ବିହାର ରାଜନୀତି ଗଣିତକୁ ବିଗାଡି ଦେଲେ ଦୁଇ ନେତା । ବଡ଼ ଭାଇରୁ ସାନ ଭାଇ ବନିଲେ ନୀତିଶ, ଧୂଳିସାତ୍ ହେଲା ତେଜସ୍ୱୀଙ୍କ ମୁଖ୍ୟମନ୍ତ୍ରୀ ହେବାର ସ୍ୱପ୍ନ ।
କନକ ବ୍ୟୁରୋ : ବିହାର ରାଜନୀତିର ଗଣିତକୁ ବିଗାଡି ଦେଲେ ଦୁଇ ଜଣ ନେତା । ଚିରାଗ ପାଶୱାନ୍ ଓ ଅସଦୁଦ୍ଦିନ୍ ଓୱେସୀ । ଏହି ଦୁଇ ନେତାଙ୍କୁ ନେଇ ସାରା ଦେଶରେ ଏବେ ଚର୍ଚ୍ଚା । କାରଣ ଜଣେ ନୀତିଶଙ୍କ ଜେଡିୟୁକୁ ବଡ ଭାଇରୁ ସାନ ଭାଇ ବନାଇଦେଲା ଏବଂ ଅନ୍ୟଜଣେ ତେଜସ୍ୱୀ ଯାଦବଙ୍କ ମୁଖ୍ୟମନ୍ତ୍ରୀ ହେବା ସ୍ୱପ୍ନକୁ ଧୂଳିସାତ୍ କରିଦେଲା ।
Kanak News is now on WhatsApp
Join and get latest news updates delivered to you via WhatsApp
ଚିରାଗ ପାଶୱାନ୍ ବିହାର ବିଧାନସଭା ନିର୍ବାଚନରେ ଏକ ଏଭଳି ଭୂମିକା ନେଲେ ଯାହାକୁ ବିହାର କେବେ ଭୁଲି ପାରିବ ନାହିଁ । ୨୪୩ ଆସନ ମଧ୍ୟରୁ ୧୩୪ଟି ଆସନରେ ଲଢେଇ କରିଥିଲେ ମଧ୍ୟ ନୀତିଶ କୁମାରଙ୍କୁ ଏମିତି ଝଟକା ଦେଲେ, ଯାହା ନୀତିଶ କୁମାର ମଧ୍ୟ ଭୁଲିପାରିବେ ନାହିଁ । ନୀତିଶଙ୍କ ଜେଡିୟୁ ପ୍ରାର୍ଥୀ ଯେଉଁଠି ଠିଆ ହେଲେ ସେହି ସ୍ଥାନରେ ମୋଦିଙ୍କୁ ପ୍ରଶଂସା କରି ଲଢେଇ କଲା ଚିରାଗଙ୍କ ଏଲଜେପି । ଫଳରେ ଜେଡିୟୁ ଭୋଟ ଦୁଇ ଭାଗ ହୋଇ ଅଧା ଚିରାଗଙ୍କ ଆଡକୁ ଚାଲିଗଲା । ଆଉ ହାରିଗଲେ ନୀତିଶଙ୍କ ପ୍ରାର୍ଥୀ ।
ଚିରାଗ ପାଶୱାନଙ୍କ ଏଲଜେପି ମାତ୍ର ଗୋଟିଏ ଆସନରେ ବିଜୟୀ ହେଲା । କିନ୍ତୁ ପ୍ରାୟ ୬ ପ୍ରତିଶତ ଭୋଟ ନେଇ ନୀତିଶ କୁମାରଙ୍କ ବହୁ ପ୍ରାର୍ଥୀଙ୍କୁ ହରାଇ ଦେଲେ । ଆଉ ବଡ ଭାଇରୁ ସାନ ଭାଇ ବନିଗଲେ ନୀତିଶ କୁମାର ।
ଯେମିତି ନୀତିଶ କୁମାରଙ୍କୁ ଚିରାଗ ଏକ ବଡ ଝଟକା ଦେଲେ ସେମିତି ଆରଜେଡି ନେତା ତେଜସ୍ୱୀ ଯାଦବଙ୍କ ସ୍ୱପ୍ନକୁ ମାଟିରେ ମିଶାଇଦେଲେ ଏଆଇଏମଆଇଏମ ମୁଖ୍ୟ ଅସଦୁଦ୍ଦିନ୍ ଓୱେସୀ । ଏନଡିଏ ବିରୋଧୀ ସୀମାଂଚଳ ଅଂଚଳରେ ନିର୍ବାଚନ ଲଢିଲା ଦଳ । ଏହି ଅଂଚଳର ମୋଟ ୨୪ଟି ବିଧାନସଭା ଆସନ ମଧ୍ୟରୁ ୧୪ଟିରେ ପ୍ରାର୍ଥୀ ଦେଇଥିଲା ଓୱେସୀଙ୍କ ପାର୍ଟି । ଆରଜେଡି ପାଉଥିବା ସଂଖ୍ୟାଲଘୁ ଭୋଟକୁ ବିଭାଜନ କରିଥିଲା ଏଆଇଏମଆଇଏମ । ଏହା ସହ ୧.୨୪ ପ୍ରତିଶତ ଭୋଟ ହାତେଇବା ସହ ୫ଟି ଆସନ ବି ଜିତିଲା ଦଳ ।