ମୁମ୍ବାଇ ବିଦ୍ୟୁତ ବିଭ୍ରାଟ ପଛରେ ଚୀନ୍ ହ୍ୟାକର । ଚୀନର ସାଇବର ଆଟାକ ନେଇ ନ୍ୟୁୟର୍କ ଟାଇମ୍ସରେ ପ୍ରକାଶ ପାଇଲା ରିପୋର୍ଟ ।
କନକ ବ୍ୟୁରୋ: ସୀମାରେ ଭାରତ ସହ ତିକ୍ତତା ସୃଷ୍ଟି କରିଥିବା ଚୀନ୍ ସାଇବର ଆଟାକ ମଧ୍ୟ ଜାରି ରଖିଛି । ଗତବର୍ଷ ଅକ୍ଟୋବର ମାସରେ ମୁ୍ମ୍ବାଇରେ ଦୀର୍ଘ ସମୟ ଧରି ବିଦ୍ୟୁତ ବିଭ୍ରାଟ ଦେଖାଦେଇଥିଲା । ଏପରିକି ଟ୍ରେନ ଚଳାଚଳ ଠାରୁ ଆରମ୍ଭ କରି ବେପାର ବାଣିଜ ସବୁ କିଛି ଠପ୍ ହୋଇଯାଇଥିଲା । ତେବେ ଏହା ପଛରେ ଚୀନ୍ର ସାଇବର ଆଟାକର ସମ୍ପୃକ୍ତି ଥିବା ନ୍ୟୁୟର୍କ ଟାଇମ୍ସରେ ରିପୋର୍ଟ ପ୍ରକାଶ ପାଇଛି ।
Kanak News is now on WhatsApp
Join and get latest news updates delivered to you via WhatsApp
ଏହି ରିପୋର୍ଟରେ କୁହାଯାଇଛି ଯେ ଚୀନର ହ୍ୟାକର ଗୋଷ୍ଠୀ ‘ରେଡ୍ ଇକୋ’ ଭାରତର ଶକ୍ତି କ୍ଷେତ୍ରକୁ ଟାର୍ଗେଟ କରିଛି । ଏହି ଗ୍ରୁପ ହିଁ ଭାରତୀୟ ପାୱାର ପ୍ଲାଂଟରେ ମାଲୱେର ବା କମ୍ପ୍ୟୁଟର ଭାଇରସ ଛାଡି ଏହାକୁ ଅଚଳ କରିଦେଇଥିଲେ । ଅପରପକ୍ଷରେ ମହାରାଷ୍ଟ୍ର ଶକ୍ତି ମନ୍ତ୍ରୀ ନୀତିନ ରାଉତ ଏହି ଅଭିଯୋଗରେ ସତ୍ୟତା ଥିବା ସହ ଏଥିପାଇଁ ୩ ଜଣିଆ କମିଟି ଗଠନ କରାଯାଇଥିବା କହିଛନ୍ତି ।
ସୀମାରେ ଗଲୱାନ ସଂଘର୍ଷ ପରେ ଭାରତକୁ ଟାର୍ଗେଟ କରିଥିଲେ ଚୀନ ହ୍ୟାକର । ଏବଂ ବିଜୁଳି ବିତରଣ କେନ୍ଦ୍ର ବା ଗ୍ରୀଡକୁ ଟାର୍ଗେଟ କରି ମାଲୱେର ଛାଡିଦେଇଥିଲେ । ଏଥିଯୋଗୁଁ ପ୍ରାୟ ୪ ଘଂଟା ଧରି ମୁମ୍ବାଇରେ ବିଦ୍ୟୁତ ବିଭ୍ରାଟ ଦେଖାଦେଇଥିଲା । ଚାଇନିଜ ମାଲୱେର ପ୍ରବାହକୁ ଆମେରିକାର କମ୍ପାନୀ ରେକର୍ଡର ଫ୍ୟୁଚର ଠାବ କରିଥିଲା । ଏହି କମ୍ପାନୀ ଡିଜିଟାଲ ବିପଦର ଅଧ୍ୟୟନ କରିଥାଏ । କମ୍ପାନୀ କହିଛି ଯେ, ଭାରତୀୟ ପାୱାର ଗ୍ରୀଡରେ ମାଲୱେର ପ୍ରବେଶ କରିଥିଲେ ହିଁ ଅଧିକାଂଶ ସକ୍ରିୟ ହୋଇନଥିଲା । ଏହି କାରଣରୁ ବିଶେଷ କିଛି କ୍ଷତି ହୋଇନଥିଲେ ବି ମୁମ୍ବାଇର ଏକ ଛୋଟିଆ ଅଂଶରେ ବିଜୁଳି ବିଭ୍ରାଟ ଦେଖାଦେଇଥିଲା ।
ଭାରତରେ କରୋନା ମହାମାରୀ ସଙ୍କଟ ଚାଲିଥିବା ବେଳେ ଗତବର୍ଷ ଅକ୍ଟୋବର ମାସରେ ମୁମ୍ବାଇରେ ବଡ ଧରଣର ବିଦ୍ୟୁତ ସଙ୍କଟ ଦେଖାଦେଇଥିଲା । ଅକ୍ଟୋବର ୧୨ ତାରିଖରେ ଦିନ ୧୦ଟାରୁ ଦୀର୍ଘ ୪ଘଂଟା ଧରି ବିଜୁଳ ଯୋଗାଯୋଗ ବାଧାପ୍ରାପ୍ତ ହୋଇଥିଲା । ଏହି କାରଣରୁ ଟ୍ରେନ ଗୁଡିକ ମଧ୍ୟ ଅଟକି ରହିଥିଲା ଓ ହସ୍ପିଟାଲ ଗୁଡିକ ଜେନେରେଟର ସାହାଯ୍ୟରେ ଭେଂଟିଲେର ଚଳାଇ ରୋଗୀଙ୍କ ଚିକିତ୍ସା କରିଥିଲେ ।