିବା ବେଳେ ବାଲିକୁଦା ଏରସମା ବିଧାୟକ ପ୍ରଶାନ୍ତ ମୁଦୁଲିଙ୍କୁ ପ୍ରାର୍ଥୀ କରାଯାଇଛି । ଯାହାକୁ ନେଇ ଗତ ୫ ଦିନ ହେବ ବିରୋଧ ଜାରି ରହିଛି ।