କ୍ୟାବିନେଟ୍ ସଚିବଙ୍କ ସହ ଆଲୋଚନା କଲେ ରାଜ୍ୟ ସରକାର । ବିଦ୍ୟୁତ୍ ସେବା, ଇଣ୍ଟରନେଟ୍ ଏବଂ ବ୍ୟାଙ୍କିଙ୍ଗ୍ ସେବାର ଅଗ୍ରଗତି ପାଇଁ ସହଯୋଗ ଲୋଡ଼ିଲେ ।
କନକ ବ୍ୟୁରୋ: ବାତ୍ୟା ‘ଫୋନି’ରେ ସମ୍ପୂର୍ଣ୍ଣ ଧ୍ୱସ୍ତ ବିଧ୍ୱସ୍ତ ହୋଇଥିବା ବିଦ୍ୟୁତ୍ ଓ ମୋବାଇଲ ସେବା ପୁନଃରୁଦ୍ଧାରରେ ଅଗ୍ରଗତି ନେଇ କ୍ୟାବିନେଟ୍ ସଚିବଙ୍କ ସହ ସମୀକ୍ଷା କଲେ ରାଜ୍ୟ ମୁଖ୍ୟ ଶାସନ ସଚିବ । ସଚିବାଳୟରୁ ଭିଡ଼ିଓ କନଫରେସିଂ ଜରିଆରେ ହୋଇଥିବା ବୈଠକରେ ମୋବାଇଲ ଓ ବିଦ୍ୟୁତ୍ ବ୍ୟବସ୍ଥା ପୁନଃରୁଦ୍ଧାର କାର୍ଯ୍ୟ ପାଇଁ ରାଜ୍ୟର ଆବଶ୍ୟକତାକୁ କ୍ୟାବିନେଟ୍ ସଚିବ ପ୍ରଦୀପ କୁମାର ସିହ୍ନାଙ୍କୁ ଅବଗତ କରାଇଛନ୍ତି ମୁଖ୍ୟ ଶାସନ ସଚିବ ଆଦିତ୍ୟ ପ୍ରସାଦ ପାଢ଼ୀ । ବର୍ତ୍ତମାନ ସୁଦ୍ଧା ପୁରୀ, ଭୁବନେଶ୍ୱର ଓ ଖୋର୍ଦ୍ଧା ଆଦି ବିଶେଷ କ୍ଷତିଗ୍ରସ୍ତ ସହରାଞ୍ଚଳରେ ୧୦୦% ଜଳ ଯୋଗାଣ ବ୍ୟବସ୍ଥାକୁ କାର୍ଯ୍ୟକ୍ଷମ କରାଯାଇଛି । ଗ୍ରାମାଞ୍ଚଳରେ ସମସ୍ତ ନଳକୂପକୁ ବିଶୋଧନ ଏବଂ କାର୍ଯ୍ୟକ୍ଷମ କରାଯାଇଛି ।
Kanak News is now on WhatsApp
Join and get latest news updates delivered to you via WhatsApp
ପୁରୀରେ ଡ଼ାଟା ସଂଚାରଣ ଇଣ୍ଟରନେଟ୍ କାମ କରୁନଥିବାରୁ ବର୍ତ୍ତମାନ ସୁଦ୍ଧା, ୨୭୩ଟି ଏଟିଏଏମ ମଧ୍ୟରୁ ୨୦ଟି ଏଟିଏଏମ ମେସିନ୍ କାର୍ଯ୍ୟକ୍ଷମ କରୁଛି । ପୁରୀରେ ଥିବା ସମସ୍ତ ବ୍ୟାଙ୍କ ମାନେ ନିଜ ନିଜ ବ୍ରାଞ୍ଚକୁ ପୂର୍ଣ୍ଣମାତ୍ରାରେ କାର୍ଯ୍ୟକ୍ଷମ କରାଇବାକୁ ମଧ୍ୟ ମୁଖ୍ୟ ଶାସନ ସଚିବ ଅନୁରୋଧ କରିଛନ୍ତି । ବିଦ୍ୟୁତ୍ ବ୍ୟବସ୍ଥା ପୁନଃରୁଦ୍ଧାର କାର୍ଯ୍ୟକୁ ତ୍ୱରାନ୍ୱିତ କରାଯାଇଛି । ଇତି ମଧ୍ୟରେ ଆନ୍ଧ୍ରପ୍ରଦେଶରୁ ୨୦୦, ପଶ୍ଚିମବଙ୍ଗରୁ ୫୦ ଏବଂ ତେଲେଙ୍ଗାନାରୁ ୫୦ ବିଦ୍ୟୁତ୍ ଗ୍ୟାଙ୍ଗ୍ ଆସି ରାଜ୍ୟରେ ବିଦ୍ୟୁତ୍ କାର୍ଯ୍ୟ ଚାଲୁ ରଖିଛନ୍ତି । ତେଣୁ ଏହାକୁ ଅଧିକ ତ୍ୱରାନ୍ୱିତ କରିବାକୁ କର୍ଣ୍ଣାଟକ ରାଜ୍ୟରୁ ୧୦୦ ବିଦ୍ୟୁତ୍ ଗ୍ୟାଙ୍ଗ୍ ସହ ଓଡ଼ିଶାକୁ ୩୬ଟି ବିଦ୍ୟୁତ୍ ଖୁଣ୍ଟି ଇରେକ୍ଟର ମେସିନ୍ ପଠାଇବା ପାଇଁ ଅନୁରୋଧ କରିଛନ୍ତି ମୁଖ୍ୟ ଶାସନ ସଚିବ ଆଦିତ୍ୟ ପ୍ରସାଦ ପାଢ଼ୀ ।
ଅନ୍ୟପଟେ ରାଜ୍ୟ ଅତିରିକ୍ତ ମୁଖ୍ୟ ଶାସନ ସଚିବ ଅସୀତ୍ ତ୍ରିପାଠୀ ଜଣାଇଥିଲେ କି, ଗତ ୩ ଦିନ ମଧ୍ୟରେ ମୋବାଇଲ ସେବା ଯୋଗାଯୋଗରେ ଉନ୍ନତି ପରିଲିକ୍ଷିତ ହେଉଛି । ତେଣୁ ବର୍ତ୍ତମାନ ସୁଦ୍ଧା ଭୁବନେଶ୍ୱର ଓ ଖୋର୍ଦ୍ଧାରେ ୨୯ ପ୍ରତିଶତ, ପୁରୀରେ ୯ ପ୍ରତିଶତ ଏବଂ କଟକରେ ୩୫ ପ୍ରତିଶତ ମୋବାଇଲ ସେବା ଅଗ୍ରଗତି ହୋଇଛି । କିନ୍ତୁ ଯୋଗାଯୋଗ ସେବାରେ ଉନ୍ନତି ପାଇଁ ପୁରୀରେ ସ୍ୱତନ୍ତ୍ର ଅସ୍ଥାୟୀ ବୈଷୟିକ ସ୍ଥାପନ ନିମନ୍ତେ ଚିହ୍ନଟ କରାଯାଇଛି । ଏହା ସ୍ଥାପିତ ହେଲେ ଯୋଗାଯୋଗରେ ଅଧିକ ଉନ୍ନତି ଆଣିବ ବୋଲି କ୍ୟାବିନେଟ୍ ସଚିବଙ୍କୁ ଅବଗତ କରାଇଛନ୍ତି ଅରତିକ୍ତ ମୁଖ୍ୟ ଶାସନ ସଚିବ ଅସୀତ ତ୍ରିପାଠୀ ।