ପଦ୍ମ ଶିବିରରେ ସିନେ ତାରକା: ବିଜେପିରେ ମିଶିଲେ ଆକାଶ । କହିଲେ, ସ୍ୱାଭିମାନ ପାଇଁ ଲଢ଼ିବେ
କନକ ବ୍ୟୁରୋ: ଗୋଟିଏ ପରେ ଗୋଟିଏ ତାରକା ଫୁଲ ଧରୁଛନ୍ତି । ପ୍ରଥମେ ଅରିନ୍ଦମ, ତା ପରେ ସିଦ୍ଧାନ୍ତ ଓ ଆଜି ଆକାଶ ଦାସ ନାୟକ ବିଜେଡି ଛାଡି ବିଜେପିରେ ମିଶିଛନ୍ତି । କୋରଇର ପୂର୍ବତନ ବିଧାୟକ ଆକାଶ ଏଥର ଟିକେଟ୍ ଆଶାୟୀ ଥିଲେ । ଅନ୍ୟପଟେ ରାଜ୍ୟର ଅନ୍ୟ ୩ଟି ଅଂଚଳର ନେତା ଓ କର୍ମୀ ଆଜି ବିଜେପି ଶିବିରରେ ସାମିଲ ହୋଇଛନ୍ତି । ବରଗଡ଼ ପାଇକମାଳ, ବୌଦ୍ଧ ଏବଂ କଂଟାମାଳ ଅଂଚଳ ଅନେକ ନେତା ଓ କର୍ମୀ ବିଜେପିରେ ସାମିଲ ହୋଇଛନ୍ତି ।
Kanak News is now on WhatsApp
Join and get latest news updates delivered to you via WhatsApp
ବିଜେଡି ଛାଡ଼ିବାର ଠିକ ଦିନକ ପରେ ଦଳବଳ ନେଇ ବିଜେପି ରାଜ୍ୟ କାର୍ଯ୍ୟାଳୟରେ ପହଂଚିଛନ୍ତି ଓଲିଉଡ ତାରକା ଆକାଶ ଦାସ ନାୟକ । ସମର୍ଥକ ଓ କର୍ମୀଙ୍କୁ ନେଇ ବିଶାଳ ରାଲି କରିବା ସହ ଶକ୍ତି ପ୍ରଦର୍ଶନ କରିଛନ୍ତି ପୂର୍ବତନ ବିଧାୟକ । ବିଜେପି ନେତା ଅରିନ୍ଦମ ରୟ ଏବଂ ପ୍ରଦୀପ ପାଣିଗ୍ରାହୀ ପ୍ରମୁଖ ଆକାଶଙ୍କୁ ସ୍ୱାଗତ କରିବା ସହ ବିଜେପି କାର୍ଯ୍ୟାଳୟକୁ ପାଛୋଟି ନେଇଥିଲେ । ଏହା ପରେ ବିଜେପି ରାଜ୍ୟ ସଭାପତି ମନମୋହନ ସାମଲଙ୍କ ସମେତ ବରିଷ୍ଠ ବିଜେପି ନେତାଙ୍କ ମେଳରେ ବିଧିବଦ୍ଧ ଭାବେ ଭାରତୀୟ ଜନତା ପାର୍ଟିରେ ସାମିଲ ହୋଇଛନ୍ତି ପୂର୍ବତନ ବିଧାୟକ ଆକାଶ ଦାସ ନାୟକ ।
୨୦୧୪ରେ କୋରେଇରୁ ନିର୍ବାଚିତ ହୋଇ ବିଧାନସଭା ଆସିଥିଲେ ଆକାଶ । ୨୦୧୯ରେ ତାଙ୍କୁ ବିଜେଡି ଟିକେଟ୍ ଦେଇନଥିଲା । ତେବେ ବାରମ୍ବାର ବିଜେଡିରେ ଅଣଦେଖା ଶିକାର ହେଉଥିବା ଅଭିଯୋଗ ଆଣି ବିଜେପିର ସାମିଲ ହୋଇଛନ୍ତି ଆକାଶ । ମା’-ମାଟି ଓ ସ୍ୱାଭିମାନ ପାଇଁ ଲଢ଼େଇ ଜାରି ରହିବ ବୋଲି କହିଛନ୍ତି ପୂର୍ବତନ ବିଧାୟକ । ଏପଟେ ଆକାଶଙ୍କୁ ପାଛୋଟି ନେବା ସହ ଦଳର ଶକ୍ତିବୃଦ୍ଧିରେ ସହାୟକ ହେବ ବୋଲି କହିଛି ବିଜେପି ।
ଏପଟେ ବରଗଡ଼ ପାଇକମାଳ, ବୌଦ୍ଧ ଏବଂ କଂଟାମାଳ ଅଂଚଳ ଅନେକ ନେତା ଓ କର୍ମୀ ବିଜେପିରେ ସାମିଲ ହୋଇଛନ୍ତି । ପାଇକମାଳର ଇଂଜିନିୟର ଆଶୁତୋଷ ସାହୁ ହଜାର ହଜାର ସମର୍ଥକଙ୍କ ସହ ବିଜେପିରେ ଯୋଗ ଦେଇଛନ୍ତି । କହିଛନ୍ତି, ଲୋକସଭା ପ୍ରାର୍ଥୀ ପ୍ରଦୀପ ପୁରୋହିତଙ୍କ ଦ୍ୱାରା ଅନୁପ୍ରାଣିତ ହୋଇ ଦଳରେ ଯୋଗ ଦେଇଛନ୍ତି । ସେପଟେ ବୌଦ୍ଧ ଅଂଚଳର ଶେଷ କୁମାର ମେହେର ବିଜେପିରେ ସାମିଲ ହୋଇଛନ୍ତି । ୨୦୧୯ ନିର୍ବାଚନରେ କଂଟାମାଳରୁ ସ୍ୱାଧୀନ ପ୍ରାର୍ଥୀ ଭାବେ ନିର୍ବାଚନ ଲଢ଼ଥିଲେ । ସେହିପରି ନିଆଳି ନିର୍ବାଚନ ମଣ୍ଡଳୀର ନେତା ତଥା ପୂର୍ବତନ ବିଧାୟକ କଣ୍ଡୁରୀ ଚରଣ ମଲ୍ଲିକଙ୍କ ପୁଅ ପ୍ରମୋଦ କୁମାର ମଲ୍ଲିକ ବିଜେପିରେ ଯୋଗ ଦେଇଛନ୍ତି ।
ନିର୍ବାଚନ ଯେତିକି ପାଖେଇ ଆସୁଛି, ସୁବିଧା ଓ ଯୋଗ ଦେଖି ନେତା ଦଳଡିଆଁ ପ୍ରତିଯୋଗିତାରେ ସାମିଲ ହେଉଛନ୍ତି । ତେବେ ଦେଖିବାର କଥା ନିର୍ବାଚନରେ ଏହି ମିଶ୍ରଣପର୍ବ ଦଳକୁ କେତେ ସହାୟକ ହେଉଛି ।