ବିଶ୍ୱ ପାଇଁ ଗୋଟିଏ ପରେ ଗୋଟିଏ ବିପଦ ଆଣୁଛି ଚୀନ୍ । କରୋନା ପରେ ଏବେ ଚୀନରେ ମଣିଷଙ୍କୁ ସଂକ୍ରମଣ କଲାଣି ବାର୍ଡ ଫ୍ଲୁ, କୁକୁଡାଙ୍କ ଠାରୁ ମଣିଷଙ୍କୁ ବ୍ୟାପୁଥିବା ସୂଚନା ।
କନକ ବ୍ୟୁରୋ : କୁକୁଡାଙ୍କଠୁ ମଣିଷ…ମାଡ଼ିଆସିଲା ବାର୍ଡ ଫ୍ଲୁ ବିପଦ । ମଣିଷଙ୍କ ଦେହରେ ମିଳିଲା ବାର୍ଡ ଫ୍ଲୁ ଷ୍ଟ୍ରେନ୍ । ପ୍ରଥମେ କରୋନା ଆଉ ଏବେ ବାର୍ଡ ଫ୍ଲୁ । ବିଶ୍ୱ ପାଇଁ ଗୋଟିଏ ପରେ ଗୋଟିଏ ବିପଦ ଆମୁଛି ଚୀନ୍ । କରୋନା ଭୂତାଣୁର ଭୟ ଥମିନଥିବା ବେଳେ ଏବେ ଚୀନରୁ ସାମ୍ନାକୁ ଆସିଛି ଏକ ନୂଆ ବିପଦ । ପ୍ରଥମ ଥର ପାଇଁ ଚୀନରେ ମଣିଷଙ୍କ ଦେହରେ ଠାବ ହୋଇଛି ବାର୍ଡ ଫ୍ଲୁ ଷ୍ଟ୍ରେନ୍ । ଜଣେ ୪୧ ବର୍ଷୀୟ ବ୍ୟକ୍ତିଙ୍କ ଠାରେ ବାର୍ଡ ଫ୍ଲୁର H10N3 ଷ୍ଟ୍ରେନ୍ ମିଳିଥିବା ସୂଚନା ଦେଇଛନ୍ତି, ନ୍ୟାସନାଲ୍ ହେଲଥ କମିଶନ ।
Kanak News is now on WhatsApp
Join and get latest news updates delivered to you via WhatsApp
ନ୍ୟାସନାଲ ହେଲଥ କମିଶନଙ୍କ ସୂଚନା ଅନୁଯାୟୀ, ଜ୍ୱର ଏବଂ ଅନ୍ୟ କିଛି ଲକ୍ଷଣ ଦେଖା ଦେବା ପରେ ଏହି ବ୍ୟକ୍ତି ଜଣଙ୍କୁ ଏପ୍ରିଲ ୨୮ ତାରିଖରେ ହସ୍ପିଟାଲରେ ଭର୍ତି କରାଯାଇଥିଲା । ଆଉ ଏହାର ଏକ ମାସ ପରେ ଅର୍ଥାତ ମେ ୨୮ ତାରିଖରେ ତାଙ୍କ ଠାରେ ମିଳିଥିଲା ବାର୍ଡ ଫ୍ଲୁର H10N3 ଷ୍ଟ୍ରେନ୍ ।
ତେବେ ଏହି ବ୍ୟକ୍ତିଙ୍କ ବିଷୟରେ ଅଧିକ ସୂଚନା ଦେବାକୁ ମନା କରିଦେଇଛନ୍ତି ନ୍ୟାସନାଲ୍ ହେଲଥ କମିଶନ୍ । କିନ୍ତୁ ଏହା କୁକୁଡାଙ୍କଠାରୁ ମଣିଷଙ୍କୂୁ ବ୍ୟାପିଥିବା ସ୍ପଷ୍ଟ କରାଯାଇଛି । କିନ୍ତୁ ଆଶ୍ୱସ୍ତିର କଥା ହେଉଛି, ବାର୍ଡ ଫ୍ଲୁର H10N3 ଷ୍ଟ୍ରେନ୍ ଅଧିକ ଶକ୍ତିଶାଳୀ ନୁହେଁ, ଏବଂ ଏହା ବଡ ସ୍ତରରେ ବ୍ୟାପିବାର ମଧ୍ୟ ବିପଦ ନଥିବା କହିଛି ନ୍ୟାସନାଲ୍ ହେଲ୍ଥ କମିଶନ । ତେବେ ଏହି ଷ୍ଟ୍ରେନ୍ ଦ୍ୱାରା ଆକ୍ରାନ୍ତ ହୋଇଥିବା ବ୍ୟକ୍ତିଙ୍କ ସ୍ୱାସ୍ଥ୍ୟାବସ୍ଥା ବର୍ତମାନ ସମୟରେ ସ୍ଥିର ରହିଛି । ଏବଂ ଖୁବଶୀଘ୍ର ସେ ସୁସ୍ଥ ହୋଇ ହସ୍ପିଟାଲରୁ ଡିସଚାର୍ଜ ହୋଇଯିବେ ବୋଲି ସୂଚନା ମିଳିଛି ।
ଗୁରୁତ୍ୱପୂର୍ଣ୍ଣ କଥା ହେଉଛି, ଏହି ବ୍ୟକ୍ତିଙ୍କ ସଂସ୍ପର୍ଶରେ ଯେଉଁମାନେ ଆସିଥିଲେ, ସେମାନଙ୍କର ମେଡିକାଲ୍ ଯାଂଚ କରାଯାଇଥିଲା । ଏବଂ ଏଥିରେ କେହି ବି ସଂକ୍ରମିତ ହୋଇନଥିବା ସ୍ପଷ୍ଟ ହୋଇଛି । ଜାତୀୟ ଗଣମାଧ୍ୟମରୁ ମିଳିଥିବା ସୂଚନା ଅନୁଯାୟୀ, ଚୀନରେ ବାର୍ଡ ଫ୍ଲୁର ଅନେକ ଷ୍ଟ୍ରେନ୍ ରହିଛି । ଏଥି ମଧ୍ୟରୁ କିଛି ଷ୍ଟ୍ରେନ୍ ମଣିଷମାନଙ୍କୁ ସଂକ୍ରମିତ କରୁଛି । ତେବେ ସବୁଠୁ ଆଶ୍ୱସ୍ତିର କଥା ହେଉଛି ବାର୍ଡ ଫ୍ଲୁର H10N3 ଷ୍ଟ୍ରେନ୍ ବିଶ୍ୱର ଆଉ କୌଣସି ଦେଶରେ କୌଣସି ବ୍ୟକ୍ତିଙ୍କ ଠାରେ ଦେଖିବାକୁ ମିଳିନି । ଚୀନରେ ସଂକ୍ରମଣର ଏହା ପ୍ରଥମ ମାମଲା ।
ଏହି ଷ୍ଟ୍ରେନକୁ ଚୀନର ରାଷ୍ଟ୍ରୀୟ ସ୍ୱାସ୍ଥ୍ୟ ଆୟୋଗ ବେଶି ଭୟଙ୍କର ନୁହେଁ ବୋଲି କହିଛି ସତ, କିନ୍ତୁ ଏହି ଖବର, ସାରା ବିଶ୍ୱ ପାଇଁ ଭୟଙ୍କର ଅଟେ । କାରଣ କରୋନା ଭାଇରସ ମଧ୍ୟ ଚୀନର ରାସ୍ତା ଦେଇ ପୂରା ବିଶ୍ୱରେ ଖେଳିଯାଇଥିଲା । ଏବଂ ଆଜି ଯାଏଁ ବି ସାରା ବିଶ୍ୱ କରୋନା ସଂକ୍ରମଣ ସହ ଲଢେଇ କରୁଛି । ମୋଟାମୋଟି ଭାବେ କହିବାକୁ ଗଲେ ବିଶ୍ୱ ପାଇଁ ଗୋଟିଏ ପରେ ଗୋଟିଏ ବିପଦ ଆଣୁଛି ଚୀନ୍ ।