ଲଦାଖରେ ସୀମା ବିବାଦ ଭିତରେ ଚୀନକୁ ଭାରତ ମହାସାଗରରେ ଘେରିବାକୁ ଭାରତର ଯୋଜନା: ଆଣ୍ଡାମାନ ନିକୋବର ଦ୍ୱୀପରେ ଭାରତ ବଢାଇବ ସାମରିକ କ୍ଷମତା
ଭାରତୀୟ ନୌସେନା କରୁଛି ପ୍ରସ୍ତୁତି
କନକ ବ୍ୟୁରୋ: ଭାରତ-ଚୀନ ମଧ୍ୟରେ ଲଦାଖ ସୀମା ବିବାଦକୁ ନେଇ ସ୍ଥିତି ସରଗରମ ରହିବା ଭିତରେ ଆସିଛି ଏପରି ଖବର ଯାହା ଚୀନର ଚିନ୍ତାକୁ ଅଧିକ ବଢାଇ ଦେବ । ଭାରତ ମହାସାଗରରେ ଚୀନକୁ ଘେରିବାକୁ ଏବେ ଆଣ୍ଡାମାନ ନିକୋବରରେ ଭାରତ ବଢାଇବ ସାମରିକ ଶକ୍ତି । ଏଥିପାଇଁ ସଜାଗ ହୋଇଗଲାଣି ଭାରତୀୟ ନୌସେନା । ଭାରତ ଏଥିପାଇଁ ଯୁଦ୍ଧକାଳୀନ ଭିତିରେ କରୁଛି ପ୍ରସ୍ତୁତି । ସାମରିକ ଶକ୍ତି ବଢାଇବାକୁ ଆଣ୍ଡାମାନ ନିକୋବରରେ ମୁତୟନ ହେବେ ଅତିରିକ୍ତ ସାମରିକ ବଳ । ପ୍ରତିରକ୍ଷା ଭିତିଭୂମିକୁ ବିକାଶ କରି ଭାରତ ଏହାର ମୂଳଦୁଆ ପକାଇବ । ଚୀନ୍ ସହିତ ଭାରତର ରହିଛି ପ୍ରାୟ ୩ ହଜାର ୪୮୮ କିଲୋମିଟର ଦୂରତାର ଦୀର୍ଘ ସ୍ଥଳ ସୀମା । ଏହା ଉପରେ ଚୀନ୍ ବିସ୍ତାରବାଦ ନୀତି ଜରିଆରେ ନଜର ପକାଇ ଆସୁଛି ।
Kanak News is now on WhatsApp
Join and get latest news updates delivered to you via WhatsApp
ଏହା ମଧ୍ୟରେ ଭାରତ ଏହାକୁ ମୁକାବିଲା କରିବାକୁ ଏବେ ଭାରତ ମହାସାଗରରୁ ଜଳସୀମାରେ ଚୀନକୁ ଟକ୍କର ଦେବାକୁ କରୁଛି ଯୋଜନା । ୨୦୦୧ ମସିହାରୁ ଭାରତ ଆଣ୍ଡାମାନ ନିକୋବର କମାଣ୍ଡ ପ୍ରତିଷ୍ଠା କରିସାରିଛି । ଏହା ଜଳ, ସ୍ଥଳ ଓ ଆକାଶ ପଥରୁ ଭାରତକୁ ସୁରକ୍ଷା ପ୍ରଦାନ କରିବାର କ୍ଷମତା ରଖିଛି । ମଝିରେ ଆର୍ଥିକ ପ୍ରୋତ୍ସାହନ ଅଭାବରୁ ଏହା ସ୍ଥାଣୁ ହୋଇ ଯାଇଥିଲ।। କେନ୍ଦ୍ର ସରକାର ଏବେ ଏହାକୁ ଆର୍ଥିକ ପ୍ରୋତ୍ସାହନ ସମସ୍ତ ସରଂଜାମ ଯୋଗାଇ ଦେଇ ପୁଣି ଥରେ ଶକ୍ତିଶାଳୀ କରି ଚୀନକୁ ଚକମା ଦେବାକୁ ଯୋଜନା କରୁଛନ୍ତି । ଦକ୍ଷିଣ ପୂର୍ବ ଏସିଆର ଜଳପଥରେ ବାଣିଜ୍ୟରେ ଭାରତ ମହାସାଗର ଓ ବଙ୍ଗୋପ ସାଗର ଏକ ପ୍ରମୁଖ ରାସ୍ତା । ଏହା ଉପରେ ମଧ୍ୟ ଏହି ଠାରୁ ନଜର ରଖାଯାଇପାରିବ ।
ଲେହ ଗସ୍ତ ଅବସରରେ ପ୍ରଧାନମନ୍ତ୍ରୀ ମୋଦି ଗଲୱାନ ଘାଟିରେ ଚୀନ ସୈନିକଙ୍କ ସହ ସଂଘର୍ଷରେ ଆହତ ହୋଇଥିବା ସୈନିକଙ୍କୁ ଭେଟିଛନ୍ତି । ମୋଦି ତାଙ୍କୁ କହିଥିଲେ, ସେମାନଙ୍କ ପାଇଁ ୧୩୦ କୋଟି ଭାରତୀୟ ଗର୍ବ ଅନୁଭବ କରୁଛନ୍ତି । ଆମ ଦେଶ କେବେ କାହା ଆଗରେ ମୁଣ୍ଡ ନୁଆଁଇଁ ନାହିଁ । ଏବଂ କୌଣସି ଶକ୍ତି ଆଗରେ ମୁଣ୍ଡ ନୁଆଁଇବ ନାହିଁ । ସୈନିକଙ୍କ ଶକ୍ତିକୁ ଦେଖି ସେ ଏହି କଥା କହୁଛନ୍ତି ବୋଲି ଆହତ ସୈନିକଙ୍କୁ ଜଣାଇଛନ୍ତି ମୋଦି । ତାଙ୍କୁ ମୋଦି ଆହୁରି କହିଛନ୍ତି, ଜଣ ଜଣ କରି ସୈନିକଙ୍କୁ ଧନ୍ୟବାଦ ଦେବା ପାଇଁ ସେ ସେଠାକୁ ଯାଇଛନ୍ତି । ଇତି ମଧ୍ୟରେ ଚୀନ୍ ପ୍ରଧାନମନ୍ତ୍ରୀ ମୋଦିଙ୍କ ଲଦାଖ ଗସ୍ତକୁ ନେଇ ପ୍ରତିକ୍ରିୟା ପ୍ରକାଶ କରିଛି । ଚୀନ ବିଦେଶ ମନ୍ତ୍ରାଳୟର ମୁଖପାତ୍ର କହିଛନ୍ତି, ଉତେଜନା କମାଇବା ପାଇଁ ସାମରିକ ଓ କୂଟନୈତିକ ସ୍ତରରେ କଥାବାର୍ତା ଚାଲିଛି । କୌଣସି ପକ୍ଷ ଉତେଜନାକୁ ବଢ଼ାଇବା ପାଇଁ ଉଦ୍ୟମ କରିବା ଉଚ୍ଚିତ୍ ନୁହେଁ । ହସ୍ପିଟାଲକୁ ଯିବା ପୂର୍ବରୁ ମୋଦି ପୂର୍ବ ଲଦାଖର ‘ନିମୁ’ ସ୍ଥିତ ଏକ ସାମରିକ ଘାଟିକୁ ଯାଇ ସ୍ଥଳ ସେନା, ବାୟୁ ସେନା ଓ ଇଣ୍ଡୋ-ତିବେତାନ ବର୍ଡର ପୋଲିସର ଯବାନଙ୍କ ସହ ଆଲୋଚନା କରିଛନ୍ତି ।