କନକ ବ୍ୟୁରୋ: ଯିଏ ସୁଖ ସାମିଲ ହେଉଥିବ ଦୁଃଖରେ ହାତ ଧରିଥିବ, ସେ ହିଁ ବନ୍ଧୁ । ସେଥିପାଇଁ କୁହାଯାଏ, ଜଣେ ଭଲ ସାଙ୍ଗ ଥିଲେ ଭାଇ ବା ଭଉଣୀର ଅଭାବ ରୁହେନି । ତେବେ ଗଞ୍ଜାମ ଜିଲ୍ଲାର ଏକ ଘଟଣା ପ୍ରକୃତ ବନ୍ଧୁଙ୍କ ପରିଭାଷା ବୁଝାଇ ଦେଇଛି । ସାଙ୍ଗ ଫୁସଫୁସ କ୍ୟାନସରରେ ପୀଡିତ ହୋଇ ଡାକ୍ତରଖାନାରେ ଜୀବନ ମୃତ୍ୟ ସହ ସଂଗ୍ରାମ କରୁଥିବା ବେଳେ ତାଙ୍କୁ ବଞ୍ଚାଇବା ପାଇଁ ଟଙ୍କା ସଂଗ୍ରହରେ ଲାଗିପଡିଛିନ୍ତି ଅନ୍ୟ ସାଙ୍ଗମାନେ ।
Kanak News is now on WhatsApp
Join and get latest news updates delivered to you via WhatsApp
ଡାକ୍ତରଖାନା ବେଡରେ ପଡି ଏବେ ଯନ୍ତ୍ରଣାରେ ଛଟପଟ ହେଉଛନ୍ତି ଗଞ୍ଜାମ ଜିଲ୍ଲା କୋଦଳା ବିଜ୍ଞାପିତ ଅଞ୍ଚଳ ପରିଷଦ ପଣ୍ଡା ସାହିର ମହିମା ନାହକ । ବିବାହ ମାତ୍ର ୪ ମାସରେ ଫୁସଫୁସ୍ କ୍ୟାନସର ପୀଡିତ ବୋଲି ଜଣାପଡିବା ପରେ ମହିମାଙ୍କ ଦୁନିଆରେ ଘୋଟି ଆସିଛି ବହଳ ଅନ୍ଧାର । ଡାକ୍ତରଖାନାରେ ଜୀବନ ମୃତ୍ୟୁ ସହ ସଂଘର୍ଷ ଚାଲିଥିବା ବେଳେ ମହିମାଙ୍କ ଚିକିତ୍ସା ପାଇଁ ଅର୍ଥ ଯୋଗାଡରେ ଲାଗିଛନ୍ତି ତାଙ୍କ ପିଲାଦିନର ସାଙ୍ଗସାଥୀ । କୋଦଳା ଓ ଆଖପାଖ ଅଞ୍ଚଳରେ ଘରକୁ ଘର ବୁଲି ସାଙ୍ଗ ପାଇଁ ସାହାଯ୍ୟ ମାଗୁଛନ୍ତି ସାଙ୍ଗ ।
୨ ମାସ ହେଲା ଭୁବନେଶ୍ୱରର ଏକ ଘରୋଇ ଡାକ୍ତରଖାନାରେ ମହିମାଙ୍କ ଚିକିତ୍ସା ଚାଲିଥିବା ବେଳେ ଏଥିପାଇଁ ୨୫ ଲକ୍ଷ ଟଙ୍କା ଆବଶ୍ୟକ । ହେଲେ ତାଙ୍କ ପରିବାର ଏତେ ଟଙ୍କା ଖର୍ଚ୍ଚ କରିବାକୁ ଅସମର୍ଥ । ତେଣୁ ସାଙ୍ଗର ଜୀବନ ବଞ୍ଚାଇବା ପାଇଁ ସାହାଯ୍ୟ ମାଗୁଛନ୍ତି ସାଙ୍ଗ । ଆଉ ସେମାନଙ୍କ ସାଥ ଦେଇଛି କୋଦଳାର ଶ୍ରବଣ ସେବା ଅନୁଷ୍ଠାନ । ସାମସ୍ତଙ୍କ ମୁଁହରେ ଗୋଟିଏ କଥା, ସାହାଯ୍ୟ ମିଳିଲେ ସେମାନଙ୍କ ସାଙ୍ଗ ନିଶ୍ଚୟ ସୁସ୍ଥ ହୋଇ ଘରକୁ ଫେରିବ ।