ଚିତ୍ତଙ୍କ ହତ୍ୟା ମାମଲାରେ କ୍ରାଇମବ୍ରାଞ୍ଚ ଥିଓରୀକୁ ନେଇ ପ୍ରଶ୍ନ ଉଠାଇଲେ ପରିବାର । କହିଲେ, ଯୁବତୀ ନୁହେଁ ଟଙ୍କା ପାଇଁ କରାଯାଇଛି ହତ୍ୟା ।
କନକ ବ୍ୟୁରୋ : ସଞ୍ଜୟ ଦାସବର୍ମାଙ୍କ ସହଯୋଗୀ ଚିତରଞ୍ଜନଙ୍କ ମୃତ୍ୟୁ ଏକ ହତ୍ୟାକାଣ୍ଡ ଥିଲା ବୋଲି ତଦନ୍ତକାରୀ ଟିମ୍ ସ୍ପଷ୍ଟ କରିଛି । କିନ୍ତୁ ମୃତ୍ୟୁ ପଛର ଯେଉଁ କାରଣ ଥିବା ନେଇ ଇଙ୍ଗିତ କରିଛି ତାକୁ ନେଇ ଅସନ୍ତୋଷ ପ୍ରକାଶ କରିଛନ୍ତି ଚିତରଞ୍ଜନଙ୍କ ପତ୍ନୀଙ୍କ ସମେତ ପରିବାରବର୍ଗ । ଏବଂ ଏହା ପଛରେ ଅଧିକ ଲୋକଙ୍କ ହାତ ରହିଥିବା ସେମାନେ ଅଭିଯୋଗ କରିଛନ୍ତି । ସମସ୍ତଙ୍କୁ ଗିରଫ କରାନଗଲେ ନ୍ୟାୟ ପାଇଁ ଏସପି ଅଫିସ ସମ୍ମୁଖରେ ଧାରଣା ଦେବେ ବୋଲି କହିଛନ୍ତି । ଅନ୍ୟପଟେ ୨ ଅଭିଯୁକ୍ତଙ୍କୁ ଦୁଇ ଦିନିଆ ରିମାଣ୍ଡରେ ନେଇଛି କ୍ରାଇମବ୍ରାଞ୍ଚ ।
Kanak News is now on WhatsApp
Join and get latest news updates delivered to you via WhatsApp
ଚିତରଞ୍ଜନଙ୍କ ହତ୍ୟାକାଣ୍ଡ ମାମଲାର ତଦନ୍ତ କରୁଥିବା କ୍ରାଇମବ୍ରାଞ୍ଚ ଟିମ, ଶୁକ୍ରବାର ଯେଉଁ ଦିଗ ପ୍ରତି ଇଙ୍ଗିତ କରିଥିଲେ, ତାକୁ ନେଇ ଏମିତି ଅସନ୍ତୋଷ ପ୍ରକାଶ କରିଛନ୍ତି ତାଙ୍କ ପତ୍ନୀ । କୌଣସି ଯୁବତୀଙ୍କ ପାଇଁ ନୁହେଁ ବରଂ ଟଙ୍କା କାରବାରକୁ ନେଇ ଏକାଧିକ ଲୋକ ସଂଘବଦ୍ଧଭାବେ ଚିତଙ୍କୁ ମିଳିମିଶି ହତ୍ୟା କରିଛନ୍ତି ବୋଲି ସେ ପୁଣି ଅଭିଯୋଗ କରିଛନ୍ତି । ତେଣୁ କେବଳ ଦୁଇ ଜଣ ନୁହେଁ ଅନ୍ୟମାନଙ୍କୁ ତୁରନ୍ତ ଗିରଫ କରିବା ପାଇଁ ଦାବି କରିଛନ୍ତି ।
ମାମଲାର ତଦନ୍ତ କରୁଥିବା କ୍ରାଇମବ୍ରାଞ୍ଚ ଅଧିକାରୀ କହିଥିଲେ ୧୧ ତାରିଖରେ ଭୋଜି ସ୍ଥଳରୁ ଚିତ୍ତକୁ ଜଗା ସାଙ୍ଗରେ ନେଇ ଯୁବତୀଙ୍କୁ ଗାଁ ଚକ୍ରପଡାକୁ ଯାଇଥିଲେ । ଯୁବତୀଙ୍କ ଘର ସାମ୍ନାରେ କୌଣସି କାରଣରୁ ଝଗଡା ହେବା ସହ ଅପ୍ରୀତିକର ପରିସ୍ଥିତି ସୃଷ୍ଟି ହୋଇଥିଲା । ଚକ୍ରପଡାରୁ ଫେରିବା ପରେ ପୁଣିଥିରେ ନୂଆଗାଁ ନୂଆନଈ ବନ୍ଧ ଉପରେ ଅଶୋକ ଉପାଧ୍ୟାୟ ଓ ତାଙ୍କ ସହଯୋଗୀ ଆକ୍ରମଣ କରିଥିଲେ । ପ୍ରମାଣ ମିଳିବା ପରେ ଜଗା ଓ ଅଶୋକକୁ ଗିରଫ କରାଯାଇଛି । ଯାହାକୁ ନେଇ ଅସନ୍ତୋଷ ପ୍ରକାଶ କରିଛନ୍ତି ଚିତ୍ତଙ୍କ ପରିବାର ଲୋକ ।
କ୍ରାଇମବ୍ରାଞ୍ଚ ଚିତ୍ତଙ୍କ ମୃତ୍ୟୁକୁ ହତ୍ୟାକାଣ୍ଡ ବୋଲି କହିଥିଲେ ବି ଅନେକ ତଥ୍ୟ ଗୋପନ ରହିଛି । ଚିତ୍ତ ମୃତ୍ୟୁର କାରଣ କଣ ତାହା ସ୍ପଷ୍ଟ ହୋଇନାହିଁ । ହତ୍ୟାକାଣ୍ଡର କାରଣ ପରକିୟା ପ୍ରୀତି ନା ଆଉ କିଛି କାରଣ ରହିଛି ? ମହିଳାଙ୍କ ଘର ସମ୍ମୁଖରେ କାହିଁକି ଅପ୍ରୀତିକର ପରିସ୍ଥିତି ସୃଷ୍ଟି ହେଲା ? ଚିତ୍ତ ସେହି ମହିଳାଙ୍କ ଘରକୁ ଆଗରୁ ଯାଉଥିଲେ କି ନାହିଁ ? ଯଦି ଯାଉଥିଲେ ଅଶୋକ କାହିଁକି ବାଧା ଦେଉନଥିଲେ ? ଚିତ୍ତଙ୍କ ମୃତ୍ୟୁ ପରେ ଜଗା କାହାକୁ ଫୋନ କରିଥିଲେ ? ଚିତ୍ତ ମୃତ୍ୟୁ ପଛରେ ଆଉ କାହାର ହାତ ରହିଛି କି ? ଏସବୁ ଏବେ ବି ରହସ୍ୟରେ ରହିଛି ।