ଚିତ୍ରକୋଣ୍ଡା ସରକାରୀ ଅନୁସୂଚିତ ଜାତି ଓ ଜନଜାତି ଉଚ୍ଚ ବାଳିକା ବିଦ୍ୟାଳୟରେ ଅଭାବନୀୟ ଘଟଣା: ଛାତ୍ରୀଙ୍କ ଷ୍ଟାଇପେଂଟ ଟଙ୍କା ଦେବାକୁ କହିବାରୁ ଶିକ୍ଷୟିତ୍ରୀଙ୍କୁ ଗାଳି କଲେ ପ୍ରଧାନ ଶିକ୍ଷକ

ଜିଲ୍ଲାପାଳଙ୍କୁ ଫେରାଦ ହେଲେ ଶିକ୍ଷୟିତ୍ରୀ

76

କନକ ବ୍ୟୁରୋ: ଆଦିବାସୀ ଛାତ୍ରୀଙ୍କୁ ଷ୍ଟାଇପେଂଟ ଟଙ୍କା ଦେବାକୁ କହିବାରୁ ସହକାରୀ ଶିକ୍ଷୟିତ୍ରୀଙ୍କୁ ଗାଳି କଲେ ପ୍ରଧାନ ଶିକ୍ଷକ । କରୋନା କାଳରେ ଛାତ୍ରୀଙ୍କ ଘରକୁ ଯାଇ ଷ୍ଟାଇପେଂଟ ଟଙ୍କା ଦେବାକୁ କହିଥିଲେ ସରକାର । ହେଲେ ମାଲକାନଗିରି ଜିଲ୍ଲା ଚିତ୍ରକୋଣ୍ଡାରେ ଛାତ୍ରୀଙ୍କୁ ୧୦ ମାସ ହେଲା ଷ୍ଟାଇପେଂଟ ଟଙ୍କା ଦେଇନଥିଲେ ପ୍ରଧାନ ଶିକ୍ଷକ । ଏବେ ସ୍କୁଲ ଖୋଲିଥିବା ବେଳେ ଛାତ୍ରୀଙ୍କୁ ଟଙ୍କା ଦେବା ପାଇଁ କହିବାରୁ ସହଯୋଗୀ ଶିକ୍ଷୟିତ୍ରୀଙ୍କୁ ପ୍ରଧାନ ଶିକ୍ଷକ ଗାଳି ଗୁଲଜ କରିଥିବା ଜିଲ୍ଲାପାଳଙ୍କ ପାଖରେ ଅଭିଯୋଗ ହୋଇଛି ।

୧୦ ମାସ ପରେ ଛାତ୍ରୀ ପାଇଲେ ପଇସା, ଶିକ୍ଷୟିତ୍ରୀ ଶୁଣିଲେ ଗାଳି । ମାଲକାନଗିରି ଚିତ୍ରକୋଣ୍ଡା ସରକାରୀ ଅନୁସୂଚିତ ଜାତି ଓ ଜନଜାତି ଉଚ୍ଚ ବାଳିକା ବିଦ୍ୟାଳୟରେ ଏଭଳି ଅଭାବନୀୟ ଘଟଣା ଘଟିଛି । ଗତ ମାର୍ଚ ମାସରୁ ସ୍କୁଲ ବନ୍ଦ ଥିବାରୁ ଛାତ୍ରୀଙ୍କୁ ମାସିକ ଷ୍ଟାଇପେଣ୍ଡ ଟଙ୍କା ମିଳିନଥିଲା । ଛାତ୍ରୀଙ୍କ ଘରକୁ ଯାଇ ଟଙ୍କା ଦେବାକୁ ସରକାର କହିଥିଲେ, କିନ୍ତୁ ଚିତ୍ରକୋଣ୍ଡା ଏସଏସଡି ସ୍କୁଲର ଛାତ୍ରୀଙ୍କୁ ଟଙ୍କା ଦେଇ ନଥିଲେ ପ୍ରଧାନ ଶିକ୍ଷକ । ଏବେ ସ୍କୁଲ ଖୋଲିଥିବା ବେଳେ ଛାତ୍ରୀଙ୍କୁ ଟଙ୍କା ଦେବା ପାଇଁ ସହକାରୀ ଶିକ୍ଷୟିତ୍ରୀମାନେ କହିବାରୁ ପ୍ରଧାନ ଶିକ୍ଷକ ତାଙ୍କୁ ଗାଳି ଦେଇଛନ୍ତି । ଏନେଇ ଶିକ୍ଷୟିତ୍ରୀ ମାନେ ଜିଲ୍ଲାପାଳଙ୍କୁ ଜଣାଇଛନ୍ତି ।

ତେବେ ଜିଲ୍ଲାପାଳ ଏସଂପର୍କରେ କୌଣସି କାର୍ଯ୍ୟାନୁଷ୍ଠାନ ନେଇ ନଥିବାରୁ ଅଭିଭାବକ ମହଲରେ ଅସନ୍ତୋଷ ଦେଖିବାକୁ ମିଳିଛି । ଯଦି ତାଲାବନ୍ଦ ବେଳେ ଛାତ୍ରୀଙ୍କୁ ଷ୍ଟାଇପେଂଟ ଦେବା ପାଇଁ ସରକାର ଟଙ୍କା ଦେଇଥିଲେ, ତେବେ ପ୍ରଧାନ ଶିକ୍ଷକ କାହିଁକି ଦେଇ ନଥିଲେ ବୋଲି ଅଭିଭାବକ ପ୍ରଶ୍ନ କରିଛନ୍ତି । ସେପଟେ ନିଜ ଆଡୁ ସଫେଇ ରଖି ପ୍ରଧାନ ଶିକ୍ଷକ କହିଛନ୍ତି, ସେ ଶିକ୍ଷୟିତ୍ରୀଙ୍କୁ ଦୁର୍ବ୍ୟବହାର କରିନାହାନ୍ତି କି କୌଣସି ପଇସା ଆସିନାହିଁ । ତେବେ ଶିକ୍ଷୟିତ୍ରୀଙ୍କୁ ଦୁର୍ବ୍ୟବହାର କରିବା ସହ ଦୁର୍ନୀତିଗ୍ରସ୍ତ ଶିକ୍ଷକଙ୍କ ବିରୋଧରେ ଦୃଢ କାର୍ଯ୍ୟାନୁଷ୍ଠାନ ନେବା ପାଇଁ ଦାବି ହୋଇଛି ।

Comments are closed.