କନକ ବ୍ୟୁରୋ : ଋଷ ଓ ୟୁକ୍ରେନ ମଧ୍ୟରେ ଆରମ୍ଭ ହୋଇଥିବା ଯୁଦ୍ଧ ଏବେ ଥମିବାର ନାଁ ନେଉନାହିଁ । ଋଷ ସେନା ୟୁକ୍ରେନର ଅନେକ ସହରକୁ କବଜା କରିଥିବା ବେଳେ ରାଜଧାନୀ କିବ ମୁହାଁ ହୋଇଛି । କିବ ଦଖଲ କରିବାକୁ ଋଷ ସେନା ପ୍ରଚଣ୍ଡ ଆକ୍ରମଣ କରୁଛି । କେତେବେଳେ ମିସାଇଲ ମାଡ ତ ପୁଣି କେତେବେଳେ ବନ୍ଧୁକ ମୁନରେ କିବ ଦଖଲ ଅଭିମୁଖେ ବାହାରିଛି ଋଷ ସେନା । ଆଉ ଋଷର ଏଭଳି ପ୍ରଚଣ୍ଡ ଆକ୍ରମଣରେ ଅନେକ ୟୁକ୍ରେନ ବାସିନ୍ଦା ଦେଶ ଛାଡି ପଡୋଶୀ ଦେଶକୁ ପଳାୟନ କରୁଛନ୍ତି । ମିଳିଥିବା ସୂଚନା ମୁତାବକ ଏଯାବତ ୟୁକ୍ରେନରୁ ପ୍ରାୟ ୨ ଲକ୍ଷ ଲୋକ ଦେଶ ଛାଡି ସାରିଲେଣି ।
![](https://cdn-icons-png.flaticon.com/512/2504/2504957.png)
Kanak News is now on WhatsApp
Join and get latest news updates delivered to you via WhatsApp
ଏଭଳି ସଙ୍କଟଜନକ ସ୍ଥିତିରେ ନିଜ ଦେଶ ତଥା ମାଟି ମା’ର ରକ୍ଷା ପାଇଁ ବିଦେଶରୁ ଦେଶକୁ ଫେରୁଛନ୍ତି ୟୁକ୍ରେନର ଯୁବକ । ରାଷ୍ଟ୍ରପତି ଜେଲେନସ୍କି ଋଷ ବିରୋଧରେ ଲଢେଇ ପାଇଁ ସାଧାରଣ ନାଗରିକଙ୍କୁ ଆଗକୁ ବଢିବାକୁ ଆହ୍ୱାନ ଦେଇଥିଲେ । ଆଉ ଏହି ଆହ୍ୱାନକ୍ରମେ ଏବେ ଅନେକ ଯୁବକ ୟୁକ୍ରେନ୍ ମୁହାଁ ହୋଇଛନ୍ତି । ଶହ ଶହ ସାଧାରଣ ନାଗରିକ ଏବେ ୟୁକେନ୍ ସେନାରେ ସାମିଲ ହୋଇ ଋଷ ବିରୋଧରେ ଲଢେଇ କରିବାକୁ ଆଗେଇ ଆସିଛନ୍ତି ।
ସବୁଠୁ ବଡ କଥା ହେଉଛି ସେନାରେ ମିଶିବାକୁ ଆସୁଥିବା ଲୋକଙ୍କ ମଧ୍ୟରେ ଅଧିକାଂଶ ପୂର୍ବତନ ସୈନିକ ମଧ୍ୟ ରହିଛନ୍ତି । ନିଜ ଦେଶର ରକ୍ଷା ପାଇଁ ଏବେ ପୁଣିଥରେ ଅସ୍ତ୍ର ଉଠାଇବାକୁ ଆଗେଇ ଆସିଛନ୍ତି ପୂର୍ବତନ ସୈନିକ । କିଏ ପଡୋଶୀ ଦେଶ ପୋଲାଣ୍ଡରୁ ଫେରୁଛି ତ କିଏ ପାଠ ପଢା ଛାଡି ଦେଶର ସୁରକ୍ଷା ପାଇଁ ବିଦେଶରୁ ୟୁକ୍ରେନକୁ ଫେରିଛି । ଏହାପୂର୍ବରୁ ୟୁକ୍ରେନ୍ ସରକାର ୧୮ରୁ ୬୦ ବର୍ଷ ବୟସ୍କ ଲୋକଙ୍କୁ ଦେଶ ନ ଛାଡିବାକୁ କଡା ନିର୍ଦ୍ଦେଶ ଦେଇଥିଲା । ଏପରିକି ଏହିଭଳି ସଙ୍କଟଜନକ ସ୍ଥିତିରେ ଦେଶର ସୁରକ୍ଷା ପାଇଁ ଋଷ ସେନା ସହ ଲଢେଇ କରିବାକୁ ଘରେ ପେଟ୍ରୋଲ ବମ ତିଆରି କରି ରଖିବାକୁ ସରକାରଙ୍କ ପକ୍ଷରୁ କୁହାଯାଇଛି । ଆଉ ୟୁକ୍ରେନର ସାଧାରଣ ଲୋକେ ଅସ୍ତ୍ର ଉଠାଇବା ଏବେ ଋଷର ଚିନ୍ତାକୁ ବଢାଇ ଦେଇଛି ।