ଥମିବାର ନାଁ ନେଉନାହିଁ ପିଲା ଚୋରି ଗୁଜବ ! ପୁଣି ୫ଜଣ ବ୍ୟକ୍ତିଙ୍କୁ ପିଟି ପିଟି ହତ୍ୟା କଲେ ଲୋକେ ।
ପିଲା ଚୋରି ଗୁଜବ ଥମିବାର ନାଁ ନେଉନାହିଁ । ଦେଶର ବିଭିନ୍ନ ରାଜ୍ୟରେ କେଉଁଠି ନା କେଉଁଠି ପିଲାଚୋରି ଗୁଜବକୁ କେନ୍ଦ୍ର କରି ଲୋକମାନଙ୍କୁ ଜୀବନରୁ ମାରିଦେଉଛନ୍ତି । ସେହିଭଳି ଏକ ଘଟଣା ଦେଖିବାକୁ ମିଳିଛି ମହାରାଷ୍ଟ୍ର ଧୁଲେ ଜିଲ୍ଲାରେ । ପିଲାଚୋର ଭାବି ୫ ଜଣ ବ୍ୟକ୍ତିଙ୍କୁ ସ୍ଥାନୀୟ ଲୋକମାନେ ଅତି ନିର୍ଦ୍ଦୟର ସହ ପିଟି ପିଟି ହତ୍ୟା କରିଛନ୍ତି । ପୋଲିସ ଘଟଣା ସ୍ଥଳରେ ପହଞ୍ଚି ଘଟଣାର ତଦନ୍ତ ଆରମ୍ଭ କରିବା ସହ ୧୫ ଜଣଙ୍କୁ ଗିରଫ କରିଛି ।
Kanak News is now on WhatsApp
Join and get latest news updates delivered to you via WhatsApp
ସୂଚନା ଅନୁଯାୟୀ, ମହାରାଷ୍ଟ୍ର ଧୁଲେ ଜିଲ୍ଲାର ଏକ ଆଦିବାସି ପ୍ରବଣ ଅଞ୍ଚଳକୁ ୫ଜଣ ଲୋକ କୌଣସି କାମରେ ଆସିଥିଲେ । ଏହି ୫ ଜଣ ବ୍ୟକ୍ତିଙ୍କୁ ପିଲାଚୋର ଭାବି ସ୍ଥାନୀୟ ଲୋକେ ଏକାଠି ହୋଇ ଇଟା ପଥର ମାରିବା ସହ ଲାଠିରେ ମାଡ ମାରିଥିଲେ । ପରେ ସେହି ଅଜଣା ବ୍ୟକ୍ତି ମାନଙ୍କୁ ଏକ ଘର ଭିତରେ ବନ୍ଦ କରି ମାଡ ମାରିଥିଲେ । ଯହା ଫଳରେ ଘଟଣା ସ୍ଥଳରେ ୫ ଜଣଙ୍କର ମୃତ୍ୟୁ ହୋଇଛି । ଏହି ମାଡ ମାରିବା ଘଟଣାକୁ ଅନ୍ୟ ଲୋକ ମାନେ ଛିଡା ହୋଇ ଦେଖିବା ସହ ମୋବାଇଲରେ ଘଟଣାର ଭିଡିଓ ଉତ୍ତୋଳନ ମଧ୍ୟ କରିଥିଲେ । ଯାହା ଏବେ ସୋସିଆଲ ମିଡିଆରେ ଭାଇରାଲ ହେବାକୁ ଲାଗିଛି ।
ପିଲା ଚୋରି ଗୁଜବକୁ କେନ୍ଦ୍ର କରି ଅଜଣା ଲୋକଙ୍କୁ ମାଡ ମାରି ହତ୍ୟା କରିବାର ଏହା ପ୍ରଥମ ଘଟଣା ନୁହେଁ । ଆଗରୁ ମଧ୍ୟ ଏହିପରି ଅନେକ ଘଟଣା ସାମ୍ନାକୁ ଆସିଛି । ଏହି ଘଟଣା ଘଟିବାର କିଛିଦିନ ପୂର୍ବରୁ ଆସାମର ଆଗଲଂଗ ଜିଲ୍ଲାର ଲୋକମାନେ ଦୁଇ ଯୁବକଙ୍କୁ ପିଲାଚୋର ଭାବି ପିଟି ପିଟି ଅତି ନିର୍ମମ ଭାବେ ହତ୍ୟା କରିଥିଲେ ।
ପୋଲିସର କହିବା ଅନୁସାରେ, ଏହି ୫ ଜଣ ବ୍ୟକ୍ତି କୌଣସି କାମରେ ଧୁଲେ ଅଞ୍ଚଳକୁ ଆସିଥିଲେ । ଏମାନେ ପରସ୍ପର ବନ୍ଧୁ ହୋଇଥିବାରୁ ଗାଁରେ ଏକାଠି ବୁଲୁଥିଲେ । ଲୋକମାନେ ଏମାନଙ୍କୁ ପିଲା ଚୋର ଭାବି ମାଡ ମାରିଥିଲେ । ସେତିକିରେ ମନ ନବୁଝିବାରୁ ଗୋଟେ ଘର ଭିତରେ ବନ୍ଦ କରି ପିଟିଥିଲେ । ଯାହା ଫଳରେ ଘଟଣା ସ୍ଥଳରେ ୫ ଜଣଙ୍କ ମୃତ୍ୟୁ ହୋଇଛି । ପୋଲିସ ଏହି ଘଟଣାରେ ସମ୍ପୃକ୍ତ ଥିବା ୧୫ ଜଣଙ୍କୁ ଗିରଫ କରିବା ସହ ମୃତ ବ୍ୟକ୍ତି ମାନଙ୍କ ପରିଚୟ ଖୋଜୁଛି ।