କନକ ବ୍ୟୁରୋ : ଦେଶର ସବୁଠାରୁ ପୁରୁଣା ରାଜନୈତିକ ଦଳ କଂଗ୍ରେସ ଭିତରେ ସବୁ କିଛି ଠିକ ଠାକ୍ ଚାଲୁନାହିଁ । ପଞ୍ଜାବ କଂଗ୍ରେସରେ ଚାଲିଥିବା କନ୍ଦଳ ଏପର୍ଯ୍ୟନ୍ତ ଶାନ୍ତ ପଡିନଥିବା ବେଳେ ମୁଖ୍ୟମନ୍ତ୍ରୀ ଆସନକୁ ନେଇ ଛତିଶଗଡରେ ଆରମ୍ଭ ହୋଇଛି କନ୍ଦଳ । ଛତିଶଗଡରେ ମୁ୍ଖ୍ୟମନ୍ତ୍ରୀ ବଦଳାଇବାକୁ ରାଜ୍ୟ କଂଗ୍ରେସ ପକ୍ଷରୁ କେନ୍ଦ୍ର କଂଗ୍ରେସ ଉପରେ ଚାପ ପକାଯାଉଛି । କହିରଖୁ କି ପାର୍ଟିର ମୁଖ୍ୟ ଏପର୍ଯ୍ୟନ୍ତ ସେନେଇ କିଛି ସଂକେତ ଦେଇ ନାହାନ୍ତି । ଛତିଶଗଡ ମୁଖ୍ୟମନ୍ତ୍ରୀ ଭୂପେଶସିଂ ବଘେଲ, ଦଳର କିଛି ବରିଷ୍ଠ ନେତା ଓ ସ୍ୱାସ୍ଥ୍ୟମନ୍ତ୍ରୀ ଟି.ଏସ ସିଂଦେବଙ୍କ ମଧ୍ୟରେ ବିବାଦ ଦେଖା ଦେଇଛି । ଏହି ଦୁଇ ନେତା ଆଜି କଂଗ୍ରେସର ବରିଷ୍ଠ ନେତା ରାହୁଲ ଗାନ୍ଧୀଙ୍କୁ ଭେଟିବାକୁ ଦିଲ୍ଲୀ ପହଂଚିଛନ୍ତି ।
Kanak News is now on WhatsApp
Join and get latest news updates delivered to you via WhatsApp
ଟିଏସ ସିଂଦେବଙ୍କ ସମର୍ଥକମାନେ କହିଛନ୍ତି କି ସରକାର ଗଠନ ବେଳେ ଅଢେଇ ଅଢେଇ ବର୍ଷ ମୁଖ୍ୟମନ୍ତ୍ରୀ ପଦକୁ ନେଇ ସହମତି ହୋଇଥିଲା । ଏହି କ୍ରମରେ ଏବେ ସିଂଦେବ ମୁଖ୍ୟମନ୍ତ୍ରୀ ହେବା କଥା । ଅନ୍ୟପଟେ ବଘେଲଙ୍କ ସହଯୋଗୀ କହିଛନ୍ତି କି ସେମିତି କିଛି ଚୁକ୍ତି ହୋଇ ନଥିଲା ।
Chhattisgarh CM Bhupesh Bhaghel arrives at the residence of Congress leader Rahul Gandhi in Delhi. pic.twitter.com/3qwQSFuYBO
— ANI (@ANI) August 24, 2021
ଜାତୀୟ ଗଣମାଧ୍ୟମର ସୂଚନା ମୁତାବକ ବଘେଲ ଓ ସିଂଦେବ ରାହୁଲ ଗାନ୍ଧୀଙ୍କ ବାସଭବନରେ ପହଂଚିସାରିଛନ୍ତି । ସେମାନେ ରାହୁଲ ଗାନ୍ଧୀଙ୍କୁ ଭେଟି ଏ ବାବଦରେ ଆଲୋଚନା କରିବେ । ଏହି ବୈଠକରେ ଛତିଶଗଡ କଂଗ୍ରେସ ପ୍ରଭାରୀ ପି.ଏଲ ପୁନିଆ ଓ କଂଗ୍ରେସ ସାଂଗଠନିକ ମହାସଚିବ କେ.ସି ବେଣୁ ଗୋପାଳ ଏହି ବୈଠକରେ ଉପସ୍ଥିତ ରହିବେ ବୋଲି ଅନୁମାନ କରାଯାଉଛି । ଦିଲ୍ଲୀ ବାହାରିବା ପୂର୍ବରୁ ଗଣମାଧ୍ୟମକୁ ବଘେଲ କହିଛନ୍ତି କି ରାହୁଲ ଗାନ୍ଧୀ ତାଙ୍କୁ ଦିଲ୍ଲୀ ଡାକିଛନ୍ତି । ବେଣୁ ଗୋପାଳଙ୍କ ସହିତ ବୈଠକ ରହିଛି ଓ ରାଜ୍ୟ ପ୍ରଭାରୀ ବି ଏହି ବୈଠକରେ ଉପସ୍ଥିତ ରହିବେ ।
କହିରଖୁ କି ୨୦୧୮ ଡିସେମ୍ବର ମାସରେ ଛତିଶଗଡରେ କଂଗ୍ରେସ ସରକାର ଗଠନ କରିଥିଲା । ଏହାପରେ ମୁଖ୍ୟମନ୍ତ୍ରୀ ଆସନକୁ ନେଇ ବଘେଲ ଓ ସିଂଦେଓଙ୍କ ମଧ୍ୟରେ ସଂପର୍କ ସହଜ ହୋଇପାରି ନଥିଲା । ହେଲେ କଂଗ୍ରେସ ବିଧାୟକ ବୃହଷ୍ପତି ସିଂ ଟିଏସ ସିଂଦେବଙ୍କ ନାମରେ ତାଙ୍କୁ ହତ୍ୟା କରିବାକୁ ଯୋଜନା କରୁଛନ୍ତି ବୋଲି ଅଭିଯୋଗ ଆଣିବା ପରେ ବିବାଦ ଉଗ୍ରରୂପ ନେଇଛି ।