ବାଇଡେନଙ୍କ ବିଜୟରେ ଖୁସି ନାହାନ୍ତି କି ବିଶ୍ୱର ଦୁଇ ମହାଶକ୍ତି? ଶୁଭେଚ୍ଛା ଜଣାଇବାକୁ ମନା କଲା ଚୀନ୍, ଋଷ ଏଯାଏଁ ଖୋଲିନି ମୁହଁ ।
କନକ ବ୍ୟୁରୋ : ଆମେରିକାର ୪୬ ତମ ରାଷ୍ଟ୍ରପତି ଭାବେ ବାଇଡେନ ନିର୍ବାଚିତ ହୋଇଛନ୍ତି । ହ୍ୱାଇଟ ହାଉସ ରେସରେ ରିପବ୍ଲିକାନ୍ ପ୍ରାର୍ଥୀ ଡୋନାଲ୍ଟ ଟ୍ରମ୍ପଙ୍କୁ ମାତ୍ ଦେଇ ଡେମୋକ୍ରାଟିକ ପ୍ରାର୍ଥୀ ଜୋ ବାଇଡେନ ଏହି ବଡ ବିଜୟ ହାସଲ କରିଛନ୍ତି । ଆଉ ଏଥିପାଇଁ ଦେଶ ବିଦେଶରୁ ବାଇଡେନଙ୍କ ନିକଟକୁ ଛୁଟୁଛି ଶୁଭେଚ୍ଛାର ସୁଅ । ବିଭିନ୍ନ ଦେଶର ସର୍ବୋଚ୍ଚ ନେତା ବାଇଡେନଙ୍କୁ ବିଜୟ ପାଇଁ ଶୁଭେଚ୍ଛା ଜଣାଇବା ସହ ଆମେରିକା ସହ ସମ୍ପର୍କକୁ ଦୃଢ କରିବାକୁ ଆଗେଇ ଆସିଛନ୍ତି । ଏଭଳି ସ୍ଥଳେ ଭାରତର ପ୍ରଧାନମନ୍ତ୍ରୀ ନରେନ୍ଦ୍ର ମୋଦି ହୁଅନ୍ତୁ ବା ରାହୁଲ ଗାନ୍ଧି, ବାଇଡେନଙ୍କୁ ବିଜୟର ଶୁଭେଚ୍ଛା ଓ ଶୁଭକାମନା ଜଣାଇବାକୁ ଭୁଲିନାହାନ୍ତି । କିନ୍ତୁ ଏହାରି ଭିତରେ ବିଶ୍ୱର ଦୁଇ ମହାଶକ୍ତି କୁହାଯାଉଥିବା ଚୀନ ଓ ଋଷ, ଶୁଭେଚ୍ଛା ଜଣାଇବା ରେସରୁ ନିଜକୁ ଦୂରେଇ ରଖିଛନ୍ତି ।
Kanak News is now on WhatsApp
Join and get latest news updates delivered to you via WhatsApp
ବାଇଡେନ ଖୁବଶୀଘ୍ର ଆମେରିକାର ରାଷ୍ଟ୍ରପତି ଆସନରେ ବସିବାକୁ ଯାଉଥିବା ବେଳେ ଚୀନ୍ କିନ୍ତୁ ଶୁଭେଚ୍ଛା ଜଣାଇବାକୁ ସିଧା ମନା କରିଛି । ବରଂ ଆମେରିକା ରାଷ୍ଟ୍ରପତି ନିର୍ବାଚନର ଫଳାଫଳ ଆସିବାକୁ ଆହୁରି ସମୟ ବାକି ଅଛି ବୋଲି କହିଛି ବେଜିଂ । ଆମେରିକାର ଆଇନ ଓ ପ୍ରକ୍ରିିୟା ମୁତାବକ ରାଷ୍ଟ୍ରପତି ନିର୍ବାଚନର ଫଳାଫଳ ଘୋଷଣା କରାଯିବ ବୋଲି କହିଛି ଚୀନ୍ । କେବଳ ଚୀନ୍ ନୁହେଁ ଖୋଦ୍ ଡୋନାଲ୍ଡ ଟ୍ରମ୍ପ ମଧ୍ୟ ନିଜର ପରାଜୟ ସ୍ୱୀକାର କରିନାହାନ୍ତି । ଏନେଇ ଟ୍ୱିଟରରେ ଟ୍ରମ୍ପ ସ୍ପଷ୍ଟ କରିଛନ୍ତି । ଟ୍ରମ୍ପ କହିଛନ୍ତି, ଗଣମାଧ୍ୟମ କେବେ ଠାରୁ ଦେଶର ଆଗାମୀ ରାଷ୍ଟ୍ରପତି କିଏ ହେବ ବୋଲି ସ୍ଥିର କଲାଣି । ଏଭଳି କହି ନିର୍ବାଚନ ଫଳାଫଳକୁ କୋର୍ଟରେ ଚ୍ୟାଲେଞ୍ଜ କରିବାକୁ ସ୍ପଷ୍ଟ କରିଛନ୍ତି ଟ୍ରମ୍ପ ।
ସେହିଭଳି ଋଷର ରାଷ୍ଟ୍ରପତି ଭ୍ଲାଦିମିର ପୁଟିନ୍ ମଧ୍ୟ ଏଯାଏଁ ବାଇଡେନଙ୍କୁ ବିଜୟ ପାଇଁ ଶୁଭେଚ୍ଛା ଜଣାଇନାହାନ୍ତି । ତେବେ ଋଷର ବିରୋଧୀ ଦଳ ବିଜୟ ପାଇଁ ବାଇଡେନଙ୍କୁ ଶୁଭେଚ୍ଛା ଜଣାଇବାକୁ ଆଦୌ ପଛଘୁଞ୍ଚା ଦେଇନାହାନ୍ତି । ଏହାପୂର୍ବରୁ ୨୦୧୬ ଆମେରିକା ରାଷ୍ଟ୍ରପତି ନିର୍ବାଚନରେ ଋଷର ଦଖଲ ଓ ଟ୍ରମ୍ପଙ୍କୁ ସହାୟତା କରିବା ନେଇ ପୁଟିନଙ୍କ ନାଁରେ ଅଭିଯୋଗ ଆସିଥିଲା । ଏହାବାଦ୍ ଋଷ ପ୍ରତି ବାଇଡେନଙ୍କ କଠୋର ଆଭିମୁଖ୍ୟ ପୂରା ବିଶ୍ୱ ଜାଣିଛି । ଏପରିକି ଗତ ମାସରେ ଆମେରିକାର ରାଷ୍ଟ୍ରୀୟ ସୁରକ୍ଷା କ୍ଷେତ୍ରରେ ଋଷ ସବୁଠୁ ବଡ ବିପଦ ବୋଲି କହିଥିଲେ ବାଇଡେନ । ତେଣୁ ବାଇଡେନଙ୍କ ବିଜୟରେ ସେତେଟା ଖୁସି ନାହିଁ ଋଷ । ମେକ୍ସିକୋ ରାଷ୍ଟ୍ରପତି ମଧ୍ୟ ଟ୍ରମ୍ପଙ୍କ ସାଥ୍ ଦେବା ସହ ଯେତେବେଳ ଯାଏଁ ଆଇନଗତ ଲଢେଇ ଶେଷ ହୋଇ ନାହିଁ ସେତେବେଳ ଯାଏଁ ବାଇଡେନଙ୍କୁ ବିଜୟ ପାଇଁ ଶୁଭେଚ୍ଛା ଜଣାଇବେ ନାହିଁ ବୋଲି କହିଛନ୍ତି ।