ପଡିଆ ମଝିରେ ଜରୁରୀକାଳୀନ ଲ୍ୟାଣ୍ଡିଂ କଲା ଭାରତୀୟ ବାୟୁସେନାର ହେଲିକପ୍ଟର ଚିନୁକ । ଜାଣନ୍ତୁ କାହିଁକି ହଠାତ୍ ପଡିଆ ମଝିରେ ଲ୍ୟାଣ୍ଡିଂ କଲା ହେଲିକପ୍ଟର?
କନକ ବ୍ୟୁରୋ : ପଡିଆ ମଝିରେ ଅଚାନକ ଓହ୍ଲାଇଲା ଭାରତୀୟ ବାୟୁସେନାର ଚିନୁକ ହେଲିକପ୍ଟର । ବିହାରର ବକ୍ସରର ମାନିକପୁର ଉଚ୍ଚ ବିଦ୍ୟାଳୟର ପଡିଆରେ ଯାନ୍ତ୍ରିକ ତ୍ରୁଟି ଯୋଗୁଁ ଜରୁୀରକାଳୀନ ଲ୍ୟାଣ୍ଡିଂ କରିଛି ଭାରତୀୟ ବାୟୁସେନାର ଚିନୁକ ବିମାନ । ବାୟୁସେନାର ୨୦ ଜଣ ଅଧିକାରୀ ଓ କର୍ମଚାରୀ ମହଜୁଦ ଥିବା ଏହି ହେଲିକପ୍ଟର ଜରୁରୀକାଳୀନ ଲ୍ୟାଣ୍ଡିଂ କରିଥିଲେ ମଧ୍ୟ କାହାର କୌଣସି କ୍ଷତି ହୋଇନାହିଁ । ହେଲିକପ୍ଟରଟି ଅତି ସୁରକ୍ଷିତ ଭାବେ ଲ୍ୟାଣ୍ଡିଂ କରିଛି । ଏହି ଚିନୁକ ହେଲିକପ୍ଟର ପାଟନାର ବିହଟା ଏୟାରଫୋର୍ସ ଷ୍ଟେସନକୁ ଯାଉଥିବା ବେଳେ ଫଙ୍ଖାରେ ଯାନ୍ତ୍ରିକ ତ୍ରୁଟି କାରଣରୁ ବିମାନଟିକୁ ପଡିଆ ମଝିରେ ଲ୍ୟାଣ୍ଡିଂ କରିବାକୁ ପଡିଛି ।
Kanak News is now on WhatsApp
Join and get latest news updates delivered to you via WhatsApp
ସ୍ଥାନୀୟ ଗ୍ରାମବାସୀଙ୍କ କହିବା ଅନୁଯାୟୀ, ଆକାଶରେ ଉଡୁଥିବା ବେଳେ ହଠାତ୍ ହେଲିକପ୍ଟରର ପଙ୍ଖାରୁ ଧୁଆଁ ବାହାରୁଥିବାର ଦେଖିବାକୁ ମିଳିଥିଲା ଓ ବିମାନଟି ତଳକୁ ଆସୁଥିଲା । ତେବେ ପାଇଲଟ ନିଜର ବୁଦ୍ଧି ଖଟାଇ ସୁରକ୍ଷିତ ଭାବେ ବିମାନଟିକୁ ଲ୍ୟାଣ୍ଡିଂ କରିଥିଲେ । ଘଟଣା ସାମ୍ନାକୁ ଆସିବା ପରେ ସ୍ଥାନୀୟ ପୋଲିସ ଅଧିକାରୀ ଉକ୍ତ ସ୍ଥାନରେ ପହଞ୍ଚି ବାୟୁସେନାର ଅଧିକାରୀଙ୍କ ଖାଇବା ଓ ରହିବାର ବ୍ୟବସ୍ଥା କରିଥିଲେ । ଅଚାନକ ସ୍କୁଲ ପଡିଆରେ ହେଲିକପ୍ଟରଟି ଓହ୍ଲାଇବା ଖବର ବ୍ୟାପିବା କ୍ଷଣି ଉକ୍ତ ସ୍ଥାନରେ ଗ୍ରାମବାସୀଙ୍କର ଭିଡ ଜମିଥିଲା । ହେଲିକପ୍ଟର ସହ ଲୋକେ ସେଲଫି ନେବା ସହ ବେଶ କିଛି ସମୟ ଭିଡ଼ ଜମାଇଥିଲେ । ଘଟଣାସ୍ଥଳରେ ପୋଲିସ ମୁତୟନ କରାଯାଇଥିବା ବେଳେ ଯାନ୍ତ୍ରିକ ତ୍ରୁଟି କଣ ରହିଛି ତାହାର ଯାଞ୍ଚ ଚାଲିଛି । ଯାଞ୍ଚ ପରେ ହେଲିକପ୍ଟରକୁ ସଜଡାଯିବା ସହ ପୁଣିଥରେ ଏୟାରଫୋର୍ସ ଷ୍ଟେସନ ଅଭିମୁଖେ ଯାତ୍ରା କରିବ ।