ପଛକୁ ହଟିଲା ଚୀନ୍ ସେନା । ଦୁଇ ମାସର ବିବାଦ ପରେ ଗଲୱାନ ଘାଟିରୁ ଏକ କିଲୋମିଟର ପଛକୁ ହଟିଲା ଡ୍ରାଗନ ସେନା ।
କନକ ବ୍ୟୁରୋ : ବିବାଦୀୟ ଗଲୱାନ ଘାଟିରୁ ପଛକୁ ହଟିଲା ଡ୍ରାଗନ ସେନା । ମିଳିଥିବା ସୂଚନା ଅନୁସାରେ ପୂର୍ବ ଆଲୋଚନା ଅନୁଯାୟୀ ବିବାଦୀୟ ସ୍ଥାନରୁ ପ୍ରାୟ ୧କିଲୋମିଟର ପଛକୁ ହଟିଯାଇଛି ଚୀନ ସେନା । ଦୁଇ ଦେଶର ଆଲୋଚନା ଅନୁଯାୟୀ ଚୀନ୍ ସେନା ପଛକୁ ହଟିବା ପରେ ଭାରତୀୟ ସେନା ମଧ୍ୟ ପଛକୁ ହଟିବ । ଏଲଏସି ବା ପ୍ରକୃତ ନିୟନ୍ତ୍ରଣ ରେଖାର ଦୁଇ କିଲୋମିଟର ପର୍ଯ୍ୟନ୍ତ ଉଭୟ ଦେଶର ସେନା ରହିବେ ନାହିଁ । ତେବେ ପେଟ୍ରୋଲିଂ କରିପାରିବ ସେନା ।
Kanak News is now on WhatsApp
Join and get latest news updates delivered to you via WhatsApp
ପୂର୍ବ ଲଦାଖର ଗଲୱାନ ଘାଟୀ କୂଳେ କୂଳେ ଚୀନ୍ ସେନାର ନିର୍ମାଣକାର୍ଯ୍ୟର ଫଟୋକୁ କଏଦ କରିଛି ଭାରତୀୟ ଉପଗ୍ରହ । ଯେତେବେଳେ ଭାରତ ସମେତ ସାରା ବିଶ୍ୱ କରୋନା ସହ ଲଢେଇ କରୁଥିଲା ସେତେବେଳେ ଚୀନ୍ ସେନା ଏଭଳି ନିର୍ମାଣ କାର୍ଯ୍ୟ କରି ନିଜର ସ୍ଥିତିକୁ ସୁଦୃଢ କରିବା ପାଇଁ ଉଦ୍ୟମ କରୁଥିଲା । ଭାରତୀୟ ଉପଗ୍ରହର ଫଟୋ ଚୀନ୍ ସେନାର ବଡ ବଡ ବେସ୍ କ୍ୟାମ୍ପ ଓ ଜେସିବିକୁ ମଧ୍ୟ ସ୍ପଷ୍ଟ ଭାବରେ ଦେଖାଉଛି । ଏଲଏସି ବା ପ୍ରକୃତ ନିୟମନ୍ତ୍ରଣ ରେଖା ପର୍ଯ୍ୟନ୍ତ ରାସ୍ତା ବି ନିର୍ମାଣ କରିସାରିଛି ଡ୍ରାଗନ ସେନା । ଉପଗ୍ରହର ଏହି ସବୁ ଚିତ୍ର ଭାରତୀୟ ସେନା ଅଧିକାରୀଙ୍କୁ ଆଶ୍ଚର୍ଯ୍ୟ କରିଛି ।
ଭାରତ ଚୀନ୍ ମଧ୍ୟରେ ଲଦାଖ ସୀମାରେ ପାଖାପାଖି ଦୁଇ ମାସ ହେବ ଉତ୍ତେଜନା ଲାଗିରହିଛି । ସୀମାରେ ଦୁଇ ଦେଶର ଅଧିକରୁ ଅଧିକ ସେନା ମୁତୟନ ହେଉଛନ୍ତି । ଏହାରି ଭିତରେ ଏକ ବଡ ଖବର ଆସିଛି । ମିଳିଥିବା ସୂଚନା ଅନୁସାରେ ବିବାଦୀୟ ଗଲୱାନ ଘାଟିରୁ ପଛକୁ ହଟିଛି ଚୀନ୍ ସେନା ।
ଗଲୱାନ ଘାଟୀରେ ଦୁଇ ସେନା ମଧ୍ୟରେ ସଂଘର୍ଷ ପରେ ଭାରତ ଓ ଚୀନ୍ ମଧ୍ୟରେ ତିକ୍ତତା ଗତ ୫୦ବର୍ଷ ଭିତରେ ସବୁଠାରୁ ଅଧିକ ବଢିଯାଇଛି । ସେନାର ସର୍ବୋଚ୍ଚ ଅଧିକାରୀ ସ୍ତରରେ ଘନଘନ ଆଲୋଚନା ଚାଲିଛି କେମିତି ସୀମାରେ ଉତେଜନାକୁ କମ କରାଯିବ । କାରଣ ସ୍ଥଳସେନା ଶକ୍ତିରେ ବିଶ୍ୱର ଦୁଇ ସର୍ବ ବୃହତ ରାଷ୍ଟ୍ର ମୁହାଁମୁହିଁ ହେବା ସାରା ବିଶ୍ୱ ପାଇଁ ଏକ ଚିନ୍ତାର କାରଣ ।
ସୂତ୍ରରୁ ମିଳିଥିବା ସୂଚନା ଅନୁସାରେ ଚୀନ୍ ସେନା ପ୍ରାୟ ୧କିଲୋମିଟର ପଛକୁ ଘୁଂଚିଯାଇଛି । ଗତ ସୋମବାର ଚୀନ ସେନା ସହ ୧୧ ଘଂଟାର ଦୀର୍ଘ ଆଲୋଚନା ପରେ ପ୍ରଥମେ ଚୀନକୁ ପଛକୁ ହଟିବା ପାଇଁ କୁହାଯାଇଥିଲା । କାରଣ ଚୀନ ଗଲୱାନ ଘାଟିରେ ପ୍ରଥମେ ବିବାଦ ଆରମ୍ଭ କରିଥିଲା । ଏବେ ସେହି ଆଲୋଚନା ଆଧାରରେ ଚୀନ୍ ସେନା ପ୍ରାୟ ୧କିଲୋମିଟର ପଛକୁ ହଟିଥିବା କୁହାଯାଉଛି ।
ଦୁଇ ଦେଶର ଆଲୋଚନା ଅନୁଯାୟୀ ଚୀନ୍ ସେନା ପଛକୁ ହଟିବା ପରେ ଭାରତୀୟ ସେନା ମଧ୍ୟ ପଛକୁ ହଟିବ । ଏଲଏସି ବା ପ୍ରକୃତ ନିୟନ୍ତ୍ରଣ ରେଖାର ଦୁଇ କିଲୋମିଟର ପର୍ଯ୍ୟନ୍ତ ଉଭୟ ଦେଶର ସେନା ରହିବେ ନାହିଁ । କେବଳ ପେଟ୍ରୋଲିଂ ପାଇଁ ଯାଇପାରିବେ । ଆଲୋଚନା ଅନୁସାରେ ଚୀନ୍ ସେନା ୫ ମେ’ ପୂର୍ବରୁ ଥିବା ସ୍ଥିତିକୁ ଫେରିଯିବେ । ଏଥିସହ ଏଲଏସିରେ ସୈନ୍ୟ ସଂଖ୍ୟା କମ୍ କରିବେ ଦୁଇ ଦେଶ ଏବଂ ନିୟନ୍ତ୍ରଣ ରେଖାରେ ଭାରତର ରାସ୍ତା ନିର୍ମାଣ ମଧ୍ୟ ବନ୍ଦ ହେବ ନାହିଁ ।
ଏବେ ଦେଖିବାର କଥା ଚୀନ୍ ସେନା ପ୍ରକୃତରେ ଶାନ୍ତି ରକ୍ଷା ଦିଗରେ କେତେ ଗମ୍ଭୀର ଅଛି । ଯଦି ପ୍ରକୃତରେ ସେମାନେ ପଛକୁ ଘୁଂଚିବା ଜାରି ରଖିବେ ଏବଂ ଆଲୋଚନାରେ ହୋଇଥିବା ନିଷ୍ପତିକୁ ସମ୍ମାନ ଦେବେ ତେବେ ସୀମାରେ ଶାନ୍ତି ଫେରିଆସିବ ।