ରାଜସ୍ଥାନ ଚୁରୁରେ ମର୍ମନ୍ତୁଦ ସଡକ ଦୁର୍ଘଟଣା । ୬ ପୋଲିସ କର୍ମଚାରୀ ମୃତ
କନକ ବ୍ୟୁରୋ : ରାଜସ୍ଥାନ ଚୁରୁ ଜିଲ୍ଲା ସୁଜାନଗଡ ଥାନା ଅଞ୍ଚଳରେ ଏକ କାର ଓ ଟ୍ରକ ମଧ୍ୟରେ ମୁହାଁମୁହିଁ ଧକ୍କା ହୋଇଛି । ଏହି ଦୁର୍ଘଟଣାରେ ୬ ଜଣ ପୋଲିସ କର୍ମୀଙ୍କର ମୃତ୍ୟୁ ହୋଇଛି । ଦୁର୍ଘଟଣାର ସୂଚନା ପାଇବା ପରେ ପୋଲିସ ପ୍ରଶାସନ ମଧ୍ୟରେ ଶୋକର ଛାୟା ଖେଳି ଯାଇଛି । ଘଟଣା ସ୍ଥଳରେ ଉଦ୍ଧାରକାରୀ ଟିମ୍ ପହଂଚି କାର ଭିତରୁ ଶବଗୁଡିକୁ ବାହାରକୁ ବାହାର କରି ସ୍ଥାନୀୟ ହସ୍ପିଟାଲର ଶବଗୃହରେ ରଖିଛି । ଦୁର୍ଘଟଣାର କାରଣ ଏପର୍ଯ୍ୟନ୍ତ ସ୍ପଷ୍ଟ ହୋଇନାହିଁ । ପୋଲିସ ପୂରା ମାମଲାର ଯାଂଚ ଆରମ୍ଭ କରିଛି । ଦୁର୍ଘଟଣାରେ ମୃତ୍ୟୁବରଣ କରିଥିବା ପୋଲିସ କର୍ମୀମାନେ ନାଗୋରରୁ ଝୁନଝୁନକୁ ନିର୍ବାଚନ ଡ୍ୟୁଟିରେ ଯାଉଥିଲେ । ଏହି କ୍ରମରେ ମଝି ରାସ୍ତାରେ ଦୁର୍ଘଟଣା ଘଟିଛି ।
Kanak News is now on WhatsApp
Join and get latest news updates delivered to you via WhatsApp
ପୋଲିସର ସୂଚନା ମୁତାବକ ଏହି ଦୁର୍ଘଟଣା ରବିବାର ସକାଳେ ଜାତୀୟ ରାଜପଥ ୫୮ ସୁଜାନଗଡ ସଦର ଥାନା ଅଞ୍ଚଳରେ ଘଟିଛି । ସାମ୍ନା ପଟୁ ଆସୁଥିବା ଏକ ଟ୍ରକ ପୋଲିସ ଗାଡିକୁ ଧକ୍କା ଦେଇଥିଲା । କାରରେ ଥିବା ପୋଲିସ କର୍ମୀଙ୍କ ମଧ୍ୟରୁ ଘଟଣା ସ୍ଥଳରେ ୫ ଜଣଙ୍କର ମୃତ୍ୟୁ ହୋଇଥିବା ବେଳେ ଅନ୍ୟ ଜଣେ ପୋଲିସ କର୍ମୀଙ୍କର ଚିକିତ୍ସାଧୀନ ଅବସ୍ଥାରେ ମୃତ୍ୟୁ ହୋଇଛି । କାରରେ ଥିବା ଅନ୍ୟଜଣେ ଯବାନ ଗୁରୁତର ଅବସ୍ଥାରେ ଚିକିତ୍ସିତ ହେଉଛନ୍ତି ।