କନକ ବ୍ୟୁରୋ : କରୋନା କାରଣରୁ ବହୁତ ପିଲା ମା’ ବାପାଙ୍କୁ ହରାଇ ଅନାଥ ହୋଇଯାଇଛନ୍ତି । କାହାର ମା’ କରୋନାରେ ପ୍ରାଣ ହରାଇଛନ୍ତି ତ ଆଉ କାହାର ବାପାଙ୍କ ଦେହାନ୍ତ ହୋଇଯାଇଛି । ଯେଉଁଥିପାଇଁ ବହୁ ପିଲା ଖାଦ୍ୟପେୟଠାରୁ ଆରମ୍ଭ କରି ଆର୍ଥିକ ସଙ୍କଟ ମଧ୍ୟରେ ପଡୁଛନ୍ତି । ଅନେକ ପିଲା ବେସାହାରା ହୋଇଯାଉଛନ୍ତି ।
Kanak News is now on WhatsApp
Join and get latest news updates delivered to you via WhatsApp
ଝାରସୁଗୁଡା ଜିଲ୍ଲା ବ୍ରଜରାଜନଗର ପୌରାଂଚଳରୁ ଚାଇଲ୍ଡଲାଇନ ଅସହାୟ ଯମଜ ଭାଇଭଉଣୀ ଦ୍ୱୟଙ୍କୁ ସମନ୍ୱିତ ଶିଶୁବିକାଶ ପ୍ରକଳ୍ପ ଏବଂ ଜିଲ୍ଲା ପ୍ରଶାସନ ସହାୟତାରେ ଉଦ୍ଧାର କରିଛି । ୭ ବର୍ଷର ଏହି ଯମଜ ଭାଇଭଉଣୀଙ୍କ ବାପା ୨ ବର୍ଷ ପୂର୍ବରୁ ମୃତ୍ୟୁ ବରଣ କରିସାରିଥିବା ବେଳେ ସପ୍ତାହକ ତଳେ ମା’ କରୋନାରେ ମୃତ୍ୟୁ ହୋଇଛି । ଏହା ପରେ ଦୁଇ ଶିଶୁ ଅସହାୟ ହୋଇଯାଇଥିଲେ ।
ଦୁଇ ଶିଶୁଙ୍କ ଖାଇବା ପିଇବାରେ ଅସୁବିଧା ହେଉଥିବା ଖବର ପାଇ ଜିଲ୍ଲାପ୍ରଶାସନ ଓ ଚାଇଲ୍ଡଲାଇନ ସହାୟତାରେ ଏମାନଙ୍କୁ ଉଦ୍ଧାର କରାଯାଇଛି । ଶିଶୁମଙ୍ଗଳ କମିଟିର ନିର୍ଦ୍ଦେଶ କ୍ରମେ ଦୁଇ ଶିଶୁଙ୍କୁ ଶିଶୁ ଯତ୍ନ ଅନୁଷ୍ଠାନରେ ରଖାଯାଇଛି । ଅସହାୟ ଶିଶୁଙ୍କ ପ୍ରତି ସରକାରଙ୍କ ପକ୍ଷରୁ ଜାରି କରାଯାଇଥିବା ଯୋଜନାରେ ସାମିଲ କରାଯିବ ବୋଲି ଜିଲ୍ଲା ପ୍ରଶାସନ ପକ୍ଷରୁ ସୂଚନା ଦିଆଯାଇଛି ।