କରୋନା ଛଡାଇନେଲା ଓଡିଆ କୋରିଓଗ୍ରାଫରଙ୍କ ଜୀବିକା । ବଲିଉଡ ଓ ଓଡିଶାରେ କାମ ବନ୍ଦ ହୋଇଯିବାରୁ ଗଞ୍ଜାମରେ କଲେ ଚା’ ଦୋକାନ
ପରିବାର ଭରଣ ପୋଷଣ ପାଇଁ ବଦଳିଗଲା ଜୀବିକା
କନକ ବ୍ୟୁରୋ: ଓଡିଆ ସିନେମା ସୁନ୍ଦରଗଡର ସଲମାନ ଖାନ, ଜଗା ହାତରେ ପଘା, ବିନ୍ଦାସ ଏବଂ ହିନ୍ଦି ସିନେମା ୟେ କେସା ରିସ୍ତା ଏବଂ କମାଣ୍ଡୋ-୨ ସିନେମାରେ କୋରିଆଗ୍ରାଫର ଥିବା ଓଡିଆ ଯୁବକ ଗୁରୁ ସାଓଲିଙ୍ଗ ଏବେ ଚା ବିକ୍ରି କରୁଛନ୍ତି । କରୋନା ଏମିତି ମାଡ ମାରିଛି ଯେ ବଲିଉଡ ଓ ଓଲିଉଡର ରଙ୍ଗିନ ଦୁନିଆ ଛାଡି ପରିବାରର ପେଟ ପୋଷିବା ଚିନ୍ତାରେ ମହାରାଷ୍ଟ୍ରରୁ ଓଡିଶା ଫେରିଆସି ଏବେ ଚା ଦୋକାନ କରିଛନ୍ତି । ଦିନକୁ ଯାହା ଦୁଇ ପଇସା ଲାଭ ହେଉଛି, ସେଥିରେ ପରିବାର ଚଳୁଛି ।
Kanak News is now on WhatsApp
Join and get latest news updates delivered to you via WhatsApp
ହଲିଉଡ, ବଲିଉଡ ଏବଂ ଓଲିଉଡ ଗୀତର ତାଳେ ତାଳେ ଚମକ୍ରାର ନାଚୁଛନ୍ତି ଗୁରୁ ସାଓଲିଙ୍ଗ ।ବଲିଉଡ ଏବଂ ଓଡିଉଡରେ ଏକ ପରିଚିତ ନାଁ । ହିନ୍ଦି ଓ ଓଡିଆ ସିନେମା ତଥା ଯାତ୍ରା ଜଗତରେ ଅନେକ ଅଭିନେତା ଏବଂ ଅଭିନେତ୍ରୀଙ୍କୁ ନିଜ ଇସାରାରେ ନଚାଇଛନ୍ତି । କରୋନା ସଂକ୍ରମଣ ଭିତରେ ଜୀବନ ଜୀବିକାର ଲଢେଇରେ ଏବେ ବଦଳିଛି ଗୁରୁ ସାଓଲିଙ୍ଗଙ୍କ ଠିକଣା । ମହାରାଷ୍ଟ୍ର ନୁହେଁ ଓଡିଶାର ଗଞ୍ଜାମ ଜିଲ୍ଲାରେ ଥିବା ଏହି ମାଟିହାଣ୍ଡି ଚା ଦୋକାନ ହେଉଛି ତାଙ୍କର ନୂଆ ଠିକଣା । କରୋନା ସଂକ୍ରମଣ ଯୋଗୁଁ ମହାରାଷ୍ଟ୍ରରେ ସିନେମା ସୁଟିଂ ନ ହୋଇପାରିବା କାରଣରୁ କାମଧନ୍ଦା ନପାଇ ଏବେ ଓଡିଶା ଫେରିଛନ୍ତି ସାଓଲିଙ୍ଗ । ମାଟିକୁଡିଆ ଘରେ ଚା ବିକ୍ରି କରୁଛନ୍ତି ସେ । ପେଟ ପୋଡିଗଲା ବେଳେ ଆପଣେଇବାକୁ ପଡିଛି ଏହି ପେଷା ।
୧୦ ଟଙ୍କିଆ, ୨୦ଟଙ୍କିଆ, ୩୦ଟଙ୍କିଆ, ୪୦ଟଙ୍କିଆ, ୭୫ଟଙ୍କିଆ ଏପରିକି ୨୦୦ ଟଙ୍କିଆ ରାବିଡି ଚାଁ ବିକ୍ରି କରି ଦିନକୁ ୨୦୦ରୁ ୩୦୦ ଟଙ୍କା ଲାଭ କରୁଛନ୍ତି । ମୂଳ ଜୀବିକା ସିନା ପଳେଇଛି, ହେଲେ ଜୀବନ ସଂଘର୍ଷର ଏ ଲଢେଇରେ ସେ ହାର ମାନିନାହାନ୍ତି । ସତରେ ମଣିଷର ପରିସ୍ଥିତି କେତେବେଳେ ତାକୁ କେଉଁ ମୋଡକୁ ନେଇଆସେ ତାହା କହିବା ମୁସକିଲ । ହଲିଉଡ ଗୀତରେ ହାତ ଓ ପାଦ ଚାଳନା କରୁଥିବା ଏହି ଯୁବକ ହୁଏତ କେବେ ବି କଳ୍ପନା କରିନଥିଲେ ଯେ ତାଙ୍କୁ ଏପରି ସ୍ଥିତିର ସାମନା କରିବାକୁ ପଡିବ ।