କନକ ବ୍ୟୁରୋ : ବାପା ଉପରେ ରାଗ କାରଣରୁ ବଳି ପଡ଼ିଲା ୫ବର୍ଷର ପୁଅ । ଅଭିଯୁକ୍ତର ଆତ୍ମସମର୍ପଣ ପରେ ଜଣାପଡ଼ିଲା ପୁରା ସତ । ମୃତଦେହକୁ ହାରମନିୟମରେ ଲୁଚାଇ ନେଇ ଫିଙ୍ଗିଦେବାକୁ କରୁଥିଲା ଯୋଜନା । ମାଲକାନଗିରି ଏମଭି ୧୯ରୁ ଆସିଲା ଶତ୍ରୁତାରୁ ଶିଶୁ ହତ୍ୟାର ସାଂଘାତିକ ଖବର ।
Kanak News is now on WhatsApp
Join and get latest news updates delivered to you via WhatsApp
ସୂଚନା ଅନୁସାରେ କୋଭିଡ ଟୀକା ନେବା ଲାଗି ପଡିଶା ଘର ମାଉସୀଙ୍କୁ ଖବର ଦେବାକୁ ଯାଇ ନିଖୋଜ ହୋଇ ଯାଇଥିଲା ୪ ବର୍ଷର ନିଷ୍ପାପ ଶିଶୁ । ଏମଭି ୧୯ ଗାଁର ହାରାଧନ ମଣ୍ଡଳଙ୍କ ୪ ବର୍ଷର ଶିଶୁ ଅଙ୍କିତ ମଣ୍ଡଳକୁ ଗତ କାଲି ତାଙ୍କ ମା ପଡିଶା ଘରକୁ ପଠାଇ ଥିଲେ । ତେବେ ପଡିଶା ଘର ବିକାଶ ରାୟ ସେତେବେଳେ କିଛି ବାଦ୍ୟ ଯନ୍ତ୍ର ବଜାଉ ଥିବାରୁ ପିଲାଟି ସେଠାରେ ଅଟକି ଯାଇଥିଲା । ଆଉ ହଠାତ ପିଲାଟିର ବେକରେ ଗାମୁଛି ଦେଇ ହତ୍ୟା କରି ଘର ଭିତରେ ଲୁଚାଇ ରଖି ଥିଲା ବିକାଶ ।
ଗାଁ ଲୋକେ ଖୋଜା ଖୋଜି କରିବା ପରେ ପୁଲିସକୁ ଖବର ଦେଇଥିଲେ । ଗାଁ ଲୋକଙ୍କ ସହ ହତ୍ୟାକାରୀ ମଧ୍ୟ ଥାନାକୁ ଯାଇଥିଲେ ନିଖୋଜ ମାମଲା ରୁଜୁ କରିବା ପାଇଁ । ଗାଁ ଲୋକଙ୍କ ସନ୍ଦେହ ପରେ ପୁଲିସ ସାମନାରେ ଦୋଷ ଶିକାର କରିଥିଲା ବିକାଶ । ବାପାଙ୍କ ଉପରେ ରାଗ ଥିବାରୁ ପୁଅକୁ ମାରିଥିବା ନେଇ ସ୍ୱୀକାର କରିଥିଲା ବିକାଶ । ପରେ ପୁଲିସ ବିକାଶ ରାୟଙ୍କ ଘରେ ଲୁଚାଯାଇ ଥିବା କୁନି ପିଲାର ଶବକୁ ଉଦ୍ଧାର କରିଥିଲା ।